1Asau a nurnur? I lenri: Ra taio i nurnur, i sa tasman mulusi lena, asau ra i kis langlang suri nama nurnur, in rakon pasi ut. Ke tama i utmakai, ikut i tasmani lena i lingmulus ut.
2A kum lamlabino tagun numugu det nurnur lenra, ra o God i gas nam det ra i wasiso puaso un det lena det wakak, kibino una nundet a nurnur.
3Una nundat a nurnur, dat tasmani lena o God i ukis a rakrakon bual nam anun a wasiso. Ra asau ra dat tama i, o God i pami tagun asau ra ka di tama i.
4Una nun a nurnur, o Abel i pitar tar a etabor torom o God ra i wakak sakit taun a etabor anun o Kain. Kibino una nun a nurnur, o God i nem anun a etabor, ra i wasiso puaso un o Abel lena i a tene tokodos. A lingmulus o Abel i sa mat, ikut, kibino una nun a nurnur, kuri utmakai i wasiso torom dat.
5Una nurnur anun o Enok, o God i los ru i sur gong i taramo a minat. Ka di tama meleti mo, uni o God i sa rakon pasi. Ra o God ke rakon pasi utmakai, i gas doko nam o Enok ra i wasiso puaso uni lena i wakak.
6Ra taio ke nurnur, o God ken gas lar pas nami. Uni taio ra i nem na wan torom o God, in nurnur lena o God i kis, ma in nurnur kai lena, o God in pitar a ikul tandet ra det sisio mulus suri.
7O Noa i longoro a utumarong anun o God toromi una kum utna ra in nanpat ra ka di tama i utmakai. Ra una nun a nurnur, i ru pas o God ma i mur anun a wasiso, ma i pam a sip, ra i ulaun pas det tamtamano uni. A nurnur anun o Noa i upuaso a kum sakino petutna anun a taro una rakrakon bual, ra o God i kuro det uni. Ma o God i watung o Noa a tene tokodos, kibino una nun a nurnur.
8Una nun a nurnur, o Abaram i mur a wasiso ra o God i kabo pasi sur in nan sur a tamon ra o God i sa uliliman tari sur numur anunu. I wan, ikut ke tasman a tamon ra i wan suri.
9Una nun a nurnur i kis kut elar nama usiro una tamon ra o God i sa uliliman tari nami. A liliman ra o God i uliliman tari nami, numur i kis utkai torom o Aisak ma o Jekop. O Abaram det, det laun kut una kum rumu na sel. Lenkutkai ra o Aisak ma o Jekop.
10O Abaram i kis kut elar nama usiro una tamon ra, uni i kis langlang pas a tamon ra in tur tukum. A tamon ra o God ut i sa nuk tari sur in pami pepetlai, ma i sa pam tari.
11O Abaram, der nam o Sara der sa takano ma o Sara i pobo. Ikut, una nun a nurnur, o Abaram i pet lar pasi sur in ulabo pas tu nutunu, uni i tasmani lena, o God in pam sot pas anun a liliman, ra i sa uliliman tari.
12I mo ra, anun a kabotaro det susut elar nama kum nangnang sapat netes una maino, ma elar kai nama woio taginago una usalin, ra ka din luk lar pasi. Det wanpat kut tagun ara musano ra i takano laulau.
13A taro rop ri det nurnur tuk ra det mat. Ra det laun nin upiso, ka det utur ukai a kum utna ra o God i sa uliliman tar det nami. Det tama i kut tagitiro bakbak, ma det gas pasi. Ma det watungi un det ut lena, det kis na usiro kut, ma det in laun lilik pas kut nin upiso.
14Ra a taro det watungi lenri, i talapor lena, det sisio sur anundet tu tamon.
15Ra gunuk det in nuk melet pas a tamon ra det sa wan gusuni, det in pet lari sur det in milet melet.
16Ikut, anundet a nemnem ut sur a tamon sapat netes una langit, a tamon ra i wakak taun a tamon ra det sa wan pas gusuni. I mo ra o God ke maimai sur det in watungi lena, i anundet a God, uni i sa waninar tar a tamon sur det.
17Una nun a nurnur, o Abaram i pitar tar o nutunu, o Aisak torom o God elar nama etabor, una du bung ra o God i lari. A lingmulus, o God i sa uliliman tari lena, “A kum tumtubum det in nanpat tagun o Aisak.” Ikut, ra o God i inanosi sur in um doko o nutunu, i ara sot kut, elar nama etabor, o Abaram i mulaot ma i waninar sur in pam soti.
19O Abaram i tasmani lena o God in pet lar pasi sur in ukatutur melet pas a kum minat. Ra o Abaram i rakon sikot pas o Aisak melet, i lenutra o God i ukatutur melet pasi gusun a minat.
20Una nun a nurnur, o Aisak i wasiso udan tar o Jekop ma o Iso una kum utna ra kura numur in nanpat.
21Una nun a nurnur, o Jekop, ra milau mo sur in mat, i wasiso udan tar aru nutnutun o Josep. I sukul ukai pasi nam anun in nubuku ma i lotu torom o God.
22Una nun a nurnur, o Josep, ra milau mo sur in mat, i wasiso una inawan pirso anun a taro Israel tagitong o Ijip, ma i inanos tar det sur det in los a kum sursurino ra det in nan.
23Una nunder a nurnur, o taman o Moses ma o nano der munu i a tulu kalang numur tan anun a usus, uni der tama i lena a wakak na nat, ra ka der ngaran a warkurai anun a king.
24Una nun a nurnur, o Moses, ra i sa barman, ke mulaot sur din watungi lena, der ano nama nutun o Pero.
25I pilok pasi sur in taramo a ngunungut tomo nama taro anun o God, ma ke nemi sur in mur a gasgas tagun a kum sakino petutna ra ken suano i.
26I nuki lena, a maimai ra in taramo i una risan o Karisito, i wakak doko taun a kum ululeng tong o Ijip, ra a matano i ka doko, uni i tamtama sur anun a ikul numur.
27Una nun a nurnur, o Moses i katutur tagitong o Ijip, ma ke ngaran a kankan anun a king. I tur dekdek, uni i tama tar o God, i ra ka di tama tari.
28Una nun a nurnur, o Moses i pam a labino bung na lotu na Wanlakai, ra i itula sur din lamir a kum papor matansako nama gap, sur a ensel tagun a um doko a kum mugano nat na musano, gong i um doko a kum mugano nat musano anun a taro Israel.
29Una nundet a nurnur, a taro Israel det wan kutus una Merek na Tasi lenlari ra i sa mamaso. Ikut, ra a taro Ijip det lari sur det in nan lenra, det kongo rop ra det mat.
30Una nurnur anun a taro Israel, in noworo na wat ra i tur talilis a tamon Jeriko i terege pirso, numur tan a wonom mawit na bung ra det talilis in noworo.
31Una nun a nurnur, o Reap, a pamuk na ino ke iru tomo nama taro Jeriko ra det pitarngat torom o God, uni i gas pas aru tene tamtama eno anun a taro Israel.
32Ra asau melet mo an watungi? In suano doko i ra an saksakutna un o Gidion, o Barak, o Samson, o Jepta, o Dewid, o Samuel, ma a kum poropet kai.
33Una nundet a nurnur, a taro ri det waim tomo nama kum king ma det winim rop pas det, det papam nama tokodos na petutna, det los pas a kum utna ra o God i uliliman tar det nami, ra det pam bat a wan a kum laion.
34Det um doko a karangop na sungun, ma det laun sikot gusun a kum totok na inaim. Ka det dekdek, ikut o God i udekdek det, det los a dekdek una inaim ra det lu a kum taro na inaim anun a kum king.
35Una nundet a nurnur, a kum wardain det gas pas a kum kukundet ra det sa laun melet gusun a minat. A ramano taro kai di ukadik laulau det, tuk ra det mat, uni ka det nemi sur det in ipul ru o God sur din palos ru det. Det pami lenra sur det in los a nilaun melet gusun a minat ra i wakak sakit taun a nilaun nin upiso.
36A ramano taro di urongon laulau un det ma di miras det. A ramano taro kai di ker det nama kum sen ma di uruk det una karabus.
37Di duku doko det nama kum watat, di tok kutus det sur a ru kukur, di so doko det nama kum totok na inaim. A ramano taro det emar kut nama pino sipsip ma a pino meme, det dardar doko, di ukadik det ma di ban laulau det.
38A petutna anundet ra det nurnur i wakak taun a petutna anun a taro taginin una rakrakon bual, ra ke sot sur det in laun epotor tandet. Det laun tuptupukus una kum nubual kalako taro uni, ma a kum tangai, ma a kum mato na wat ma a kum tungtung kura una piso.
39Det rop ri, o God i gas nam det ra i wasiso puaso un det lena det wakak, kibino una nundet a nurnur. Ikut, ka det utur ukai asau ra o God i sa uliliman tar det nami,
40uni o God i sa waninar tar ara kisapi sur dat rop, ra i wakak sakit taun a kisapi numugu. Ke nemi sur in utokodos mugu pas det kut sur det in tokodos sakit, awu. I nemi sur in utokodos tomo pas det ma dat.
