Soukapwüng 5:6-25

⁶Lon ränin Samkar nöün Anat we mwän, lon ränin Jael ekewe mwichen aramas me man mi sai resap chüen sai, nge ekewe chon sai ra fetal won al mi chökis.

⁷Ekewe sop lon Israel ra pön, ewer, ra pön tori en Tepora ka ütä, ka ütä pwe kopwe eman inelap lon Israel.

⁸Lupwen chon Israel ra filätä ekewe kot mi fö, maun a tolong lon fanüer. Ifa usun, a wor ren faik ngeröü sounfiun Israel tittin maun ika siles?

⁹Lelukei a pwapwa ren ekewe meilapen Israel, pwal ren ekewe aramas mi fangala inisir ren mochenin letiper. Sipwe mwareiti ewe Samol mi Lapalap.

¹⁰Ämi mi wawa aas mi pwechepwech, ämi mi mot lon planket mi fokun mürina, pwal ämi mi fetal won al, oupwe köl.

¹¹Oupwe aüseling tikin musik arun ekewe chönüttu. Ikenan ra kakapasen mwareiti än ewe Samol mi Lapalap föför mi pwüng, an pwora me win lon ekewe sop lon Israel. Mürin, nöün ewe Samol mi Lapalap aramas ra karisitiu ngeni asamalapen ar kewe telinimw.

¹²Kopwe pwätä, kopwe pwätä en Tepora. Kopwe pwätä, kopwe pwätä o chietä echö köl. Kopwe ütä, en Parak nöün Apinoam we mwän, kopwe emwenala noum kewe chon oola.

¹³Ekewe lusun aramas tekia ra karisitiu, nöün ewe Samol mi Lapalap aramas ra karisitiu rei pwe repwe maun ngeni ekewe chon pwora.

¹⁴Ra feitiu seni ewe fanü Efraim, ir chokewe mi nonom lon fanüen chon Amalek, nge chon ewe ainangen Peniamin ra tapweto müriir. Iwe, ekewe meilap ra karisitiu seni Makir, nge chokewe mi nemenem ra karisitiu seni Sepulon.

¹⁵Ekewe samol seni chon ewe ainangen Isakar ra eti Tepora. Ewer, chon ewe ainangen Isakar ra eti Parak. Ra sätiu mürin lon ewe lemol. Nge chon ewe ainangen Rupen ra kakapasfengen usun met repwe föri.

¹⁶Pwota oua chök nonom lon ekewe lenien sip pwe oupwe rongorong tikin aangün fän iten ekewe pwiin sip? Ewer, chon ewe ainangen Rupen ra kakapasfengen usun met repwe föri.

¹⁷Chon ewe ainangen Kat ra chök nonom peliötiuen ewe chanpupu Jortan. Nge pwota chon ewe ainangen Tan ra chök nonom ren ekewe sip? Pwal chon ewe ainangen Aser ra chök nonom aroset lon ekewe lenien ilen sip.

¹⁸Nge ekewe aramasen Sepulon me Naftali ra fangala manauer lon feiengauen mäla lon ekewe lenien wiirasen maun mi tekia.

¹⁹Ekewe king ra feito o maun. Ekewe kingen Kanaan ra maun me lon Taanak arun ekewe kolukun Mekito. Nge esap wor liaper silifer.

²⁰Ekewe fün läng ra maun, ekewe fü mi mwökütfeil ra maun ngeni Sisera.

²¹Pupun ewe chanpupu Kison a opurela, pupun ewe chanpupu Kison mi pumong. Üpwe kakaris fän pöchökül.

²²Mürin, chopuchopun pechen ekewe oris ra chopumong ren ar sässä, pokiten chon wawa ra süsüla.

²³‘Oupwe anümamaua chon ewe telinimw Meros,’ nöün ewe Samol mi Lapalap chon läng a apasa. ‘Oupwe fokun anümamaueer, pun resap feito pwe repwe alisi ewe Samol mi Lapalap le maun ngeni ekewe chon pwora.’

²⁴Iwe, epwe fokun feiöch Jael pwülüen Heper ewe re Ken, epwe fokun feiöch me lein ekewe fefin mi imweimw lon imw mangaku.

²⁵Sisera a tüngor seni koluk, nge neminewe a ngeni milik, a uwato ren soon milik lon eu sepien samol.