ESAII 10:18-31

¹⁸Mù bo cɔ́útɛ́ bɛ túúkù sɑ̀ɑ̀kù kumɔu nɛ̀ dɛtie ndɛmɔu dɛ̀ɛ̀ pɛí titebiiti, kɛ̀ dɛ̀ɛ dontɛnɛ̀ mumɔmmú pĩ nwè kɛ cĩ́ɛ̃̀ koò kuɔ̀.

¹⁹Dɛtie ndɛ̀ɛ̀ bo nkpɑɑ́ Asidii kó kutúúkù miɛkɛ, dɛ yiè bɑ́ dɛbíbɛ́nnɛ̀ dɛ̀ bo nɑ kɛ́ dɛ̀ kɑ̀ɑ.

²⁰Dɛ kó diyiè Isidɑyɛɛribɛ bɛ̀ɛ̀ bo nkpɑɑ́, Sɑkɔbu yɑɑ̀bí ìì bo yentɛ́ bɛ̀ bo yóu bɛ̀ bo nwɑɑ̀mmɛ̀ mɛteèmmɛ̀ wèè do bɛ̀ puotì o borɛ̀, kɛ́wɑmmú mɛteèmmɛ̀ ti Yiɛ̀ nKuyie mborɛ̀ nɛ̀ bɛ yɛ̀mmɛ̀ mɛmɔu kunku kùù dò mpɑ́í pɑ́í, bɛmbɛ Isidɑyɛɛribɛ bɛ̀ tũ̀ nkù, kɛ́ nkù tɑ̃́.

²¹Sɑkɔbu yɑɑ̀bí Isidɑyɛɛribɛ bɛ̀ɛ̀ bo nkpɑɑ́ bɛ̀ bo wɛ̃tɛní Kuyie nkperíkù borɛ̀.

²²Bɑ́ kɛ̀ Sɑkɔbu kó kuwuɔ ndɔ́ kùu sṹṹ nkɛ́mɑɑtɛnɛ̀ dɑ̀mɛ́ɛ̀rì pɛɛ́mmɛ̀ kó mubirímú, bɛ̀ɛ̀ bo nkpɑɑ́ bɛ̀ í yó nsũ bɛ̀ɛ̀ yóó wɛ̃tɛní mí mbɛ Yiɛ̀ nKuyie m borɛ̀. N tɑ̃ɑ̃tɛ́ kɛ bo bɛ̀ kùɔ̀mu. Bɛ̀ dɛ mmɑnnɛ̀.

²³Mí mbɛ Yiɛ̀ nKuyie Mpɑkɛdɑɑ n tɑ̃ɑ̃tɛ́mu kɛ bo bɛ̀ kuɔ, kɛ yóó mɛ dɔ̀ɔ̀ dihɛì dimɔu.

²⁴Dɛɛ̀ kpɛ́í nte kɛ̀ mí ndi Yiɛ̀ nKuyie Mpɑkɛdɑɑ kɛ̀ n nɑ̀ɑ́ nkɛ tú: Díndi n nìtìbɛ̀ bɛ̀ɛ̀ bo Siyɔ̃ɔ̃ di bɑ́ nyĩɛ̃̀kù Asidii kɔbɛ, bɑ́ kɛ̀ bɛ̀ di puotì kupɑ̀ɑ̀ti, kɛ yuo didùrì di ĩ́nkɛ̀ Esibiti kɔbɛ do dì yùomɛ̀ di ĩ́nkɛ̀.

²⁵Dɛ̀ kpɑɑ́ sɑ́m̀pɔ́ nwe m miɛkɛ tɛ̃́nkɛ í yó ndi pɛ́ì, m miɛkɛ doti Asidii kɔbɛ mbɛ kɛ̀ m bo bɛ̀ kùɔ.

²⁶Ti Yiɛ̀ nKuyie Mpɑkɛdɑɑ yóó ɑ̃nnɛ́ tɛɑ̃̀tɛ̀ ntɛ Asidii kɔbɛ, kù do dɔ̀ɔ̀mɛ̀ Mɑndiyɑ̃ɑ̃ ɛì kɔbɛ Odɛbu kó dipèrì borɛ̀. Ti Yiɛ̀ nKuyie nyùo ku pɑ̀ɑ̀ti nku dɑ̀mɛ́ɛ̀rì ĩ́nkɛ̀ kù do dɔ̀ɔ̀mɛ̀ Esibiti kɔbɛ.

²⁷Dɛ yiè ndi kù yóó dɛitɛmɛ̀ ditɔu bɛ̀ di buú ndì, kɛ́sɑɑtɛ kunɑɑ̀dɔ̀dɔ̀rìdɔú di fɔ̃̀níí. Kɛ̀ mɛborimɛɛ di nɑrikɛ.

²⁸Kɛ̀ Asidii kɔbɛɛ do Ayɑti kó dihɛì, kɛ́pɛ̃ɛ̃tɛ́ kɛ́séntɛ́ Nikidonni kɛ́yóu bɛ nɛntì Mikimɑsi,

²⁹kɛ́sɔɔtɛ́ bɛ cemmu kɛ́séntɛ́ kutɑ̃fuɔ, kɛ́tuɔkɛ Kebɑɑ kɛ́yié, kɛ̀ kufɔ̃wɑɑ́ mpĩ́ Dɑmɑɑ ɛì kɔbɛ kɛ̀ bɛ̀ nkpeutí, kɛ̀ Kibeɑ Sɑuri ɛì kɔbɛ cokɛ́.

³⁰Kɑdimmu ɛì kɔbɛ tiitɛ́nɛ̀ yɛdɑbùò. Diɑsɑ kɔbɛ kéntɛ́nɛ̀! Anɑtɔti ɛì kɔbɛ di kpɛrɛ dò mmɛsémmɛ̀ mmɛ.

³¹Mɑdimɛnɑ ɛì kɔbɛ cokɛ́mu, kɛ̀ Kebimmu ɛì kɔbɛ wɑmmú disɔ̀rì.