1Idjab̶a Bezaleelba animarã babue diabadada acacia bacurud̶eda osia. Dji drasoara bicaca juesuma osia. Dji joub̶ʌa sid̶a bicaca juesuma osia dji quĩrã quĩmãrẽena ab̶arica b̶amãrẽã. Dji ʌ̃tʌara bicaca ũbea osia.
2Ab̶ari bacurud̶e iquid̶aza cachu quĩrãca oped̶a maʌ̃ animarã babue diabadara bronceba jũma bʌrasia.
3Idjab̶a tʌbʌ pora ãyã cuabadada, tʌbʌ pora tãĩbadada, oa piabadada, warebada mĩãsuda, tʌbʌdau edebada sid̶a jũma bronced̶eda osia. Ab̶ed̶a ne jũma Ãcõrẽa animarã babue diabadad̶ebemada bronced̶eda osia.
4Idjab̶a jʌrrʌjʌrrʌa bronced̶eda osia. Maʌ̃ jʌrrʌjʌrrʌara animarã babue diabadad̶e dji id̶eba ed̶aa ẽsidra cara b̶ʌsia.
5Maʌ̃be pĩrũ omoa bronced̶eda quĩmãrẽ od̶aped̶a jʌrrʌjʌrrʌa b̶ʌmaa animarã babue diabada iquid̶aza cara b̶ʌsia maʌ̃ne ed̶a bacuruda berajuped̶a jira eded̶i carea.
6Acacia bacuruda eraped̶a bronceba bʌrasia.
7Maʌ̃ bacurura animarã babue diabada orroza pĩrũ b̶ead̶e berajusia jira eded̶i carea. Maʌ̃ animarã babue diabadara wãyã uria b̶asia. Bacuru ʌrrad̶a basía.
8Idjab̶a Bezaleelba ne sʌgʌbada eped̶eco waib̶ʌada dji acʌ b̶ʌbada bara bronced̶eda osia. Ãcõrẽ wua ded̶e ed̶a wãbadama ne obada wẽrãrãba ãdji bronce od̶a quĩrã acʌbadara diasid̶aa maʌ̃ra omãrẽã.
9Idjab̶a Bezaleelba Ãcõrẽ wua dera aud̶u jũrã b̶ʌsia dji biara b̶ʌ lino wuaba. Maʌ̃ aud̶u jũrã b̶ʌ orroza veinte bronce od̶a uria b̶eada b̶ʌcuaped̶a bacuru tẽnara maʌ̃ne ed̶a wẽãju nũmʌsia. Maʌ̃ bacuru quẽbʌra parataba bʌrasia idjab̶a wua jũẽbari parata od̶a sid̶a cara b̶ʌsia. Lino wuara maʌ̃ne eatʌ jũẽcuasia. Ãcõrẽ wua de aud̶u jũrã b̶ʌ drasoara cien bicaca b̶asia.
12Jẽdaare bid̶a bronce od̶a uria b̶eada die b̶ʌcuaped̶a bacuru tẽnara maʌ̃ne ed̶a wẽãju nũmʌsia. Maʌ̃ bacuru quẽbʌra parataba bʌrasia idjab̶a parata od̶a wua jũẽbari sid̶a cara b̶ʌsia. Maʌ̃ne wuara eatʌ jũẽcuasia. Ãcõrẽ wua de aud̶u jũrã b̶ʌ jẽdaarebemara cincuenta bicaca b̶asia idjab̶a ʌ̃mãdau b̶aebariare b̶asia.
13Dji nocoarebemara ʌ̃mãdau odjabariare b̶asia. Maʌ̃ sid̶a cincuenta bicaca b̶asia.
14Maʌ̃ne dji ed̶a wãbadara ẽsidra osia. Dji ed̶a wãbada jʌwa acʌare bronce od̶a uria b̶eada ũbea b̶ʌped̶a bacuru tẽnara maʌ̃ne ed̶a wẽãju nũmʌsia. Jʌwa araare bid̶a ab̶ari quĩrãca osia. Maʌ̃ne lino wuara eatʌ jũẽcuasia. Dji ed̶a wãbada orro ab̶aare wuara quince bicaca b̶asia idjab̶a dewarabema orroare bid̶a quince bicaca b̶asia.
16Jũma Ãcõrẽ wua de aud̶u jũrã b̶ʌra dji biara b̶ʌ lino wua basía.
17Dji bacuru tẽnara Bezaleelba bronce od̶a uria b̶ead̶e ed̶a wẽãju nũmʌsia. Bacuru quẽbʌza parataba bʌrasia idjab̶a parata od̶a wua jũẽbarida cara b̶ʌsia.
18Idjab̶a Ãcõrẽ wua de aud̶u jũrã b̶ʌd̶e ed̶a wãbadara osia. Bronce od̶a uria b̶eada quĩmãrẽ dji ed̶a wãbadama b̶ʌped̶a maʌ̃ne ed̶a bacuru tẽnara wẽãju nũmʌsia. Maʌ̃ bacuru quẽbʌra parataba bʌrasia idjab̶a parata od̶a wua jũẽbari sid̶a cara b̶ʌsia. Maʌ̃be dji biara b̶ʌ lino wuada edad̶aped̶a maʌ̃ wuad̶e ed̶a oveja cara nayãna pãwãrã od̶ada, pursupursua od̶ada, purea od̶a sid̶a biya casía. Maʌ̃ wuaba dji ed̶a wãbadara jũãtrʌ b̶ʌsia. Maʌ̃ wua jũãtrʌ jira b̶ʌ drasoara veinte bicaca b̶asia. Dji joub̶ʌara bicaca juesuma b̶asia. Jũma Ãcõrẽ wua de aud̶u jũrã b̶ʌ eatʌ jira b̶ʌ wuara ara maʌ̃ joub̶ʌad̶e b̶easia.
20Jũma Ãcõrẽ wua de egorod̶e cachid̶i careabemara, maʌ̃ de aud̶u jũrã b̶ʌ egorod̶e cachid̶i careabema sid̶a bronce od̶a basía.
21Uri warra Bezaleelba ne jũma Ãcõrẽba Moisea obi jarad̶ara osia. Idjira Judad̶eba yõna Hur wiuzaque basía. Ahisamá warra Aholiába idjira carebabadjia. Aholiára Daʌ̃neba yõna basía. Idjia ne jũmada biya o cawa b̶asia idjab̶a dji biara b̶ʌ lino wuad̶e ed̶a oveja cara nayãna pãwãrã od̶ada, pursupursua od̶ada, purea od̶a sid̶a ca cawa b̶asia. Maʌ̃ de oped̶ad̶acarea Ãcõrẽ baurudeda ed̶a wagabadjid̶aa. Israelerãba maʌ̃ wua de od̶i carea diaped̶ad̶ara levitarãba juachasid̶aa Moiseba jarad̶a quĩrãca. Dji juacha panʌ borora sacerdote Aaroʌ̃ warra Itamar basía.
24Ãdjia Ãcõrẽa diaped̶ad̶a oro zʌgʌara jũma ãbaa 2,000 libra aud̶u b̶asia Ãcõrẽ ded̶e zabada quĩrãca. Maʌ̃gʌba Ãcõrẽ wua ded̶e orod̶ebema oida b̶ad̶ara jũma osid̶aa.
25Israeld̶ebema umaquĩrãrã veinte poad̶eba ʌ̃taa b̶eada juachasid̶ad̶e 603,550 panasid̶aa. Juachasid̶ad̶e ãdjirãza sei gramo paratada diasid̶aa Ãcõrẽ ded̶e zabada quĩrãca. Jũma ãbaa ãdjia diaped̶ad̶a parata zʌgʌara 7,550 libra b̶asia.
27Maʌ̃ paratad̶ebemada 7,500 libra edaped̶a Bezaleelba parata od̶a uria b̶eada 100 ocuasia maʌ̃ne ed̶a Ãcõrẽ wua de bacuru ʌrrad̶ara ʌ̃ta wẽãju pẽi carea idjab̶a Ãcõrẽ wua dejãnebema bacuru tẽnara ʌ̃ta wẽãju nũmʌi carea. Maʌ̃ bacurud̶e dji ed̶aarebema wuara eatʌ jira b̶ʌsia. Parata od̶a uria b̶eaza dji zʌgʌara 75 libra b̶asia.
28Parata od̶a uria b̶ea od̶acarea israelerãba diaped̶ad̶a parata ad̶ubad̶ada 50 libra b̶asia. Maʌ̃ra edaped̶a wua jũẽbari b̶eada ocuasia idjab̶a bacuru tẽna quẽbʌra jũma bʌracuasia.
29Israelerãba Ãcõrẽa diaped̶ad̶a bronce zʌgʌara jũma ãbaa 5,300 libra b̶asia.
30Maʌ̃ bronce edaped̶a Bezaleelba bronce od̶a uria b̶eada ocuasia Ãcõrẽ wua ded̶e ed̶a wãbadama bacuru tẽnara ʌ̃ta wẽãju nũmʌi carea, Ãcõrẽ wua de aud̶u jũrã b̶ʌ bacuru tẽnara ʌ̃ta wẽãju nũmʌi carea, idjab̶a dji aud̶u jũrã b̶ʌd̶e ed̶a wãbadama bacuru tẽnara ʌ̃ta wẽãju nũmʌi carea. Idjab̶a maʌ̃ bronceba idjia osia animarã babue diabadada dji jʌrrʌjʌrrʌa bara idjab̶a jũma maʌ̃ animarã babue diabadad̶ebema sid̶a. Idjab̶a maʌ̃ bronceba idjia osia jũma Ãcõrẽ wua dera egorod̶aa erreb̶ari cachid̶i careabemara, maʌ̃ de aud̶u jũrã b̶ʌra egorod̶aa erreb̶ari cachid̶i careabema sid̶a.
