1Ri Jesús e más kꞌo uwach chikiwa ri ángeles; ruma kꞌu riꞌ, lik chirajawaxik e más kojok il che utaqexik ri Utzilaj Tzij qatom chwi Rire, chaꞌ jelaꞌ na kaqesaj ta qibꞌ chirij ri Qꞌijsaq.
2Ma lik jikil uwach Rutzij ri Dios, ri xtzijox ojertan kuma ri ángeles; konoje kꞌu ri xemakun chirij y xkipalajij waꞌ wa Tzij, lik taqal chike janipa ri qꞌatbꞌal tzij xkikꞌulu.
3We ekꞌu xkikꞌulumaj waꞌ rike, ¿suꞌanik kꞌu riꞌ kojkolobꞌetaj riꞌoj we na kojok ta il che wa unimal kolobꞌetajik? Ma nabꞌe na e ri Qanimajawal Jesucristo ri xtzijon puwi wa kolobꞌetajik; tekꞌuchiriꞌ ri xetaw re, lik xkijikibꞌaꞌ kan uwach waꞌ chiqe riꞌoj.
4Ekꞌu ri Dios lik ujikibꞌam kan uwach waꞌ rukꞌ nimaq taq kꞌutubꞌal re ruchuqꞌabꞌ, rukꞌ ukꞌiyal uwach milagros y rukꞌ taq ri toꞌbꞌal yaꞌtal chiqajujunal ruma ri Ruxlabꞌixel ri Dios, yey puqꞌabꞌ kꞌu ri Dios kꞌo wi china chike kuya taq wi waꞌ.
5Puwi kꞌu wa kojtajin che ubꞌiꞌxikil, ri Dios uchꞌobꞌom chik na kuya ta pakiqꞌabꞌ ri ángeles ketaqan chwi ri kꞌakꞌ uwachulew chiqawach apanoq.
6Kꞌo kꞌu jun jewaꞌ xubꞌiꞌij chupa Ruchꞌaꞌtem ri Dios: ¿Saꞌ ruwach rachi chaꞌ Rilal kakuxtaj la? ¿Saꞌ ruwach ri ralkꞌoꞌal ri tikawex chaꞌ lik kok la il chike?
7Xꞌan la che rachi xa jubꞌiqꞌ chi xraj kajunimax uwach kukꞌ ri ángeles. Lik xyak la uqꞌij, xya la che lik kꞌo uwach y xya la puqꞌabꞌ kataqan puwi janipa ri xꞌan la che ruwachulew.
8E taq kꞌu riꞌ ri kꞌolik, xya la ronoje puqꞌabꞌ xchaꞌ. Ronoje kꞌu ri kꞌolik kakꞌojiꞌ puqꞌabꞌ, ma e xraj riꞌ ri Dios; na jinta ne kꞌo xuya kan ri Dios we na kayaꞌiꞌ ta puqꞌabꞌ. Na rukꞌ ta kꞌu riꞌ, kaqilo kꞌamajaꞌ ne kakꞌojiꞌ ronoje puqꞌabꞌ.
9Yey echiriꞌ ri Jesús xuꞌan tikawex, e xqaj uwach uqꞌij chikiwa ri ángeles. Ekꞌu ri Dios ruma ri unimal rutzil ukꞌuꞌx, xuya luwar che ri Jesús xikꞌow chupa ri kamik pakikꞌaxel konoje ri tikawex. Ruma kꞌu wa kꞌaxkꞌobꞌik xrikꞌowibꞌej, woꞌora más kꞌo uwach y más yakom uqꞌij.
10Ri Dios e ꞌanayom re y e chapayom re ronoje ri kꞌolik. Yey lik xajawax kꞌu ri kꞌaxkꞌolil xrikꞌowibꞌej ri Jesús, ri kayaꞌw re ri kolobꞌetajik, ma ruma waꞌ ri Dios xutzꞌaqatisaj uwach ruchak ri Jesús chaꞌ jelaꞌ kebꞌukꞌam bꞌi ukꞌiyal ralkꞌoꞌal ri Dios chilaꞌ chikaj.
11Ri Dios e Uqaw ri Qanimajawal Jesucristo, ri kayaꞌw ri santowilaj bꞌinik; yey e mismo Qaqaw riꞌoj, ri oj kꞌo chi che ri santowilaj bꞌinik. Ruma kꞌu laꞌ, ri Jesús na kakꞌix taj kubꞌiꞌij chiqe riꞌoj, oj uchaqꞌ Rire.
12Ma jewaꞌ kubꞌiꞌij chupa Ruchꞌaꞌtem ri Dios: Kantzijoj ri bꞌiꞌ la chikiwach ri e watz-nuchaqꞌ, Kambꞌixoj ri bꞌiꞌ la chikixoꞌl ri tinamit la echiriꞌ kimolom kibꞌ.
13Je tanchi waꞌ kubꞌiꞌij: Riꞌin lik kankubꞌaꞌ nukꞌuꞌx rukꞌ ri Dios. Yey je tanchi waꞌ kubꞌiꞌij: Riꞌin in kꞌo kukꞌ ri e ralkꞌoꞌal ri Dios, ri ebꞌuyaꞌom Rire chwe kachaꞌ.
14Qonoje ri oj tikawex qeqam qulewal qapoqlajil. Ekꞌu ri Jesús xuꞌan tikawex pachaꞌ riꞌoj, chaꞌ jelaꞌ kikꞌow chupa ri kamik paqakꞌaxel riꞌoj y rukꞌ waꞌ e xuchꞌij uchuqꞌabꞌ ri jun xkꞌojiꞌ uchuqꞌabꞌ re kakamisanik, waꞌ e ritzel winaq.
15Xkꞌun kꞌu ri Cristo chaꞌ kebꞌeresaj lo konoje ri chwi kalaxik loq e kꞌo puqꞌabꞌ ri xiꞌin ibꞌ ruma ri kamik.
16Ma paqatzij wi Rire na xkꞌun ta che kitoꞌik ri ángeles, ma e xkꞌun che qatoꞌik ri oj ralkꞌoꞌal kan ri Abraham.
17Jekꞌulaꞌ lik xajawaxik ri Jesús xuꞌana junam uwach qukꞌ riꞌoj, ri qachaqꞌ qibꞌ rukꞌ Rire, chaꞌ jelaꞌ e kuꞌana Qajawal, ri kuꞌan jusukꞌ ruchak chwach ri Dios, yey rukꞌ kꞌaxnaꞌbꞌal ukꞌuꞌx kachꞌaw paqawiꞌ y ruma kꞌu Rire, ri Dios kukuy ri qamak qonoje ri oj utinamit.
18Ruma kꞌu xikꞌow Rire pa kꞌax y xkꞌam upa, jekꞌulaꞌ woꞌora lik kꞌo uchuqꞌabꞌ re kojutoꞌo echiriꞌ kakꞌam qapa riꞌoj.
