1Vuꞌun ancianoun, ta jtsꞌibabot talel ti jcarta liꞌe ti voꞌote, Quermana, ti tꞌujbilot yuꞌun ti Diose schiꞌuc ti avalabe, ti cꞌuxoxuc ta coꞌnton ta melele. Maꞌuc noꞌox ti vuꞌun cꞌux ta xcaꞌioxuque. Jaꞌ jech xtoc cꞌux ta xaꞌioxuc ti buchꞌutic laj xa yojtiquinic ti melele.
2Ti vuꞌun ti cꞌux ta xcaꞌioxuque, ta sventa ti oy ta coꞌntontic ti melele, ti jech oy ta coꞌntontic sbatel osile.
3Ta sventa ti oyoxuc ta stojol ti melele, ti cꞌux ta xavaꞌi abaique, jaꞌ yuꞌun un, ti Dios Totile schiꞌuc ti Cajvaltic Jesucristoe ti jaꞌ Snichꞌon ti Jtotic Diose, acꞌo yacꞌboxuc bendición, acꞌo xcꞌuxubinoxuc.
4Ep ximuyubaj xa ti cꞌalal laj caꞌibe scꞌoplal ti oy jun chib avalab ti lec xchꞌunojic ti melele jech chac cꞌu chaꞌal yalojbotic ti Jtotic Diose.
5Avi tana un, Quermana, ta jcꞌanbot vocol ti cꞌux acꞌo caꞌi jbatic ta jujun tale. Ti jech ta jtsꞌibabot talel liꞌe, mu yuꞌunuc achꞌ mantaluc. Yuꞌun jaꞌ onoꞌox ti mantal ti lic caꞌitic talel ta sliquebale.
6Mi oy scꞌuxul coꞌntontique, jaꞌ yuꞌun un, ta jpastic ti cꞌusi ta xal smantaltac ti Diose. Ti smantal ti lic xa onoꞌox avaꞌiic talel ta sliquebale, jaꞌ ti oyuc scꞌuxul coꞌntontique.
7Oy xa ep jloꞌlavanejetic ti buꞌyuc noꞌox ta xanavique, ti mu xchꞌunic ti coꞌol sꞌelan batsꞌi vinic ital ti Jesucristoe. Ti buchꞌu jech yoꞌntonic taje, jaꞌ jloꞌlavanejetic, jaꞌ yajcronta ti Cristoe.
8Jech o xal un, bijanic me yoꞌ mu jecheꞌuc noꞌox ta xchꞌay ti avabtelique, yoꞌ jech tsꞌacal lec ta xavichꞌic ti amotonique.
9Buchꞌuuc noꞌox ti ta stoy sbaique, ti maꞌuc ta sventainic ti cꞌusi ichanubtasvan ti Cristoe, muꞌyuc ti Dios ta stojole. Yan ti buchꞌu ta sventain ti cꞌusi ichanubtasvan ti Cristoe, oy ta stojol ti Dios Totile schiꞌuc ti Nichꞌonile.
10Mi oy buchꞌu ta svuꞌlanoxuc ta anaic ti mu coꞌoluc ta xal ti cꞌusi ichanubtasvan ti Cristoe, mu xavacꞌ ochuc ta yut anaic, mu xavichꞌ ta muc.
11Yuꞌun ti buchꞌu ta xichꞌ ta muqꞌue ta sta ta maquibel ti cꞌusi chopol ta spase.
12Oy to ep ti cꞌusi ta jcꞌan ta xcalboxuc avaꞌiique, pero mu jcꞌan ta jpas ti jaꞌ noꞌox ta carta ta tsꞌibe. Pero jpatoj coꞌnton ta xcaꞌi ti chtal jqꞌueloxuque, chtal jchiꞌinoxuc ta loꞌil jtuc, yoꞌ jech xijmuyubajotic jcotoltic.
13Ti achiꞌil ta voqꞌuel ti tꞌujbil yuꞌun ti Dios xtoque, chabanucot xayalbe ti yalabe. Jechuc
