Deuteronomy 16

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

¹“Ngu’um liyorgad ngak SOMOL ni Got romed mi gimed madnomnag e Paluk’af ko pul ni Abib, ya reb e nep ko re pul nem e fekmed riy nga wuru’ yu Egypt.

²Mmarod ko ta’gin’en ni tagil’ e liyor mi gimed li’ u rom reb fapi saf ara garbaw romed ni fan ko damunmun ko Paluk’af ni liyor romed ngak SOMOL ni Got romed.

³Dab mu ked e flowa ni kan lith ni bay e is riy u nap’an e abich romed ko Paluk’af, medlip e rran ni ngam ked e flowa ni kan lith ni aray rogon, bod ni um rin’ed fa ngiyal’ ni mu chuwgad u Egypt ni aram feni gur. Mu ked e re flowa ney — ni bay u nog fithingan ni flowa ko pi’in nra gafgowgad — ya gubin e rran u lane yafos romed ma ngi i yib ngan’med e rofen ni mu chuwgad u Egypt, ni fare nam ni um gafgowgad riy.

⁴U lan medlip e rran e dariy be’ u lan e binaw romed ni nge par e is u lan e naun rok; ma ufin e gamanman ni kan li’ ni blayal’ ko re rran ni som’on e thingar ni kay e re nep nem.

⁵“Thingri dab mu pi’ed e maligach ni fan ko Paluk’af u lan reb fapi binaw ni pi’ SOMOL ni Got romed ngomed;

⁶ya kemus ni ta’gin’en ni tagil’ e liyor ni turguy SOMOL ni Got romed, e aram e gin ni ngan pi’ riy fare maligach ko Paluk’af, aray ko blayal’ nike yan e yal’ nga but’, ni aram e ngiyal’ i n’en ni mu chuwgad u Egypt.

⁷Mu dulnguyed e ufin ngam ked ko ta’gin’en ni tagil’ e liyor; me kadbul riy mi gimed sul nga tafenmed.

⁸Ma nel’ ni migid e rran e ngu’um ked e flowa ndariy e is riy, ma rofen ni medlip ngay e ngam mu’ulunggad ngam liyorgad ngak SOMOL ni Got romed, ma dariy ba maruwel ni gimed ra ngongliy e rofen nem.

⁹“Nap’an ni gimed ra tabab i t’ar wom’ngin e woldug romed ni grain mi gimed the’eg nge gamen medlip e wik,

¹⁰ma aram e ngam madnom niged fare Madnom ko T’ar Wom’ngin e Woldug, ni ngam tedfan SOMOL ni Got romed, ni ngam feked i yib ngak e maligach ni gimed e ka mu leam niged ni ngam pi’ed ni bang ko tin ke fal’eg wa’athmed riy.

¹¹Mu felfelan’ gad u p’eowchen SOMOL ni Got romed, ni gimed nge pifakmed, nge pi tapigpig, nge pi Levite, nge milekag, nge pi’in kanim’ rorad, nge pi’in ke yim’ figirngirad ni yad ma par u lan fa yoch i binaw romed. Mu rin’ed ni aray rogon ko fa ta’gin’en ni tagil’ e liyor.

¹²Ngi i par u wun’med ni ngu’um folgad ko pin’en ni kan ta’chiylen; dab mu paged talin ni um sibgad u lan yu Egypt.

¹³“Nap’an ni gimed ra mu’ i n’ag keru’ urngin e grain romed ma kam mu’gad i uduy urngin e grape romed, mi gimed tay fare Madnom ko Nochi Naun ni medlip e rran.

¹⁴Mi gimed felfelan’ u ta’bang, ni gimed nge pifakmed, nge pi tapigpig romed, nge pi Levi, nge girdi’ nu boch e nam, nge pi’in kanim’ rorad, nge pi’in ke yim’ figirngirad ni yad ma par u lan e yochi binaw romed.

¹⁵Mathangeluwol naged SOMOL ni Got romed ko re mur ney ni ngam ted ni medlip e rran ko ta’gin’en ni tagil’ e liyor. Nge felfelan’med, ya SOMOL e ke fal’eg wa’athmed ko wom’ngin e woldug nge maruwel ni gimed be tay.

¹⁶“Urngin e pumo’on u lan e nam romed ma ngarbad ko fa ta’gin’en ni tagil’ e liyor, ngar liyorgad ngak SOMOL ni dalip yay u reb e duw ko Madnom ni Paluk’af, Madnom ko T’ar Wom’ngin e Woldug, nge Madnom ko Nochi Naun. Ra reb e pumo’on ma nge fek ba tow’ath i yib

¹⁷nrogon nrayag rok, nib m’ag nga rogon nike fal’eg SOMOL ni Got romed wa’athan.

¹⁸“Mmel’eged boch e girdi’ ngar manged pi tapuf oloboch nge boch ni nge mang tolang u gubin e binaw nike pi’ SOMOL ni Got romed ngomed. Pi pumo’on ney e ngu’ur pithiged e yu pa’ i oloboch u puluwon e girdi’ ni rogon nib mat’aw.

¹⁹Dab ur puf olobochgad nde mat’aw rogon, fa ur folgad ngak boch e girdi’. Ma dab ur feked puluwon e sasalap, ya mus ngak e pi’in yad ba gonop ma yad ba yul’yul’ ni maning e tow’ath owcherad, nma k’aringrad ngar turguyed bogi ban’en nde mat’aw rogon.

²⁰Gubin ngiyal’ ni ngu’um pired nib ta’reb rogon e girdi’ u wun’med ma gimed ba yul’yul’, ya nge yag ni mu tafned fare nam ni bayi pi’ SOMOL ni Got romed ngomed ma ngki yag ni ngu’um pired riy i yan ngaram.

²¹“Nap’an ni gimed ra toy ba altar ni fan ngak SOMOL ni Got romed, ma dab mu ted nga charen, ba ren ni kan toy ni pow ko fare got ni bpin ni Asherah.

²²Ma dab mu n’ufed ngalang ba gaf i malang ni ngu’um tedfan; ya ba fanenikay SOMOL e tinem.