Text copied!
CopyCompare
Is Lalag te Megbevayà - 2 Cronica

2 Cronica 2

Help us?
Click on verse(s) to share them!
1Dutun he timpu, insuǥù ni Solomon is kedtukuza te valey te Nengazen para te zengeg te Nengazen wey kedtukuza te turuǥan he para te keugelingen din.
2Midtiǥum din is 70,000 he menge tighakut, 80,000 he tigbasbas te menge vatu ziyà te menge vuvungan, wey 3,600 he menge etew he iyan edumala.
3Mibpeuwit si Solomon te lalag diyà te ki Hadì Hiram he hadì te Tyre he edhenduen te: “Peuwiti a kenikew te kayu he sidru iring te mibeelan nu zengan diyà te amey ku he si David te kedtukuza zin te turuǥan din.
4Ebpehitendeg a te valey te Nengazen para te zengeg te Nengazen he Megbevayè ku. Egkehimu heini he segradu he lugar he zutun edtutunga is mehemut he veyewà wey ebpemuhatan layun te segradu he supas. Kayi zaan ebpemuhat te pemuhat he edtutungen kada meselem wey mezukilem, wey te menge Andew te Kedhimeley, te Pista te Kebpuun te Hayag wey te zuma he menge pista te kebeǥayi te zengeg te Nengazen he Megbevayè dey. Heini he sulunuzen kinahanglan he edtumanen te menge Israilihanen taman te taman.”
5“Dekelà he valey te Nengazen is edtukuzen ku, su utew mekeǥeǥehem is Megbevayè dey kenà te zuma he ed-ezapen.
6Piru hentei is ebpekehimu he edtukud te valey he para kandin? Su kenà ganì sikandin ed-ereg diyà te langit, minsan diyà te pinekemetikang he vahin te langit. Umbe kenà a zait he ebpekepehitindeg te valey te Nengazen. Is edtukuzen ku zà ne iyan dà is lugar he zutun edtutunga is menge pemuhat diyà te etuvangan din.
7Umbe ǥuntaan, suǥua nu zini is etew he metau he edterebahu te vulawan, pelata, brunsi, putew wey metau he ebpenhavel te manggad, he merudtem, kanggan, wey meitem is kaavuavu zin, wey metau he ed-ukir. Edterebahu sikandin duma te menge metau he ibpemeterebahu ku he tig-Juda wey tig-Jerusalem, he mibpilì te amey ku he si David.
8Peuwiti a zaan te kayu he sidru, sipris, wey algum he ebpuun te Lebanon, su netuenan ku he memetau is menge sakup nu he ebpemenamped te kayu. Ed-uǥupan te menge sakup ku is menge sakup nu,
9te ked-andam te mezakel he menge kayu, su utew zekelà wey mekempet is baley te Nengazen he edtukuzen ku.
10Ebeyazan ku is menge tigtamped nu te menge kayu te 60,000 he saku he trigu, 60,000 he saku he barli, 110,000 he gelun he vinu, wey 110,000 he gelun he lana te ulibu.”
11Iyan heini tavak ni Hadì Hiram he hadì te Tyre ziyà te ki Solomon pinaaǥi te surat: “Tenged te mahal te Nengazen is mezakel he menge keet-etawan din ne midhimu ke zin he hadì dan.
12Edeliǥen is Nengazen he Megbevayà te Israel he midlimbag te langit wey kelibutan! Mibeǥayan din si Hadì David te uluwanen he anak, he nepenù te keuluwanen wey kedsavut, he edtukud te valey te Nengazen wey turuǥan he para te keugelingen din.”
13“Edsuǥuen ku ziyà te kenikew si Huram Abi, he sevaha te memetau he edterebahu.
14Tig-Dan is iney zin, ne is amey zin tig-Tyre. Metau sikandin he edterebahu te vulawan, pelata, brunsi, putew, batu, wey kayu, wey te kebaal te manggad he merudtem, meitem is kaavuavu zin, wey kanggan wey linu, egketau sikandin te minsan hengkey he kelasi te ked-ukir, wey ebpekevaal sikandin te minsan hengkey he kelasi te zayandayan he ebpeveelan kandin. Edterebahu sikandin he iyan duma zin is kenikew he menge terebahanti wey is menge terebahanti he mibpilì te telehuzen he amey nu he si David.
15“Ne ǥuntaan telehuzen he Solomon ipeuwit nu kayi te kenami is trigu, barli, wey vinu, wey lana te ulibu he insaad nu
16ne ebpenempezen dey is minsan hengkey he kayu ziyà te Lebanon he egkinehenglanen nu. Ne ibpebpipikit dey heini ne ibpeǥampung dey zà heini te zaǥat pehendiyà te Jopa. Ne iyan kew uwit kayi ziyà te Jerusalem.”
17Impemelista ni Solomon is langun he kenà Israilihanen diyà te Israel iring te mibeelan te amey zin he si David, ne is kezakel 153,600.
18Midhimu zin is 70,000 he tighakut, is 80,000 iyan tigbasbas te menge vatu ziyà te menge vuvungan, ne is 3,600 ne iyan edumala te menge terebahanti.