1Irec nâŋâc ma bâtirinʒipeŋte dâŋ manambeŋ i mocwâc paŋʒâic mana sakac enʒepeneŋ.
2Aŋelo mickonec dâŋ mukicne i mupaŋkekicne, eme huhucke â qaqatara fuame okacnehec ejujec,
3izi wemocko bâbâpiaŋ dâŋ fekicne qikiŋnepene okacmâc foocmu? I Wofuŋ e jahac qanaŋ mufuawec, eme hazec fâri‐jeŋiczi manambiŋ jaŋe muwarekupie sanaŋke‐nârewec.
4Ehame Anutu e jahac wâc mâsi â tâpiri wiac ʒâŋe furu bâfuahuc dâŋ i dopeckehuc Tiri Mârore taha biaŋ manawec sâc kâdoc qajarehuc feŋeŋ râecnewec.
5Hae mâreŋ ʒâhec fuaocmu, dâŋne muŋgopeneŋ hâcne, i Anutuzi aŋelo jaŋe guriŋne baniŋte mi muwec.
6Mitiŋic moczi irec dâŋ mutaniŋkewec ine ʒiŋuc: “Go ŋic e wemomac‐ticnere manasucneekic, â ŋicte ɋâric e wemo‐ticnere hone maiŋ ecneekic?
7Go dameŋ ŋondeŋ bembeŋne mac aŋelo jaŋere wahamicnao juocte mucnemeŋ, go tatamac â ʒâŋe biŋezi erickemeŋ,
8ehuc wiac sasawa kike‐ticnere rurumaŋko râemeŋ.” Anutu e wiac sasawa ŋicte rurumaŋko râewec, i bâtâc mi bahuc wiac furu jaha qikiŋnecne‐fârewec ekac. Dameŋ ʒiŋuczia ine wiac ʒeŋgoma ŋicte rurumaŋko guruckekicne i mi honeeŋgopeneŋ.
9Jesu ine honeŋgopeneŋ, e dameŋ ŋondeŋ bembeŋne mac aŋelo jaŋere wahamicne juhuc hâmocte ʒâic manawecte tatamac â ʒâŋe biŋe tahackekicne hâporâ jukac. E Anutuzi aki anonoc enâreocte mume hâmoc hâtâne ŋic sasawa nâŋâcnere erâ manawec hâcne.
10Wiac sasawa irec rune â bâbâfua e naru motecfâcne bocjaha eri tatamac‐ticnao jowac‐jopaocte manasuhuc bâbâpiaŋ‐jeŋicte micne bapa e ʒâic serereŋ gie baku mao fisiocte mucnewec i sâcke‐hâmowec.
11Eme maŋfuru bacjopakac e mecne â furu bacjopakicne jaŋe mecne Mamac‐jeŋic mocjaha, irec ɋafâc‐nane mujareocte maname mi quŋkeekac.
12Dâŋticne ʒiŋuc hâcne fokac: “No ʒâŋe biŋege ɋafâc‐nane muromacke‐jarepe, kikefuŋ guruo ʒeri mumuteŋ egarepe.”
13Erâ moc ʒiŋuc: “No erao roweckehuc jupemu.” Erâ moc ʒiŋuc: “Ʒi no erâ Anutuzi ɋie guru narewec nâŋe mâmâc juŋgopeneŋ.”
14Eme ɋie jaŋe sahac biuchec sasawa jueŋgopieŋte eki ijaha wâc rowec. I e jahacne hâmoczi hâmoc rune Sataŋ hâcne tâpiri‐ticne qame goroŋkewecte,
15erâ wâc hâmocte hâhâwiczi niŋgiŋ‐jopame dameŋ‐jeŋic sâc kâpâcwâru ficko ŋejumbieŋ jaŋe batarac‐jopaocte iŋuc ewec.
16Wiac i aŋelo kime dopec mi ejareekac i, e Abrahamte ɋâricfâc nâŋâc kime dopec enâreekac.
17Eme irec hâcne ɋafâc‐ticne jaŋehec sâc mocjaha jâmbâŋ eocte mucnekicne, hatane gâcne moc mi fowec. I taha bapa sâko urucne â hazec hâricne erâ Anuture maio taha gie bahuc ŋic ŋokac nâŋâcne sâqocne ʒure tâmireocte iŋuc ewec jukac hâcne.
18E jahac ʒâic manahuc eesâicko raʒiwecte ŋic eesâic fua‐nâreha sâcne bafic‐nâpoekac.
