1A keva i rua, a parava i ravulu a polona i lima i polo na tahuna ri pea pali e Egipto, ngane e huriki a Israel ri pea e Elim. Ri vano ri bele na tabeke i ngeki ne Sin, na koropalane Elim e Sinai.
2Na tahuna ri made na tabeke i ngeki, ri deke ne Moses e Aron.
3Ri ta maea, “I kamumu hateka mi gi mate na limane BAKOVI DAGI o Egipto! Na tahuna mi made vonga mi kani a kinani legelege, mi maru. Pali marua muru tamitala valai mia koea, muru ngaru mia lobo mi gi mate na vitoloa na tabeke i ngeki.”
4Muri e BAKOVI DAGI i takia e Moses, “Iau ga vakaboru valai na hunu a bret. Mu bole, mu kani. Na parava takutaku e huriki ri gi vano ri gi leba. Ga toni ria vona a naro iea, ri gi longototo a nitagu, o ge uka.
5Na polotarana parava ri gi leba ne vona a parava ge rua.”
6Lakea e Moses e Aron ru gale palupu e huriki a Israel ru ta maea, “Na malunga bara mu lohoka vona e BAKOVI DAGI, ra i bole tala mua o Egipto,
7bara mu masia a nipara vona na hatelanga, a vuhuna mu deke hateka vona. Ra maria, maria a bakovi tavula, pali i navai mu deke valai ne maria?”
8E Moses i ta tabu i ta maea, “Na malunga e BAKOVI DAGI ge habi a kania ne mua, na hatelanga ge habi a bret ne mua, a vuhuna i longoa pali a nideke ne mua. Ra maria, maria e rei muholi? Ra mua, i uka ma mu deke ne maria, mu deke ne BAKOVI DAGI.”
9Muri e Moses i takia e Aron, “O taki e huriki ri gi valai tabukoi ne BAKOVI DAGI, a vuhuna i longoa pali a nideke ne ria.”
10Na tahuna e Aron i ta, e huriki a Israel ri mata lokovonga na tabeke i ngeki ri masia a nipara ne BAKOVI DAGI i parai a bubu.
11Lakea e BAKOVI DAGI i takia e Moses,
12“A longoa pali a nideke ne huriki a Israel. O vano o taki ria, na malunga bara ri kani a kania, na hatelanga bara ri kani a bret. Muri bara ri lohoka vona, iau kunana e BAKOVI DAGI, a Vure ne ria.”
13Na malunga a maka kadirovo ri bebe valai ri toka viliha na mada. Na hatelanga a simuru i vakamea a dahana mada.
14Na tahuna a simuru i malaharere, a maka maki i keakea ri tabuli viliha na tabeke i ngeki.
15Na tahuna e huriki a Israel ri matai a maki nga, ri vanana, “A ra maki nga?” Lakea e Moses i taki ria, “Ra maki nga a bret, e BAKOVI DAGI i habi mu gu kani.
16E BAKOVI DAGI i vakuku maea, ‘A bakovi ge tahoni na ningaru vona a bret ge kani a kabu vona, a ulo kiroko na bret ge taku ne vona a viri ala taku, ge vakanakana e huriki ri made na kape vona.’”
17E huriki a Israel ri rata manga a hini i taki. Ri bole kupo hateka ranga, ri bole popote ranga.
18Pali muri ri veru kamumu a bret. E huriki ri poi i kupo, ri kani, pali i uka kalavana ge tabuli mule. E huriki ri poi i popote, ri kani, ri maru. E huriki lobo ri poi, i kara ria.
19Muri e Moses i taki ria, “Naha ni ru mule ranga bret mu gu kani kuduvi.”
20Pali e huriki ranga i uka ma ri longo mai a nitane Moses, lakea ri ru here ranga bret ne vona a hini kuduvi. Na hatelanga, a maka bret ri mavuru, i pidi ne ria a mata kiroko. Lakea e Moses i tahate ria.
21Na hatelanga lobo e huriki ri bole a bret na ningaru ne ria. A bakovi i taku i tahoni vona a bret na ulo kiroko i taku. Na tahuna a haro i hera a maka bret, ri malaharere tavula.
22Na polotarana parava ri bole kadolu a bret ne vona a parava i rua. A bakovi i taku i tahoni na ulo kiroko i rua a bret vona. E huriki a matakari ne Israel ri vakalongo e Moses vona a maki ri rata.
23Muri e Moses i taki ria, “Kuduvi, a Parava Nimalo, ni gamai ne BAKOVI DAGI. A maki ni kani mu ngaru ni gutu o nono, mu gutu mu nono ngane. A maki ni kani ranga ri tababana, ngi ranga mu ru ne vona a hini kuduvi.”
24Ri ramai a nitane Moses, ri gutu a maki ni kani, ri ru kamumu ranga ne vona a parava muri. Ra maki ni kani nga i uka ma ri mavuru, ge pidi ne ria a mata kiroko.
25Na parava muri e Moses i taki ria, “Mu kani a maki mu kani kaleva ravi. Mona a Parava Nimalo ne BAKOVI DAGI, i uka ma mu gu matavisi na malala ranga bret.
26Na parava i polotara mu bole a bret, pali na poloruana parava, a Parava Nimalo, a bret i uka ma ge boru valai na hunu.
27Pali ranga e huriki ri vano ta ri gi bole a bret, pali i uka ma ri matavisi.
28Lakea e BAKOVI DAGI i takia e Moses, “Balaka riva mu marikoi ni longo a nitagu, mu gu ramai a vinara nau?
29Mu longo kamumu, iau e BAKOVI DAGI a habia ne mua a Parava Nimalo. A rata mavonga, a vuhuna na polotarana parava a habi a maki ni kani ne vona a parava i rua. Na poloruana parava mua lobo mu gu made na kape ne mua. Nahea tara viri ge laho viliha.”
30Lakea e huriki ri malo vona a poloruana parava.
31E huriki a Israel ri galea a bret iea a mana. Ra maki iea i keakea i manga a kanena kai tara. I nami manga a bisket ni kani turana a ame.
32Muri e Moses i taki ria, “E BAKOVI DAGI i taki mua mu gu bolea a ulo kiroko, mu gu tahoni a mana vona, ge tabuli ni gi vakatungu e huriki a hamone mua vona. Muri ma, bara ri masia a bret e Bakovi Dagi i habia ne mua, na tahuna i vakamariu tala mua o Egipto, i tuli valai mua koea.”
33Muri e Moses i takia e Aron, “O bolea tara ulo kiroko o tahoni vona a mana. O ru na ngalane BAKOVI DAGI, muri ma e huriki a hamone hita bara ri masia.”
34Lakea e Aron i bolea a ulo kiroko i tahoni ranga mana, i ru tabukoia na tava ni ru a vinara na Vure vona. I ramaia a ngava e BAKOVI DAGI i takia e Moses vona.
35E huriki a Israel ri kani kunana a mana na pida i ravulu va, i harena na tahuna ri bele na nagi na malala kamumu e Kenan.
36(Na tahuna iea ri tahoka a ulo ni matai a mavana maki vona. I tara i manga a ulo kiroko. I tara i manga a ulo kiroko i ravulu ni ru vapopo.)
