1Na Jon, Got nga rapa tenda ila rʉp wu ei ndi, enim Got nga kʉmp ropa titim amp ei kʉn, nim nga kangambuⱡa mbʉ kʉn, mon rop ngont. Na ik kupa ei, pilip tʉp enim kʉn, numan ngump mor. Ik kupa ei, pilik mbi ndui nandʉrmʉn wamp mbʉ ndi, enim kʉn numan ngurmin ku.
2Ei nambuⱡ emel, ik kupa ei, tʉn kʉn pimba ei nga mint petʉm.
3Got Tipam kʉn, elim nga Kangʉm Jisas Kraist raⱡ nga wamp pol ti uⱡ na, wamp kont kul uⱡ na, moⱡpa kundi uⱡ ei kʉn, wote wamp numan nga uⱡ na, ik kupa ni uⱡ mbʉ, tʉn kʉn, kan piyangga!
4Na numan kai ti, punt ei, nim nga kangambuⱡa mat ik kupa ei, pilik koip purmin mbʉ, Got Tipam nga man ik pilik tʉtmin.
5Akup amp aiya, nim waldʉnt, tʉn kʉn wamp mbʉ kʉn, wamp numan ngui uⱡ ei kan piyangga! Ik ronduⱡ kont ti, nim kundʉp ni nanʉnt. Wote unt kuimp tepa pitmin ik ni ku kundʉp nʉnt.
6Got nga keta teng ndui uⱡ ei ndi, wamp numan ngui uⱡ mbʉ etmba. Keta teng uⱡ ei, kuimp tek mondʉk pʉtʉng ei mel, teng nduk, wamp numan nguk muⱡʉi!
7Nambuⱡ emel, wamp ik kol rui wu minal ekit ok puk, muⱡ uⱡ mbila andʉk kʉn, Jisas Kraist ei, mʉi kona mana omba, mbo wu rurum ni nga nʉk, para ndʉi nandʉk. Wamp mbʉ ndi, ik kol rok, Kraist nga el rui wamp rarmʉn.
8En enim rʉp etʉi! Enim kongun etmin mel ei nga mel mbʉ, ti kawa ndui nʉndangga, wote enim nga mel mbʉ, kump kʉm ting.
9Wamp nam ti ndi, Kraist nga ik mbo inditim ei, tʉpa mbuⱡ ngum ndam, Got kʉn muⱡi nambʉrʉm. Wote, wamp nam ti ndi, Kraist nga ik mbo inditim ei, pilpa tʉm ndam, Got Tipam kʉn, elim nga Kangʉm raⱡ, tʉpa tepa morum.
10Wamp nam ti ndi, nim nga mang kona ila, Kraist nga ik mbo inditim ik ei, mepa ui nawʉm ndam, wu ei, rawe etkʉn ti nʉti. Wote, moⱡpa kundi uⱡ ei, nim kʉn piyangga ni nʉni ku.
11Wamp nam ti ndi, wamp ei nga kongun kit etʉm mbʉ kʉn, rawe etpa tʉm ndam, elim nga kongun kit mbʉ, tʉk tenda ndukʉⱡ itinggil.
12Na ik ou ndup mat, nim kundʉp nimp. Mon rop ngump nint ik ei, peipa ila, kapⱡa iti natʉmba. Ei nga, pilip int omp nim kʉn, kuimp keta kandpʉⱡ rʉp ropʉⱡ moⱡpʉⱡ kʉn, ik mat nim kundʉp namba, tʉl nga numan ei wang minal nangga.
13Nim nga numan mul amp angʉna ei nga kangambuⱡa mbʉ ndi, nim kʉn, rawe etʉk, ik kai mat nʉk mundʉnmin!
