1Ina bonggik susuek! Susulak ia neme au mai, Yohanis, mana dadik malangga nggalei. Au sulak susulak ia, fee ina, fo Manetualain hele nalan so, dadik Ndia hataholin, ma fee ina ana nala. Au sue ei basa nggei, fo dale mala nanambaꞌak no dedeꞌa ndoos. Basa hataholi feꞌe kala fo mana bubuluk dedeꞌa ndoos boe oo, sue ei.
2Ai sue ei, huu dedeꞌa ndoos nana selek nai ita dale nala. Ma dei fo dedeꞌa ndoos nasoda nakandondoo henin nai ita dalek.
3Au hule-haladoi oke fo Manetualain, ma Ndia Anan, Yesus Karistus, latudu Sila dale malolen, ma lamemeda kasian neu ita, suek ita tasoda to sodak ma mole, tasoda tasueao, ma nanambaꞌak nakandoo henin no dedeꞌa ndoos sala.
4Au amahoko alan seli, neu ledoeik au atonggo ua ina anan luma, ma au ita sala lasoda neulalau, tungga dala ndoos, sama leo Amak Manetualain palendan neu ita so.
5Ina bonggik susuek! Hatematak ia au oke fo ita basa nggata tasoda tasueao. Au okek ndia, na palenda beuk taa ndia, tehuu kada au asanenedak palenda fo ita toꞌu mema kana neme sososan mai so.
6Ita bisa tatudu ita susuen, mete ma ita tao tungga Manetualain palenda nala. Neme makahulun mai Ana palenda ita so, fo tasoda tasueao esa no esa. Dedeꞌa beuk taa ia, te ei mamanene palenda ia neme makahulun mai so.
7Hambu masapepeko kala noꞌuk laꞌok ndule daebafok ia so. Ala lanoli, lae, Yesus Karistus neni daebafok ia mai, tehuu Ndia taa hataholi tetebes. Sila boe oo, laban Karistus ma tala nau simbok, lae, Yesus, na ndia Karistus, fo Manetualain tudu mema kana neme makahulun mai so.
8Manea neulalau fo ita sosotan taa nana nggali henik. De, ei musi manggate tao ues makandoo, fo suek ei bisa hambu basa babaꞌe-babatik fo Lamatuak helu sangga fee ei nai nusa-sodak.
9Hataholi fo laꞌo eok neme Karistus nanonolin mai, na, ndia taa nanambaꞌak no Manetualain. Tehuu hataholi fo ana toꞌu tea-tea nanonolik ndia, na, ndia nanambaꞌak no Manetualain, ma Ndia Anan Yesus Karistus.
10Mete ma hambu hataholi mai nanoli dedeꞌa taa ndoos laꞌeneu Karistus, na, boso simbo kana nai ei uma mala, ma boso tao dalek neun.
11Huu, mete ma ei tao dalek neun, na, ei haꞌi babaꞌek nai ndia ue manggalaun ndia so.
12Bei dedeꞌak noꞌu kala fo au ahiik afada ei, tehuu malolenak au taa sulak tungga susulak. Huu, taa dook bali, te au sangga mai akokola memak ua ei, fo ita tebe-tebe bisa tamahoko noꞌu.
13Manetualain boe oo, hele nala ina kaꞌa inan. Ndia ana nala lai ia boe, ala haitua soda-molek neu ina sala. Leondiak leo. Soda-molek neme au mai, Yohanis.
