Hibru 2

1

2

3

4

5

6

7

8

9

10

11

12

13

¹Are ge nininakai awa doro wa ine wero awe bayai azu, nakai ge awa ziro tata-tata wanekai.

²Gita angelora bera ge sai zewai wai awa zausepitinoisouta ge awa doinoisou ami ina nuso tapinoisowa awa.

³Are nakai zeme korawai bamubake amira ge azu sanakai Anutu meni ina potai nakai nogo wero dainamunonikai? Nakai dainai ine tepo awa. Nera kota, ge awa angelo osai meni kota, Tua Yesu meni nu nutope gita kereninua. Kereninu dana me nusokare meni niniwa ami namorekai sero tupie dowa ginakai me wenua awa.

⁴Anutu nu nutope ge awa ganakai me waise sero tani putoure eure-taure inoise Ozanara bua eure-taure awa ara tamai nusora nupe kanowenua awa.

⁵Zebu zo ama kei awamunoya amira ge sanekai. Anutu meni zebu awa angelo meni dia warise oko senua.

⁶Ata ema zo meni amira ge kereninua awa ego ewa, Nakare erama awa ne wai asero kotupitinowesi? Ata nakare ema osai awa ne wai asero dia inowesi?

⁷Nakare angelo dubura pei-kaka osai nuanisekare sesa awa. Ni nakare zawitimai ema ine zasimaire zazo bowire meni simusa zawitimai ema ine wenakare awa.

⁸Ago inoise nena dapikaragora mama wanisekare te nasokarera duru potisa awa. Ge gayai ago ine itia awa. Anutu nu nena dapikarago emara duru potamu senua, awa zazaupitinoise kota, zere dago dirienamu senua awa. Ota be zeme awa nena dago emara duru dubu dai awa oko gosinowenakai.

⁹Ata nakai Yesu zasimaire zazo bowire nuawi gosinowenakai awa. Anutura awa-diai itia, are Yesu meni erama dapikarago ami emo betaise sero Anutu meni nu nakai ine wero angelo dubura pei-kaka osai nuaise senua. Ago noise betaira yaya tamunua.

¹⁰Anutu meni zazo bowire nuso emo nena bamubamu dapikarago tamunua. Nu ami Yesu meni mai awiso dainiro uzumai simai zasimaire nusora kei awanisekai sero korawai nasokaira gita wai ema awa nu yaya tamai bua inoma gita wai ema me waise senua awa. Ago senu te wenua awa.

¹¹Yesu meni nakai sewenu Anutura dubu wenakai, nu ata nakai Anutura dubu wenakai awa nakai dapikarago Mama daimata gege awa. Are Yesu meni namorekai namisini naso asamu sero me oko ninua.

¹²Ge nuso ego ine gaewa itewia awa, O Anutu, na zazo bowire niso namisini nasore kereniro tugata-magata wamunona. Na dubura nana soe ena yere gapinoise ni bowi wamunona.

¹³Agoro zo ego ewa, Na dai Anutu tuma didinoise nuamunona. Agoro zo ego ewa, Ei giu! Na ata mai awiso Anutu meni namore potinua, nakare dai nonakare awa.

¹⁴Nakai mai awiso nuso meni tama aisore gege nowenakai, are nune da awa pumunua awa. Betai nuso meni betaira mama Satan amira putou dai tepo waise nu tama aisore pumuro ema wenua.

¹⁵Ema bama betai azu inoise noisowa nukare awa betaira azu wai meni mui wenu be giti itisowa, nukare awa besamu sero ago wenua awa.

¹⁶Nu angelo ine wero angelo oko sorepitinowia. Nu ema wero Abrahamra saisibuna nakai sorepitinowia awa.

¹⁷Are nu namisini nuso ine waise sai awa. Ebata zo oko itisonua. Awa pris bamu kokopai, awa-diaire, sai dimaire, Anutura nana giti mokara zame potai bua inoise ema bama waya nasokai disamu sero ago ine wenua nowia awa.

¹⁸Etetenai nuso nana kei awasara nu nutope yaya tapinoise noisonua, are ema etetenai nasokai nana kei awawi nakai te sorepitinowia awa.