2 Jon 1

1

¹Jo Jon, jo udu bwena ta lau ta Kindrei, jo atorou la-ukei dah, ewek ta ou badih nane Kindrei ndratehei kalem ndrawek tam, ma hawe nadum oro. Jo badeh, aso-ok ado labai! Jo le bwe, arile, hawe iri lau solo-an labai tana iri sahou handru.

²Tasah, sahou handru in ndrine taha, ma iy kameh udu hawe taha, ta ere le buku doh.

³Tikisiy ma hawe mondrei ta tama taha Kindrei uru Jises Krais, tama nah, kameh udu hawe taha, udu bolo sahou handru ma aso-ok.

⁴Jo sekesek handru ta anuhun buku nadum oro ra-on ndra-en hamon ta sahou handru, buku tama taha ndrabatanau taha, ta a-en hamon ta sahou tan.

⁵Arile, ou badih badeh, jo anya kasehek tam i buku doh: Taha badeh, kaso-ok nadu tine taha iri rayah ja, ma kaseben iri. Jo badeh, badeu batanau ha-un bawek taha ja bwe; batanau ari le mene badeh, taha ndrakohok bwena.

⁶Kandriyen ta aso-ok ndramak ari ja i buku doh: Taha ka-en hamon ta batanau ta Kindrei. Batanau doh badeh, taha ndranuhun bwena. Ya taha ka-en hamon ta kandriyen ta aso-ok ndramak ari ja.

⁷Aha kanuhun, iri lau ta wasai solo-an labai ndradek ndrame bolo kon munyak. Iri lau ta wasai doh anya, Jises Krais badeh, basahan bala buku bada ndramak awas bwe. Arile, iri badeh, ta wasai ma ta ariu kaliu hawe Krais.

⁸Ya, mada aha badeh, kaleu ta aha saruwani budon taha ta lakou nane aha awoyah ta aliy. Aha kales boto-on, ma hamon kameh, aha akohok ndramas laba tinan labai ta aliy.

⁹Buku none ari ndramak batawi sahou ta Jises Krais bwe, ya iy sandroh i ta sahou ari ja, idoh badeh, Kindrei ba-en hawen bwe. Arile, buku none are lau tawi sahou ta Jises ihis boto-on udu ndrinen, idoh kameh tama taha uru nadun Jises badeh, an hawen.

¹⁰Buku ari ndramak eme hawe aha, ya iy basehek sahou mwasin, bala buku Jises asehek bwe, ado badeh, sasumon iy, ma sakohok iy sawek asiu hawe ado.

¹¹Buku are lau asumon iy ma asehek sahou hawen, iy badeh, aseben iy ta amekes gok tan ndra-in doh.

¹²Jo winiyan atorou sahou lawe-en ewek taha, arile jo bwalek edeu i bolo la-ukei dah. Tasah, jo atehei budon tek boto-on ta ewek atou aha, ya taha barasehek nyala taha. Ma taha kasekesek ta ado le se.

¹³Nadu tinem badih nane Kindrei ndratehei kalem ndrala tan, hawe nadun oro badeh, anya bada-an toro mwasin ewek tam.