Bisisu 5:6-25

⁶Sia:maga (Anade egefe) amola Ya:iele da esalea, dunu amola ga:mele amola bidi lasu dunu da Isala:ili sogega hame misi. Ilia da logo fonobahadi la:ididili asi.

⁷Debola! Isala:ili moilai gilisisu da dunu hame esalebe agoane ba:i. Amalalu, di da misi. Di da Isala:ili fi ilia ame defele misi dagoi.

⁸Isala:ili dunu da gaheabolo ogogosu ‘gode’ liligi ilima fa:no bobogebeba:le, gegesu bagade ilia soge ganodini ba:i. Isala:ili dunu 40,000 agoane gilisi amo ganodini, lobo danoma:ne gala:su goge agei amola da:igene gaga:su liligi hame ba:i.

⁹Na da Isala:ili ouligisu dunu ilima bagade asigisa. Amola dunu da mae hihini hahawane fidimusa: misi, na da ilima bagade asigisa. Hina Godema nodoma!

¹⁰Dilia! Dunu da ahea:iya:i dougi amoga fila heda:su dunu! Amo sia: olelema! Amola dili emoga fawane ahoasu dunu! Dilia sia:ma!

¹¹Nabima! Dunu bagohame da gu hano amogai gilisili wele sia:nana. Ilia da Hina Gode Ea hasalasu hou amola Isala:ili dunu ilia hasalasu hou olelesa. Amalalu, Hina Gode Ea fi dunu da ilia moilai fisili, mogodigili gudu sa:i.

¹²Debola! Bisima! Bisima! Gesami hea:ma! Bisima! Bela:ge, Abinoa:me egefe di! Ba:le gaidi godiwane masa! Dia ha lai dunu di afugili lai, amo oule masa!

¹³Amalalu, fa:no noga:le bobogesu dunu da ilia ouligisu dunuma gagadomusa: gudu sa:i. Ilia da gegemusa: momagele, Hina Godema gilisi.

¹⁴Ilia da Ifala:ime soge fisili, fagoa gudu misi. Ilia da Bediamini fi dunu ilima fa:no bobogei. Dadi gagui ouligisu dunu da Ma:igie soge fisili misi. Amola, ilia fidisu ouligisu dunu da Sebiula:ne sogega misi.

¹⁵Isaga fi ouligisu dunu da Debola amo sigi misi. Dafawane! Isaga fi da misi dagoi. Bela:ge da misiba:le, ilia da ema fa:no bobogele, fagoa gudu doaga:i. Be Liubene fi dunu da afafai. Ilia da misunu o hame misunu, hame dawa:i galu.

¹⁶Ilia da abuliba:le mae misini, sibi ouligima:ne ouesalula:? Ilia abuliba:le, sibi ouligisu dunu sibima wele sia:su amo nabima:ne, ouesalula:? Ma! Liubene fi da afafai dagoi ba:i. Ilia da misunu o hame misunu, hame dawa:i galu.

¹⁷Ga:de fi dunu da Yodane Hano eso mabe la:ididili esalebe ba:i. Da:ne fi dunu da ilia dusagai ouligima:ne esalebe ba:i. A:sie fi dunu da hano bagade bega: ouesalebe ba:i.

¹⁸Be Sebiula:ne fi dunu amola Na:fadalai dunu da bogosa:besa:le mae dawa:le, gegesu amoga gilisi.

¹⁹Hina bagade dunu da Da:ina:ge moilai bai bagade, Megido Hano bega: dialu, amoga gegemusa: misi. Ga:ina:ne hina bagade dunu da gegei, be hame hasalasiba:le, silifa noga:i liligi hame gaguli asi.

²⁰Fedege sia: agoane, gasumuni da muagado asili, amoga gegei. Ilia da hina bagade Sisela ema gegei.

²¹Gaisione Hano da filigala:le neda:le, amo dunu huluane mini asili, gaguli asi. Na da gasawane mogodigili masunu!

²²Amalalu, hosi da hehenane misini, osoboga ha:giwane osa:i.

²³Hina Gode Ea a:igele dunu da amane sia:sa, “Milose soge amo aligima:ne gagabuma. Dunu huluane amogawi esala, amo aligima:ne gagabuma. Ilia da Hina Godemagale gegemusa: hame misi.”

²⁴Hibe (Ginaide dunu) amo ea uda da hahawane bagade. E da uda huluane abula diasu amo ganodini esalebe uda, amo ilia hahawane hou baligisa.

²⁵Sisela da ema hano edegei. Be e da dodo maga:me ema i. E da gebo sefe gugu, yaeya noga:iwane amo ganodini sali, gaguli misini ema i.