2 Piɛri 3

1

2

3

¹N kɔbɛ n dɔ́ bɛ̀, n di wɑ̃̀ri di mpɑ́tíri dɛ́ríndi kɛ dɔ́ kɛ́yíɛ́ di dentɛmu kɛ̀ di ndɑkɛ di kèè tì Kuyie nkó kucɛ miɛkɛ ti kpɛ́í.

²Dentɛnɛ̀ní Kuyie mpɑ̃ɑ̃nɑ́ɑǹtì nɑ́ɑm̀bɛ̀ do nɑ̀kɛ́ tì nɛ̀ ti Yiɛ̀ nYesu Kirisi Odɛɛtíwè duɔ́ nyìì tié nkòo tɔ̃rɛ̀ ì ndi tùo.

³Di nyɛ̃́ kɛ dò nyɛwe sɔnyɛ bɛnìtìbɛ̀ bo buotɛ́ kɛ́ndɔɔri bɛ̀ dɔ́mɛ̀ kɛ di dɑú kɛ tú:

⁴Yesu yɛ̃ nhò wɛ̃tiní, yé we? Ti yɛmbɛ̀ do bomu kɛ ku, nɛ̀ Kuyie ndɔ̀ɔ̀mɛ̀ kɛtenkɛ̀ dɛmɔu dɛ̀ í cèètɛ.

⁵Bɛ̀ í yóó yie nKuyie nkuù bɛ́immɛ̀ kɛ̀ kɛtenkɛ̀ nɛ̀ kɛĩ́nkɛ̀ kɛ̀ dɛ̀ buotɛ́, kɛ̀ kuù yìɛ́ kɛ́bɛ́i nkɛ̀ mɛniɛ mbɑ̀tɛ kɛ cɑ̃̀ńnɛ́ nɛ̀ kɛtenkɛ̀.

⁶Mɛɛ̀ niɛ ndo wɛ̃̀tɛ kɛ́píɛ nkɛtenkɛ̀ kɛ́kuɔ bɛnìtìbɛ̀.

⁷Mɛɛ̀ botí nku kù yóó bɛ́immɛ̀ kɛĩ́nkɛ̀ nɛ̀ kɛtenkɛ̀ kɛ̀ dɛ̀ɛ cɔ́útɛ́, kɛ̀ kùu bekɛ́nɛ̀ bɛnitiyɛibɛ kɛ́ bɛ̀ kpetínnɛ́.

⁸N kɔbɛ nyɛ̃́nɛ̀ kɛ dò nti Yiɛ̀ mborɛ̀ yɛbie ntɛkɔupíítɛ̀ (1000) dò ndiyiè dimɑ́ɑ̀ ndi kɛ̀ diyiè dimɑ́ɑ̀ dò nyɛbie ntɛkɔupíítɛ̀.

⁹Ti Yiɛ̀ nyí ɔɔtí, ò bo dɔɔ̀mɛ̀ ò bɛ́i ntì, bɛnìtìbɛ̀ bɛɛ̀ yɛ̀mmɛ̀ mɛ̀ dò, nhò í dɔ́ òmɔùu feti, ò miḿmu kɛ dɔ́ bɑ́ wè wèe ceetɛ kɛ yóu mɛyɛi.

¹⁰Ti Yiɛ̀ nyóó wɛ̃tɛní oyúókù kɔ̃mɛ mmɛ. Dɛ yiè kɛ̀ kɛĩ́nkɛ̀ɛ uutɛ̀ mɛdiɛ̀ nkɛ́pɛ̃ɛ̃tóo kɛ̀ muhɑ̃ɑ̃́ ncɔ́útɛ́ siwɑ̃̀ɑ̃ nɛ̀ kɛtenkɛ̀ nɛ̀ kɛ kpɛrɛ dɛmɔu.

¹¹Dɛmɔu kɛ̀ dɛ̀ yóó cɔ̀útɛ́ mɛmmɛ, di tũ ndò nkɛ́ceetɛ di borimɛ mmɛ kɛ́ndɔɔri Kuyie ndɔ́mɛ̀.

¹²Mpĩ́nnɛ̀ ku tɔ̃mmú nɛ̀ di yɛ̀mmɛ̀ mɛmɔu kɛ̀ dɛ kó diyièe cɑ̃rikɛ kɛ́tuɔkɛní, kɛ̀ muhɑ̃ɑ̃́ ncɔ́útɛ́ kɛĩ́nkɛ̀ kpɛrɛ kɛ̀ dɛ̀ɛ yiɛtɛ.

¹³Ti bɑɑ kɛĩ́nkɛ̀ pɑ̀nkɛ̀ nkɛ nɛ̀ kɛtenkɛ̀ pɑ̀nkɛ̀, Kuyie nti dɔúnnɛ̀ dɛ̀ɛ̀ kpɛ́í ndinùù, mɛyɛi nyí yó mbo dɛ̀ bɑ́ wè ò yó ndɔɔri dɛ̀ Kuyie ndɔ́mɛ̀.

¹⁴N kɔbɛ n dɔ́ bɛ̀, yetɛnko kɛ́ndò mpɑ́íí kɛ kpɑ mɛyɛi, kɛ́ntɑunɛ̀ Kuyie, kɛ́mbɑɑ dɛ kó diyiè.

¹⁵Nyɛ̃́nɛ̀ kɛ dò nkɛ̀ ti Yiɛ̀ nyí wɛ̃̀tɛní mɛcɑ̃ɑ̃ nhò mimmu kɛ dɔ́ kɛ́ di dɛɛtɛ́. Kuyie nduɔ́mmu mɛciì ntì tebitɛ Pɔɔri kòò tì ndi wɑ̃̀ri.

¹⁶Kɛ̀ tì bo o pɑ́tɛ miɛkɛ, kɛ̀ tìmɑtì yóù, bɛ̀ɛ̀ í bɑntɛ́ nɛ̀ bɛ̀ɛ̀ í kpenkɛ, kɛ̀ bɛ̀ cèèri tì tu mù bɛ̀ ɔ̃mmɛ̀ Kuyie nnɑ́ɑǹtì tɛtì, bɛ̀ ce mbɛmɑ́ɑ̀ ndi Kuyie mbeéntì.

¹⁷N kɔbɛ n tì ndi nɑ̀kɛ́mu, nyɛ̃́nɛ̀ kɛ̀ bɛnitiyɛibɛ bɑ́ɑ́ di soutɛ́ kɛ̀ di yóu di fííkú nkùù cɛ miɛkɛ.

¹⁸Nsɔkɛ́nɛ̀ kɛ kótírí Kuyie nkó kucɛ miɛkɛ, kɛ dɔkɛ yĩ́ɛ̃́tɛ́ ti Yiɛ̀ nYesu Kirisi Odɛɛtíwè, kòo yètìrì ndɛu sɑ̃́ɑ̃̀. Kɛ̀ dɛ̀ mmɛ̀ ndò.