1“Tomuren nike thang SOMOL ni Got romed owchen e girdi’ ko fare binaw ni nge pi’ ngomed, nge tomuren ni kam koled fapi binaw rorad nge naun kam pired riy,
2mi gimed ki’eg fa gin ke milsuwon ngomed ni dalip guruy, ra ba guruy ma bay reb e binaw riy nib mom ni yira thap ngay. Ya nge demturug be’ ni thang reb e pogofan nrayag ni mil nga reb ma dabi buch ban’en rok.
4Fa’anra chey nim kal riy ngam thang e fan rok be’ ni gathi to’ogor rom, mra yag ni mmil nga reb fapi binaw nge dabi buch ban’en rom.
5Bod nra yan l’agruw i pumo’on ngalan e loway ndimow ren, ma be toy bagyow bake gek’iy nga but’ me thay e tow rok u kolngin nge aw ngak fa en yow nge yim’. Ma aram e rayag ni mil ngalan reb fa dalip i binaw nge dabi buch ban’en rok.
6Fa’anra kemus ni ta’reb e mit i binaw ney ni bay, ma aram e yug ra palog rok boch e girdi’. Ma en girdi’en fa en ke riya’ ni ir e nge falbiyen, e richey me kol fa’anem nge thang e fan rok u fithik’ e damumuw, ni cha’nem e de kireb e rok. Ya aram rogon ni fare pogofan ni thang, e ban’en ni kal riy, ya da immoy e kireb u thilrow fa’anem nike yim’.
7Irera’ fan ni gu be yog ngomed ni dabisiy ni ngam dugliyed dalip e binaw.
8“Ma fa’anra ga’nag SOMOL ni Got romed fa gin ke milsuwon ngomed, ni bod nike yog ngak e pi ga’ romed ni kakrom nra rin’; me pi’ urngin yang fapi binaw ngomed nike micheg,
9ma aram e ngkum mel’egged dalip e binaw. (Ra pi’ e re but’ ney ngomed ni fa’an gimed ra rin’ urngin e tin kug taychilen ngomed e daba’ ni fa’anra ba t’uf SOMOL ni Got romed ma gimed be par ni gimed be fol ko tin ke machibnag.)
10Mu rin’ed e ran’ey, ya nge dab i y’im be’ ni bfel’ e rok ma dabi kireb e romed ko mthang pogofan ni gimed be tay u daken e re but’ ney ni nge pi’ SOMOL ngomed.
11“Machane fa’anra kari leamnag be’ nib mo’on ni nge thang e pogofan rok e en to’ogor rok, me pach ngi i sonnag nge li’, nge maad’ad nib gel me yim’ facha’, me mil ngalan reb fapi binaw.
12Ma aram e pi tayugang’ ko binaw rok facha’ nike cham e ngar mal’oggad ngan yan ni fek facha’ u rom, ngan pi’ ngak fa en ni nge falbiyen, ya ngan li’ ngem’.
13Dab nrunguy. Ngan chuweg u Israel e re tathang pogofan ney, ya ngu’um pired ni bfel’ urngin ban’en romed.
14“Dab mmithmitheged e mathil u thilmed e en ni gimed bbuguliyoror, ntay ni kab kakrom u lan fare nam ni SOMOL ni Got romed e nge pi’ ngomed.
15“Ta’reb e girdi’ ni nge mang mich e de gaman ni nge micheg be’ nike ngongliy ba pa’ i oloboch, ra nge lich ma l’agruw e girdi’ ni ngar mangew mich, ni ngar michegew nib kireb e rok be’ u ba pa’ i oloboch.
16Ra t’ar be’ e thin nga daken be’ ni be guy rogon ni nge gafgow fa’anem,
17ma yow l’agruw ni ngarbow ra sak’iygow ko fa ta’gin’en tagil’ e liyor, nge pufthin nagrow e pi prist nge pi tapuf oloboch.
18Pi tapuf oloboch e thingara firtiyed fare pa’ i oloboch ma fa’anra ke t’ar fa’anem e thin,
19ma aram e ngan gechignag ni bod rogon ni leamnag ni nge aw ngak fa en ni t’ar e thin nga daken. Aray kanawo’en me chuw e biney e kireb ko nam romed.
20Ma gubin e girdi’ ni bay rrung’aged e n’en ni kan rin’ miyad rus miyad kol’ayuw, ma aram e dabki rin’ be’ e binem e kireb.
21Mitney e oloboch ni dariy e marnguy riy; e gechig riy e puluwon reb e pogofan e reb e pogofan, ma puluwon reb e lan mit e reb e lan mit, ma puluwon reb e nguwol e reb e nguwol, ma puluwon reb e pa’ef e reb e pa’ef, ma puluwon reb e rifrifen ey e reb e rifrifen ey.
