1Maʌ̃be Ãcõrẽba Moisea jarasia: –Aaroʌ̃da, Nadáda, Abiuda, idjab̶a setenta israelerã bororã sid̶a bʌ ume naʌ̃ eyad̶e ʌ̃taa enedua. Ãdjirãra tʌmʌ chĩrãborod̶e b̶arru copanenaped̶a mʌ̃́a bia bed̶ead̶ida panʌa.
2Ãdjirãra mʌ̃ caita zecara panʌa. Ab̶abe bʌdrʌ mʌ̃ caita zeida b̶ʌa. Maʌ̃ awara ni ab̶aʌda bʌ ume naʌ̃ eyad̶e ʌ̃taa zecara b̶ʌa.–
3Maʌ̃be Moisera israelerãmaa ed̶aa zeped̶a Ãcõrẽ leyra jũma nẽbʌrʌsia. Maʌ̃ne jũma israelerãba ab̶ari quĩrãca nãwã jarasid̶aa: –Dairãba Ãcõrẽ leyra jũma ĩjã od̶ia.–
4Ara maʌ̃da Moiseba Ãcõrẽ leyra jũma b̶ʌsia. Nurẽma diaped̶ed̶a pirab̶ariped̶a Moiseba animarã babue diabadada Sinai eya carra osia. Maʌ̃ awara animarã babue diabada caita idjia mõgara waib̶ʌada doce ʌ̃ta nũmʌcuasia. Maʌ̃ doce mõgaraba jara b̶ʌa Israel warrarãneba doce puru yõped̶ad̶ada.
5Maʌ̃be Moiseba cũdrarãda diabuesia paca zaquerãda Ãcõrẽa babue diacuad̶amãrẽã idjab̶a Ãcõrẽ ume necai b̶ai careabema paca zaquerãda bea diacuad̶amãrẽã.
6Maʌ̃ paca zaque oa piaped̶ad̶ada ẽsadra Moiseba eped̶ecod̶e wea edasia. Dji ẽsadra b̶ed̶ada animarã babue diabada ʌ̃rʌ̃ jĩãposia.
7Maʌ̃be Ãcõrẽ leyra edaped̶a Moiseba israelerã quĩrãpita jĩgua lesia. Maʌ̃ ũrĩnaped̶a israelerãba jarasid̶aa: –Ãcõrẽ leyra dairãba jũma ĩjã od̶ia.–
8Maʌ̃be Moiseba eped̶ecod̶e wea erob̶ʌ oada edaped̶a israelerã ʌ̃rʌ̃ jĩãpo b̶ʌd̶e nãwã jarasia: –Naʌ̃ oaba jara b̶ʌa Ãcõrẽba dadjirã ume bed̶ea b̶ʌd̶ara dadjirãba, idjia bid̶a jũma od̶ida.–
9Mãwãnacarea Moisera, Aaroʌ̃ra, Nadára, Abiura, idjab̶a setenta israelerã bororã sid̶a Sinai eyad̶e ʌ̃taa wãsid̶aa.
10Maʌ̃ne israelerã Ãcõrẽda unusid̶aa. Idji jĩrũ edrera zapiro mõgara od̶a quĩrãca b̶asia. Bajã quĩrãca ẽsã pãwãrã b̶asia.
11Israelerã bororãba Ãcõrẽra unusid̶amĩna Ãcõrẽba ãdjirãra beubiẽ́ basía. Ãcõrẽ quĩrãpita ne cosid̶aa idjab̶a baido dosid̶aa.
12Mãwãnacarea Ãcõrẽba Moisea jarasia: –Sinai eyad̶e mʌ̃maa ʌ̃taa zeped̶a jʌ̃ã b̶edua. Mʌ̃a mõgara pewed̶ea b̶ʌda umé diaya. Maʌ̃ mõgarad̶e mʌ̃a ĩjã obi b̶ʌ bed̶eada b̶ʌ́ erob̶ʌa israelerãa jaradia b̶amãrẽã.–
13Ara maʌ̃da Moisera idji carebabari Josue ume Sinai eyad̶e ʌ̃taa wãsid̶aa Ãcõrẽ b̶ʌmaa.
14Wãni naẽna Moiseba israelerã bororãa jarasia: –Nama pananadua ab̶a dai zebʌdad̶aa. Aaroʌ̃ra, Hur sid̶a bãrã ume panania. Bariduaba nẽbʌrada oibʌrʌ, ãdjimaa wãnida panʌa maʌ̃ nẽbʌra cawa od̶amãrẽã.–
15Moise Sinai eyad̶e ʌ̃taa wãsid̶e jʌ̃rãrãba maʌ̃ eyara ãnã edasia.
16Maʌ̃ne Ãcõrẽ quĩrãwãrẽã dorrodorroara Sinai eya ʌ̃rʌ̃ zesia. Dji jewed̶ad̶eba israelerãba Ãcõrẽ quĩrãwãrẽã dorrodorroara maʌ̃ eya borod̶e tʌbʌ eradrʌ nũmʌ quĩrãca unusid̶aa. Jʌ̃rãrãba Sinai eyara sei ewari ãnã erob̶asia. Sietebema ewarid̶e Ãcõrẽba maʌ̃ jʌ̃rãrãneba Moisera trʌ̃sia.
18Ara maʌ̃da Moisera eyad̶e ʌ̃taara wãsia jʌ̃rãrãne ed̶a. Mama b̶esia cuarenta ewari ãsa diamasi bid̶a.
