Vinara 16

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

¹E Moses i ta tabu i ta maea, “Na keva e Abib na pida lobo mu ratea a Habu na Nipagepolo, mu kavurikea a rane BAKOVI DAGI a Vure ne hita. A vuhuna hosi na rodo tara na keva iea i bole tala mua o Egipto.

²Mu lakea vona a murina ni vasileki e BAKOVI DAGI ge vakasiri mua vona, mu rabalakia tara bulmakau o tara sipsip, ge a nihabi ne BAKOVI DAGI a Vure ne mua. Mu kania a sipsip a bulmakau iea ne vona ni luhoi mule a parava na Nipagepolo.

³Na tahuna mu ratea a habu iea, naha ni kania a bret i tahoka a is. Na parava ge polorua mu kani kunana a bret i uka is, a vuhuna hosi mu papahari mu kani a bret i uka is, mu ha tala o Egipto. Mu kania a bret iea ne vona ni luhoi mule a parava mu pe e Egipto mu valai. Mu luhoi vakaroroa ra maki iea ge harena na tahuna mu mate vona.

⁴Na parava nga i polorua naha ni ru a is na ruma ne mua. Na mugana parava mu kania a sipsip a bulmakau na nihabi, mu kani lobo liu na rodo, naha ni kani kaleva ranga ge tabuli, ge palala taho a hini.

⁵“Na tahuna mu rabalaki a sipsip a bulmakau mu gu kania mu gu luhoia a parava na Nipagepolo, naha ni rabalakia pololilo na tanga e BAKOVI DAGI i habia ne mua.

⁶Mu rabalakia na murina ni vasileki, mu rata a nihabi na Nipagepolo lakea vona. Mu rabalakia na tahuna a haro i rolo, a vuhuna mu pe e Egipto na tahuna a haro i rolo.

⁷Mu gutua mu kania na murina ni vasileki, na hatelanga mu hamule na tanga ne mua.

⁸Na parava ge polotara kunana mu kani kunana a bret i uka is. Na poloruana parava mu vapopo, mu vasileki ne BAKOVI DAGI a Vure ne mua. Na parava iea naha ni rata a leho.

⁹“Na tahuna mu vakatubu ni mirio a vit na hania, mu vakatubu ni gi a vik ge polorua.

¹⁰Mu vulakia a nilobona parava na poloruana vik, ge a Habu na Nimirio ni kavurike e BAKOVI DAGI a Vure ne hita, mu kavurikea na hini i habi a maka maki ni kani ne mua. Na ningaru ne mua kunana mu bole ranga, mu habi ne BAKOVI DAGI ge a nihabi, ge manga a hini i gamai mua.

¹¹Mu lakea na tabeke ni vasileki, na matane BAKOVI DAGI mu kavurike ia vonga. Mua turane huriki e tune mua, a vora bakovi a vora ngatavine, e huriki a kabu ne Levi, e huriki a mosi, e huriki a tuna duku, e huriki a havuri, e huriki lobo ri made na tanga ne mua, mua lobo mu pitei palupu.

¹²Mu luhoi mulea a tahuna mu leho manga a vorakato o Egipto, i mavonga mu ramai kamumu lobo a maka vinara.

¹³“Muri ne mua mu vila vuroki a maka vinina vit, mu pahabebe pali a maka vutuna vain, mu ratea a Habu na Kape na parava ge polorua.

¹⁴Mua turana e huriki e tune mua, e huriki a vora bakovi a vora ngatavine, e huriki a kabu ne Levi, e huriki a mosi, e huriki a tuna duku, e huriki a havuri, e huriki lobo ri made na tanga ne mua, mu kani mu vivi.

¹⁵Mu lakea vona a tabeke ni vasileki, mu kavurikea e BAKOVI DAGI a Vure ne mua. Mu luhoia e BAKOVI DAGI i gamai a maka hania, a maka leho ne mua ri bele kamumu, bara mu vivi hateka.

¹⁶“Na parava ge tolu na pida lobo e huriki a bakovi lobo ne mua ri gi valai na matane BAKOVI DAGI na tabeke ni vasileki. Ra parava ni vasileki i tolu ra nga: A Habu Na Bret I Uka Is, a Habu na Nimirio, a Habu na Kape. Mua o huriki a bakovi takutaku naha ni laho pa mu gu valai ne BAKOVI DAGI.

¹⁷Mu bole valai a nihabi. Mu luhoia a Vure i habi a maka maki kamumu i kupo ne mua, mu koli, mu bole ranga mu habi mule vona.”

¹⁸“Na kabu takutaku ne mua, mu vulaki ranga mari ni pelekado a maregoa, i ranga ge a bolekori na maka tanga e BAKOVI DAGI a Vure ne mua ge habi ne mua. Re huriki nga ri gi pelekado kamumu a maregoa ne huriki na naro malamala kunana.

¹⁹Nahea ri gi tami e huriki, nahea ri gi tuhori ranga e huriki, nahea ri gi pahadanu ranga e huriki. Nahea tara viri ge habi tavula a moni ne ria, a vuhuna a maki ni habi tavula ne vona ni vakaviliha a niluhoi ne huriki a bakovi malamala, ne huriki ri tahoka a niluhoi kamumu, i uka ma ri gi pelekado kamumu a ngava.

²⁰Mu rata vakaroro a ngava muholi, mu ramai a naro malamala, lakea bara mu made kamumu, mu bolea a malala e BAKOVI DAGI a Vure ne mua ge habia ne mua.

²¹“Na tahuna mu rata a dede ne BAKOVI DAGI a Vure ne hita, naha ni varo tabukoi vona ranga kai, ge ne vona a vure ngatavine e Asera.

²²Naha ni vonu a butu-kedo ne vona mu gu vasileki vona. Ra naro maea i hale hateka na matane BAKOVI DAGI a Vure ne mua.”