2. Kronika 2

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Iwe, ewe king Salomon a ekiekietä pwe epwe aüetä eu imwenfel fän iten ewe Samol mi Lapalap, pwal eu imwen king fän püsin itan.

²Mürin a awisa ükükün fik ngeröü mwän, pwe repwe keki mettoch mi chou me walik ngeröü chon tuw fau lon ewe fanü mi chukuchukutä, pwal ülüngat ngeröü wonopükü souemwenin angang mi nemeniir.

³Iwe, Salomon a tinala pworaus ren Hairam ewe kingen Tirus o üra, “Kopwe tinato rei irä setar usun ka tinato ren Tafit semei we, pwe epwe aüetä püsin imwan ren.

⁴Iei üpwe kärän popuetä le aüetä eu imw fän iten ewe Samol mi Lapalap ai we Kot. Epwe eu leni mi pin, ia äm me nei aramas aipwe fel ngeni Kot ie o keni apach mi pwokus seni nofitin mongö mi pwoarar iteiten rän, aipwe pwal uwato ren ekewe pilawa mi pin. Ikenan aipwe pwal eäni asoren kek iteiten lesosor me lekuniol, lon ekewe ränin sapat me popun maram, pwal lupwen fansoun ekewe chulap mi kefil fän iten ewe Samol mi Lapalap äm we Kot. Iei eu allük seni Kot fän iten chon Israel tori feilfeilachök.

⁵Ewe imwenfel üpwe aüetä epwe fokun watte, pun äm Kot a fokun tekia seni ekewe kot meinisin.

⁶Nge esap fokun wor eman a tongeni aüetä eu imw fän iten Kot, pun ewe läng mwo mi unusen tekia, nge esap tongeni kuch lon. Ngang iö, pwe üpwe aüetä eu imw fän itan, chilon chök pwe epwe eu leni ia üpwe keni ie apach mi pwokus me fän mesan?

⁷Iei mine kopwe tinato rei eman mwän mi silelap le angang ngeni kolt, silifer, piras me mächä, mi silelap le türüni mangaku mi parachol me parapar me arauarau, epwe pwal sip le rup. Ätei epwe eti nei kewe souangang seni Juta me Jerusalem, Tafit semei we a fen filiretä.

⁸Kopwe pwal tinato rei irä setar, saipires me alkum seni Lepanon, pun üa silei pwe noum chon angang ra sile pöküpök irä. Iwe, nei chon angang repwe eti noum chon angang,

⁹pwe repwe amolätä chomong chomong pap fän itei, pun ewe imw üpwe aüetä epwe fokun watte o amwarar.

¹⁰Ngang üpwe ngeni noum chon angang ekewe chon pöküpök irä ina epwe ükükün ipükü rüe me limu ngeröü tuk wiich mi kata, ipükü rüe me limu ngeröü tuk parli, ipükü engol me limu ngeröü kalon wain me ipükü engol me limu ngeröü kalon apüra seni föün olif.”

¹¹Mürin, Hairam ewe kingen Tirus a tinala pälüen ewe tüngor lon echö toropwe ngeni Salomon, “Pokiten ewe Samol mi Lapalap a echeni nöün aramas, iei mine a awisok pwe kopwe nöür king.”

¹²Iwe, Hairam a pwal apasa lon an toropwe, “Üpwe mwareiti ewe Samol mi Lapalap ewe Koten Israel mi föri läng me fanüfan, pwe a ngeni king Tafit eman nöün mwän mi tipachem, a uren mirit me silelap, pwe epwe aüetä eu imwenfel fän iten ewe Samol mi Lapalap, pwal eu imwen king fän püsin itan.

¹³Iei üpwe tinala reöm eman mwän mi sipeöch o uren silelap itan Huram.

¹⁴I nöün eman fefin seni ewe ainangen Tan, nge saman eman re Tirus. Ätei eman mi sip le angang ngeni kolt, silifer, piras, mächä, fau me irä. A pwal sip le föri pisek seni mangaku mi parachol me arauarau me parapar, pwal mangaku mi pwechepwech. A tongeni föri sokopaten angangen rup o förätä iteiten lios ka awisa ngeni. Ätei epwe eti noum kewe souangang le angang me nöün Tafit semom we.

¹⁵Iei mine, ai samol, kopwe tinato rem ekewe wiich me parli, apüra me wain ka fen kapas usun.

¹⁶Nge äm aipwe pöküpök irä me Lepanon ükükün mine ka mochen, aipwe rifengeniir usun ärai o tinala reöm lematau ngeni Jopa, seni ikenan ka tongeni uweerela Jerusalem.”

¹⁷Mürin, Salomon a angei iteiten ekewe chon ekis meinisin mi nom lon ewe fanü Israel, usun Tafit saman we a fen föri me lom. Iwe, a pwä pwe a wor ükükün ipükü lime me ülüngat ngeröü wonopükü chon ekis.

¹⁸Salomon a awisa ükükün fik ngeröü me leir pwe repwe keki metoch mi chou, walik ngeröü pwe repwe tuw fau lon ewe fanü mi chukuchukutä, pwal ülüngatngeröü wonopükü souemwenin angang pwe repwe nemeni ekewe aramas o angangeer.