1Egiptod̶eba ẽdrʌped̶ad̶acarea jed̶eco ab̶a babʌrʌd̶e israelerãra Eliʌ̃ abadad̶eba ẽjũã põãsa ewaraga b̶ʌ Siʌ̃ abadad̶aa wãsid̶aa. Siʌ̃ra Eliʌ̃ idjab̶a Sinai eya ẽsi b̶ʌa.
2Maʌ̃ ẽjũã põãsa ewaraga b̶ʌd̶e cod̶i neẽ́ b̶ʌ bẽrã jũma israelerãba Moisera, Aaroʌ̃ sid̶a biẽ́ jarasid̶aa.
3Quĩrũbid̶eba ãdjirãba Moisea, Aaroʌ̃a bid̶a nãwã jarasid̶aa: –Biara b̶acasia Ãcõrẽba dairãra idu Egipto druad̶e beubid̶abara. Jãma dairãra necai ne co duanabadjid̶aa. Nedjarada, paʌ̃ sid̶a ad̶uba eropanasid̶aa. Baribʌrʌ bãrãba dairãra naʌ̃ ẽjũã põãsa ewaraga b̶ʌmaa jarrababa quenani carea enesid̶aa.–
4Maʌ̃ne Ãcõrẽba Moisea jarasia: –Mʌ̃a cue bajãneba zebibari quĩrãca paʌ̃da bajãneba zebiya israelerãba cod̶amãrẽã. Nãwã mʌ̃a cawaya ãdjirãba jũma mʌ̃a jara b̶ʌra ĩjã pananida wa ĩjã pananaẽ́da: diaped̶aza ãdjirãba ara maʌ̃ ewarid̶e cod̶ira jʌrʌ ped̶e wãnida panʌa. Ewari juesuma mãwã od̶ida panʌa.
5Baribʌrʌ seibema ewarid̶e diaped̶ed̶a jʌrʌ ped̶ida panʌa ara maʌ̃ ewarid̶e cod̶ira idjab̶a nurẽma cod̶i sid̶a.–
6Maʌ̃be Moiseba Aaroʌ̃ ume israelerãa jarasid̶aa: –¿Daira mãwãra cai, bãrãba mãwã daidrʌ biẽ́ jarad̶i carea? Bãrãba daida biẽ́ jara panʌẽ́a; Ãcõrẽdrʌ biẽ́ jara panʌa. Idjia maʌ̃ra ũrĩ b̶ʌa. Maʌ̃ carea nane quewara idjia bãrãa cawabiya idjiabʌrʌ bãrãra Egiptod̶eba nama ẽdrʌ enesida. Idjab̶a nu diaped̶a bãrãba ununia idjia ne ununaca waib̶ʌada obʌrʌda. Nane quewara idjia nedjarada diaya idjab̶a nu diaped̶a paʌ̃da ad̶uba diaya bãrãra jãwũã ne cod̶amãrẽã.–
9Maʌ̃be Moiseba Aaroʌ̃a jarasia: –Israelerãba ne cod̶i carea quĩrũbid̶eba biẽ́ jara panʌ bẽrã ãdjirãa jaradua jũmaena Ãcõrẽ quĩrãpita ãbaa dji jʌred̶ida panʌda.–
10Aaroʌ̃ba israelerãa mãwã jara b̶ʌd̶e jũmarãba ẽjũã põãsa ewaraga b̶ʌd̶aa acʌsid̶aa. Maʌ̃ne jʌ̃rãrã ãdji na jira b̶ʌd̶e Ãcõrẽ quĩrãwãrẽã dorrodorroada unusid̶aa.
11Maʌ̃be Ãcõrẽba Moisea nãwã jarasia:
12–Mʌ̃a ũrĩ b̶ʌa israelerãba quĩrũbid̶eba biẽ́ jara panʌda. Maʌ̃ bẽrã ãdjirãa jaradua: “Nane queubod̶od̶e bãrãba nedjarada cod̶ia. Nu diaped̶a paʌ̃da jãwũã cod̶ia. Maʌ̃neba cawad̶ia mʌ̃ra bãrã Ãcõrẽda.”–
13Quewara israelerã duanʌma põrãba birasia. Maʌ̃ awara diaped̶ed̶a cũrãsaba ẽjũãra b̶eguea nũmesia.
14Ẽjũã põãsabʌrʌd̶e nãũcha torroa qued̶eada odjacuaped̶a ecasia.
15Maʌ̃ unusid̶ad̶e israelerãba cawaẽ́ panasid̶aa cãrẽda mãwã b̶ʌda. Maʌ̃ bẽrã ãdjidub̶a iwid̶i duanasid̶aa: –¿Jãʌ̃ra cãrẽ?– Maʌ̃ne Moiseba ãdjirãa jarasia: –Jãʌ̃ra Ãcõrẽba dia b̶ʌ paʌ̃a. Idjia dia b̶ʌa dadjirãba cod̶amãrẽã.
16Ãcõrẽba nãwã obi b̶ʌa: jãʌ̃ paʌ̃ra dadjirãba dadji diguid̶abemarã itea jʌrʌ ped̶ida panʌa ara dadjia ewari ab̶aʌd̶e cobada quĩrãca. Ãdjiza eped̶eco jũgurua ab̶a eded̶ida panʌa.–
17Ara maʌ̃da israelerãba ãdji diguid̶abemarãba cobada quĩrãca jʌrʌ pesid̶aa. Ʌ̃cʌrʌba waitabeara jʌrʌ pesid̶aa idjab̶a ʌ̃cʌrʌba maãrĩara jʌrʌ pesid̶aa. Maʌ̃be ãdji diguid̶abemarã itea eped̶eco jũguruad̶e zasid̶aa. Dji waitabeara jʌrʌ ped̶aba ad̶uba erob̶aẽ́ basía idjab̶a dji maãrĩara jʌrʌ ped̶aba cʌrebaeẽ́ basía.
19Maʌ̃be Moiseba ãdjirãa jarasia: –Ni ab̶aʌba nurẽmabema carea wagaiẽ́ b̶ʌa.–
20Baribʌrʌ Moiseba jarad̶ara ʌ̃cʌrʌba ĩjãnaẽ́ basía. Ãdjirãba waga b̶ʌsid̶aa nurẽma cod̶i carea. Baribʌrʌ ãdjia waga b̶ʌped̶ad̶ara oregueaped̶a qui barasia. Ĩjãnaẽ́ panʌ carea Moisera ãdjirã ume quĩrũsia.
21Nurẽmaza maʌ̃ paʌ̃ra jʌrʌ pebadjid̶aa ãdji diguid̶abemarãba ewari ab̶aʌd̶e cobada quĩrãca daucha. Diaped̶ed̶a jʌrʌ pebadjid̶aa besea jʌ̃wʌ̃rʌ̃ãba maʌ̃ paʌ̃ra dorrab̶ariped̶a nẽbabadji bẽrã.
22Seibema ewarid̶e ãdjirãba ewari umé carea jʌrʌ pesid̶aa. Ãdji diguid̶abemarã itea eped̶eco jũgurua umé edasid̶aa. Maʌ̃be israelerã bororãba Moisea jarad̶e wãsid̶aa ãdjia arid̶e osid̶ada.
23Maʌ̃ne Moiseba ãdjirãa jarasia: –Ara maʌ̃ quĩrãca Ãcõrẽba obi b̶ʌa. Ãcõrẽba jarasia: “Nubema ewarira bãrã ʌ̃nãũbada ewaria. Mʌ̃ itea maʌ̃ ewarira bãrãba wagad̶ida panʌa. Ʌ̃nãũbada ewarid̶e bãrãra ne djud̶iẽ́ panʌ bẽrã, nane od̶adua bãrãba nu co quĩrĩã panʌ quĩrãca. Ne djud̶ibʌrʌ nane ne djud̶adua. Ãbud̶ibʌrʌ nane ãbud̶adua. Maʌ̃gʌra nubema carea waga b̶ʌd̶adua.”–
24Moiseba jarad̶a quĩrãca israelerãba jũma od̶aped̶a waga b̶ʌsid̶aa nurẽma cod̶i carea. Nurẽma maʌ̃ djico waga b̶ʌped̶ad̶ara oregueaẽ́ b̶asia idjab̶a qui neẽ́ b̶asia.
25Maʌ̃ne Moiseba israelerãa jarasia: –Bãrãba waga b̶ʌped̶ad̶a djicora id̶i cod̶adua ʌ̃nãũbada ewari bẽrã. Naʌ̃ ewarira Ãcõrẽ itea wagad̶ida panʌa. Maʌ̃ bẽrã id̶ira Ãcõrẽba dia b̶ʌ paʌ̃ra neẽ́ baya.
26Domiaza sei ewarid̶e bãrãba paʌ̃ra jʌrʌ ped̶ida panʌa. Baribʌrʌ sietebema ewarid̶era neẽ́ baya, Ãcõrẽba maʌ̃ ewarira bãrã ʌ̃nãũnamãrẽã b̶ʌd̶a bẽrã.–
27Moiseba mãwã jarad̶amĩna ʌ̃cʌrʌra maʌ̃ ʌ̃nãũbada ewarid̶e Ãcõrẽba dia b̶ʌ paʌ̃ra jʌrʌ ped̶e wãsid̶aa. Mãwãmĩna ununaẽ́ basía.
28Maʌ̃ carea Ãcõrẽba Moisea jarasia: –¿Ab̶a sãʌ̃be israelerãba mʌ̃a jara b̶ʌra ĩjãnaẽ́ panani?
29Bio cawad̶adua mʌ̃abʌrʌ bãrãa ʌ̃nãũbada ewarida diasida. Maʌ̃ carea domiaza seibema ewarid̶e paʌ̃ra ewari umébema carea diabaria. Baribʌrʌ sietebema ewarid̶e bãrãra diguid̶a ʌ̃nãũnida panʌa. Maʌ̃ ewarid̶e mʌ̃a dia b̶ʌ paʌ̃ra jʌrʌ ped̶e wãniẽ́ panʌa.–
30Maʌ̃ bẽrã israelerãra sietebema ewarid̶e ʌ̃nãũbadjid̶aa.
31Ãcõrẽba dia b̶ʌ paʌ̃ra israelerãba trʌ̃ b̶ʌsid̶aa “maná.” Culãdrʌ ta quĩrãca pichia querasia. Torroa b̶asia idjab̶a cũã b̶asia urrajõnaa od̶a quĩrãca.
32Maʌ̃be Moiseba israelerãa jarasia: –Ãcõrẽba nãwã jarasia: “Manára eped̶eco jũgurua ab̶a zad̶aped̶a waga b̶ʌd̶adua bãrã warrarãneba yõbʌdarãba ununamãrẽã. Mãwã ãdjirãba cawad̶ia mʌ̃a bãrã Egiptod̶eba ẽdrʌ enesid̶e cãrẽda naʌ̃ ẽjũã põãsa ewaraga b̶ʌd̶e cobisida.”–
33Maʌ̃be Moiseba Aaroʌ̃a jarasia: –Manára eped̶eco jũgurua ab̶a zaped̶a zocod̶e wagadua. Maʌ̃ra Ãcõrẽ quĩrãpita b̶ʌdua. Jãma waga eropanania dadji warrarãneba yõbʌdarãba ununamãrẽã.–
34Ara maʌ̃da Aaroʌ̃ba manáda zaped̶a waga b̶ʌsia Ãcõrẽba Moisea jarad̶a quĩrãca. (Nocoarebema ewarid̶e maʌ̃ manára Ãcõrẽ bauruded̶e waga b̶ʌsid̶aa.)
35Israelerãba manáda cuarenta poa cosid̶aa Canaaʌ̃ druad̶e jũẽbʌdamisa. Canaaʌ̃ druad̶e jũẽsid̶ad̶e manára waa cod̶aẽ́ basía maʌ̃ druad̶ebemarãba uped̶ad̶ada baraad̶a bẽrã.
36(Ãdji eped̶eco jũgurua ab̶a ẽberã ab̶aʌba ewari ab̶aʌd̶e cobari quĩrãca daucha poya b̶ʌa.)
