Text copied!
CopyCompare
Mbia Cheẽ - Hebreos

Hebreos 2

Help us?
Click on verse(s) to share them!
1Ae nandechandu quia Dios cheẽ nae, ũquɨ̃ ndese nandeɨco ndua tuchɨ. Ɨ̃ nda nandeɨchayã mbeɨ Dios ɨcha sɨ.
2Ae rɨɨ̃ ángeles riqui ñee mbia je cose nae, ñee ñooñoa tuchɨ chõ ñene. Ae ũquɨ̃ ñee mumba nae, mbae rasi que esaã cote ra.
3Jesucristo sɨ́ que ñee nda. —Mbia tamingo beɨ, ɨ que ra. Mbia que echeẽ senei senei mbiasa nande je cote ra. Nande echeẽ mumba mose ra mbae rasi nandesaã tuchɨ nande quiatu cote.
4—Jesucristo ñee ñooñoa ño nguia re, ɨ sacuã mbia que Dios mbia mae sayã naa naa nda. Milagros tubɨrɨã. —Jesucristo ñee ñooñoa ño nguia re, ɨ sacuã mbia que Dios Espíritu Turã mondo mbia je no nda. Ae je Dios Espíritu Turã mondo mondo sete nae, ũquɨ̃ je chõ ngue Espíritu Turã mondo ra.
5Ae ra nandeso emo mose nae, hue jenda rerecua eã nda ángeles.
6Sã embesa ji ñɨ ñee ã no: ¿Mbaerã ereɨco nduate mbia rese re, Dios? ¿Mbaerã ereɨco eraarõ tuchɨ re?
7Angeles que eremingo turã tuchɨ rei mbia sɨ aque mose ra. Ũquɨnde ereɨco beɨ mbia mingo turã tuchɨ ángeles sɨ co cote. Mbia que eremɨɨ mbae abe ja rerecuarã cote no nda. Ndechɨao rerecuarã tuchɨ cote.
8Mbae que eremɨɨ ja mbia mbaerã nda, ɨ embesa ji huɨ̃ ñee a. —Mbae rerecuarã ja ra mbia, ɨ mose Dios, mbae ja rɨɨ̃ ño ñee nguiã. Mbae mbia cheẽ mumbate raque quia ã.
9Jesús mɨɨ ndese chõ nandeɨco nguiã mae ã. Ae je Dios mbae rasi saanguquia tuchɨ nae. Ae que ererecua eã tuchɨ ángeles sɨ aque mose ra. Dios que mbia mingo beɨ sete ra. Nyebe “emano mbia rɨɨ̃” ɨ nguiã Jesús je. Emanonde que Dios emɨɨ mbia rerecuarã tuchɨ cote ra.
10Dios que mbae chao ja tuchɨ umbaerã nda. Nyebe mbae rasi raanguquia tuchɨ nguiã Jesús je cote. Mbia tubɨrɨã mingo beɨ sacuã ño ũquɨ̃ nde. Jesús mbae rasi raã mose, ererecua turã tuchɨ sacuã ño ũquɨ̃ nde.
11Jesús que nandembitirõ uturã na sɨ́ ra. Nyebe eru riqui nguiã nanderu ja co cote. Nyebe Jesús riqui nguiã “senongue” ɨ ɨreɨ̃ ngũíã nande je.
12Sã Jesús cheẽ ñɨ embesa ji rese a no: Paba ibatenda tasenei senongue je. Senongue rese taɨraseɨ raseɨ ee, ɨ que Jesús cheẽ mbesa ji huɨ̃ nda.
13Dios taɨcua tuchɨ, ɨ abe que Jesús cheẽ huɨ̃ nda. A aɨco seriirĩ Dios chɨmondo rese a, ɨ abe que Jesús cheẽ huɨ̃ nda.
14Mbiate quiatu ngue nande re. Nyebe Jesús abe mbiarã no nde. Mano sacuã nande je. Mano mose nande je que diablo quirãcuã mbutiã cote ra. Diablo quiarei equirãcuã tuchɨ aba ɨquia sacuã.
15Ae siquiche beɨte quia umano sɨ nae, mbae ɨcuã nimba raanguia chõ ũquɨ̃ nde. Ũquɨ̃ siquiche eã sacuã ño ngue Jesús mano nguiã.
16Angel sacuã eã ngue Jesús ru ra. Mbiarã ño ngue eru nguiã. Judiorã ño ngue eru nguiã. Mbia mbitirõ sacuã.
17Nyebe Jesús ru nguiã mbiarã nande rã. Ñee turã sacuã Dios je nande rɨɨ̃. Dios nandembasi eã sacuã nandeɨcuã nɨɨ. Jesús siqui mose mbiarã ngue mano mbia ɨcuã nɨɨ nda. Mbia ɨcuã mbutiã sacuã esɨ.
18Mbae ɨcuã ngue tã ɨ tuchɨ rei Jesús je ra. Nyebe ra eriqui tuchɨ nanderese uquirãcuã mee nande je, mbae ɨcuã tã ɨ mose nande je.