Hebërë 2

1

2

3

4

5

6

7

8

9

10

11

12

13

¹Ukaaŋ kë ŋwo biki kamëban bnuura uko wi ŋŧiinkuŋ, kaţi ŋluŋ ŋneem.

²Na manjoonan, uţup wi Naşibaţi aţëpnuŋ ţi ŋwanjuŧ aţup bateem nja uyimani. Ñaaŋ awooŋ aandi pŧiink wa, këme awo aanţaş uko wi ujakuŋ, Naşibaţi akoba kakob kanŧaaŋuŋ na pjuban pi baka.

³Kë hum di di ŋhiluŋ kabuur kakob mënţ woli ŋënji ŋŧiink uţup wi mbuur mnweek wi Ajugun ţi uleeful ajunnuŋ aţup? Banŧiinkuŋ wa badiiman nja kë ujoonani.

⁴Naşibaţi akak afaŋan baka, wi adoluŋ iko iñoŋarënaan na mlagre mnŧum abot ado kë *Uhaaş wi nul uwul bañaaŋ uţen wi wa jibi aŋaluŋ.

⁵Na manjoonan Naşibaţi aando ŋwanjuŧ ŋaşih umundu wi akbiiŋ ppaş wi ŋkţiiniyaanuŋ.

⁶Kë hënk di upiiŧaniiŋ ţi *Ulibra wi nul aji : « Ñaaŋ awo in kë idoo şala? *Abuk ñiinţ awo in kë idoo ţo ptena?

⁷Iwalana ado kë ŋwanjuŧ ŋapela ŋwal ŋntiinku, idola kë awo na mndëm mnweek,

⁸iţu iko bŧi ţi ihoţul uţeeh. » Wi Naşibaţi aţuuŋ iko bŧi ţi ihoţul uţeeh, aanduk nin uko uloŋ. Kë ŋşë wo kakşa ŋëndo bi win hënkuŋ kë iko bŧi iwo ţi ihoţul uţeeh.

⁹Yeŧu i Naşibaţi awalanuŋ ado kë ŋwanjuŧ ŋapela ŋwal ŋntiinku, ŋwina hënkuŋ kë awo na mndëm mnweek ţiki ahaj akeţ. Bnuura bi Naşibaţi bakaaŋ kë akeţ pa bañaaŋ bŧi.

¹⁰Na manjoonan, Naşibaţi andoluŋ iko bŧi kë iwoo, abot aŋal uwo haŋ, abi ŋal pdo bañaaŋ baŧum bawo babukul, baţok ţi mndëm mi nul. Aţëpna ţi mnhaj mi Yeŧu ahajuŋ adola kë abaañëş ulempul ţi mboş, aţij baka mbuur.

¹¹Kë Yeŧu, anjaaŋ ajinţan bañaaŋ ţi këş ki Naşibaţi na biki ajinţanuŋ başë ţok bukal bŧi Aşin baka. Ukaaŋ kë aankowa pdo kadu baka babuk aşin,

¹²aţiini ţi *Ulibra wi Naşibaţi aji : « Dluŋ kaţiiniyaan katimu ţi pŧoof pi bayiţ naan dluŋ kadëmanu ţi kadun ki bañaaŋ baŧum. »

¹³Akak aji : « Nji, dţu mnhaţ mi naan bŧi ţi Naşibaţi. » Akak aji : « Nji wi na bañaaŋ biki Naşibaţi awulnuŋ. »

¹⁴Hënk keeri, kë jibi bañaaŋ mënţ bawooŋ bañaaŋ bajën, hënk di Yeŧu akakuŋ ñaaŋ najën ji baka, ahilna ţi pkeţ pi nul aba na *Unŧaayi Uweek unkaaŋ mnhina mi pkeţ.

¹⁵Bañaaŋ babi wo wo ubida wi baka bŧi ji bakalabuş, wi bakţiiŋ pkeţ. Abuuran baka wi akeţuŋ.

¹⁶Na manjoonan, mënţ ŋwanjuŧ ŋi ŋi akţënkuŋ, aţënk ţënk babuk *Abraham.

¹⁷Kë hënk di awooŋ kakak ñaaŋ najën ji bayiţul, kahilna kawo *naşih i baţeŋan anjaaŋ añaga abot aji do uko wi Naşibaţi ajakuŋ. Akeţ keţ Naşibaţi ahilna amiir ipekadu yi bañaaŋ biki nul.

¹⁸Kë jibi ahajuŋ, kë bawuuka ajuban, hënk di ahiniiŋ kaţënk biki bakwuukuŋ bajuban.