2YOHANA 1

1

¹Lupwilili luno lolawa ha Yohana, m'vyele. Nomwandikila mtwanzi yasaguligwe na Mulungu hamoja na wanage, awo iniwanogele kweli kweli, na sio nie tu, ila vivija wose woitanga ikweli,

²sama ya kweli ikala mgati yetu na yowa na tweye milongo yose.

³Ngekewa, bazi, na tindiwalo kulawa ha Mulungu Tata na kulawa ha Yesu Kilisto vowa hamoja na tweye muikweli na mdinoge.

⁴Nideng'ha ng'hani viniwavikile wanago wayagwe wotembela muikweli kamba vija Tata viyatulagize.

⁵Na sambi, gweye mtwanzi, sikwandikila ndagizi ya sambi, ila ija itukalile nayo songela haichanduso. Na tuinogele.

⁶Na dino dijo noge, kamba, tolondigwa tukale mkuzigoga ndagizi za Mulungu. Kamba vumuhulike songela haichanduso kamba, muinogele wenyego kwa wenyego.

⁷Wavwizi bwando weza muulumwengu, awo wolema kutogola kamba Yesu Kilisto keza mulukuli. Munhu yoyose yolema kutogola mbuli kamba zino hiyo m'vwizi na m'beza Kilisto.

⁸Teganyeni sambimchase kija kimsang'hanikile, ila m'bokele nhunza yenu yose.

⁹Munhu yoyose yokimbilila kuulongozi na kuleka kukala mmafundo ga Kilisto hali hamoja na Mulungu. Munhu yoyose yokala mmafundo ka hamoja na wose wabili, Tata na Mwana.

¹⁰Munhu yoyose yeheza kumwenu na kuleka kufundiza mafundo gano, sambimum'bokele ama kumwingiza mzing'anda zenu.

¹¹Kwavija munhu yoyose yom'bokela, kosangila msang'hano zake zihile.

¹²Nnago bwando ga kuwandikileni, ila silonda nyandike na wino mkalatasi, ila nolonda niwatembelele na kulongelela na mweye kihanga kwa kihanga avo deng'ho jetu divikizwe.

¹³Wana wa lumbu jenu yasaguligwe na Mulungu wowalamsa.