1Misa꞉ kalu sa꞉s amilo꞉ dowo꞉wo꞉ ne, mo꞉fo꞉s we Godeya꞉lo꞉ da꞉feyo꞉ ka꞉isale gi o꞉lia꞉ gini so꞉wagalin o꞉lia꞉mo꞉ sa꞉sa꞉liga꞉to꞉l. Niyo꞉ gimo꞉wo꞉ mada hendele ha꞉fo꞉wo꞉ disa꞉la꞉lab. A꞉la꞉ta꞉ga꞉ kaluka꞉isale to hendelelo꞉ asulab a꞉ma꞉yo꞉lo꞉ gimo꞉wo꞉ ha꞉fo꞉wo꞉ disa꞉la꞉lab.
2Mo꞉wo꞉ to hendele a꞉no꞉ nio꞉ o꞉lia꞉ dofo꞉liki, mela꞉no꞉ mela꞉no꞉ mela꞉ib.
3Nio꞉ hendele ha꞉fo꞉ disa꞉lalikiyo꞉, Gode o꞉lia꞉ Ene Inso꞉, Ya꞉su Keliso o꞉lia꞉ma꞉ kanulan man o꞉lia꞉ nofolan man o꞉lia꞉, ha꞉fa꞉nolo dowan man o꞉lia꞉ a꞉no꞉, ni o꞉lia꞉ a꞉lab.
4So꞉wagalin gilo꞉wo꞉ Godeya꞉lo꞉ to sio꞉ aumbo꞉, to hendeleyo꞉ kuduha꞉nab a꞉la꞉do꞉ sio꞉wo꞉ ne da꞉da꞉ga꞉, mada sagalo꞉.
5Ka꞉isale gimo꞉wo꞉ to nowo꞉ sa꞉ma꞉nigo꞉l. To we ho꞉gi ko꞉lo꞉ sa꞉ma꞉nigo꞉ba, tamin amilo꞉ to saefa꞉ gilo꞉ dabu a꞉no꞉ ko꞉lo꞉ so꞉lo꞉l. A꞉la꞉fo꞉ko꞉lo꞉ giliyo꞉ nowo꞉lia꞉yo꞉ ha꞉fo꞉wo꞉ disa꞉la꞉bi.
6Ha꞉fo꞉ disa꞉lan man a꞉ma꞉ ha꞉go꞉ we. Nio꞉ Godeya꞉lo꞉ to saefa꞉ a꞉no꞉ kuduha꞉na꞉lab o꞉m. To tamin amilo꞉ gilo꞉ dabu a꞉no꞉ we. Giliyo꞉ nowo꞉mbo꞉wo꞉ ha꞉fo꞉ disa꞉ma꞉no꞉ man a꞉no꞉ ko꞉lo꞉ kuduha꞉naka dowa꞉bi.
7Madali tolo꞉ widan kaluwo꞉ henfelo꞉ amio꞉ o꞉go꞉ modo꞉ ko꞉lo꞉ dalale sa꞉lab. Kalu i a꞉ma꞉yo꞉ Ya꞉su Kelisowo꞉ henfelo꞉ amio꞉ kalule mo꞉fa꞉la꞉dowo꞉ a꞉la꞉liki tilida꞉da꞉sa꞉ga widab. Kalu i a꞉no꞉ dikili sa꞉laliki, Ya꞉su o꞉lia꞉lo꞉ gis dia꞉lab.
8A꞉la꞉fo꞉ko꞉lo꞉ nililo꞉ nanog di a꞉no꞉ walabena꞉ki, go꞉no꞉na꞉ma꞉la꞉yo꞉ dinafa asula꞉bi! Ko꞉sega gilo꞉ nanog di ililib aumbo꞉ go꞉no꞉no꞉ tambo dia꞉niki, dinafa bo꞉fo꞉lubi.
9Kalu abeyo꞉ Ya꞉su Kelisowa꞉lo꞉ to wido꞉ o꞉leaumbo꞉ hendeleyo꞉ mo꞉widaki, eyo꞉ ko꞉li nowo꞉ ko꞉lo꞉ a꞉widalega, kalu a꞉no꞉ Gode o꞉lia꞉yo꞉ mo꞉ege dofo꞉lab. Ko꞉sega kalu abeyo꞉ Godeya꞉ mano꞉ tilida꞉da꞉i ha꞉na꞉lab a꞉no꞉, Do Gode o꞉lia꞉ Inso꞉ Ya꞉su o꞉lia꞉yo꞉ e o꞉lia꞉ ege dofo꞉lab.
10Kalu abeyo꞉ gilo꞉wa fa꞉la꞉dowakiyo꞉, to nafa o꞉lio꞉ngo꞉wo꞉ mo꞉widalega, giliyo꞉ kalu o꞉ngo꞉wo꞉ migi widaki, ayamio꞉ tililia꞉ ha꞉na꞉so꞉bo.
11Kalu abeyo꞉ madali widan kalumo꞉ sagalab a꞉no꞉, ene man mogago꞉ a꞉no꞉ gi asuwa꞉tab ko꞉lo꞉, ge e o꞉lia꞉ mogago꞉wo꞉ dimidab.
12A꞉la꞉fo꞉ko꞉lo꞉ niyo꞉ to modo꞉ nolo꞉ gimo꞉ sa꞉ma꞉no꞉ asulo꞉l ko꞉sega, niyo꞉ mo꞉fo꞉s amio꞉ mo꞉sa꞉sa꞉liga꞉fa꞉no꞉ asulo꞉l. Nio꞉ negele silikiyo꞉ sagalo꞉ doma꞉ki, ne kona ya꞉ga꞉ migi kudu tola꞉ma꞉no꞉ asulo꞉l.
13Godeya꞉lo꞉ da꞉feyo꞉ ka꞉isale a꞉ma꞉ inso꞉wa꞉yo꞉ sagalo꞉ towo꞉ gimo꞉ sa꞉sa꞉liga꞉tab.
