1Hein melig-en en is kedhadì ni Rehoboam wey gemhanan en sikandin, mid-iniyuǥan din en is kesuǥuan te Nengazen ne mid-iring kandin is tivuuk he menge Israilihanen.
2Tenged te kenà sikandan metinumanen te Nengazen, midhimu zin he surunga ni Hadì Shishak he hadì te Ehipto is Jerusalem te ikelima he tuig te kedhadì ni Rehoboam.
3Nenurung si Shishak duma te 1,200 he kerwahi, 60,000 he menge pereuntud te kudà, wey utew mahabet he menge sundaru, he is duma kandan ebpuun diyà te Libya, Sukot, wey Etiopia.
4Ne midsakup ni Shishak is binerengbeng he menge inged te Juda ne midlaus dan pa medsurung pehendiyà te Jerusalem.
5Ne midhendiyà is ebpeneuven he si Shemaya te ki Rehoboam wey te menge pengulu te Juda, he mibpelaǥuy pehendiyà te Jerusalem su nahandek dan ki Shishak. Migkeǥiyan sikandan ni Shemaya te, “Iyan heini lalag te Nengazen: Geina te mid-iniyuǥan a keniyu, ne ǥuntaan ebey-anan ku sikiyu keniyan te kedsurunga keniyu ni Shishak.”
6Is hadì wey is menge pengulu te Israel, mid-angken dan is salè dan ne ke sikandan te, “Metazeng is Nengazen!”
7Hein naahà te Nengazen he impekevavè dan is keugelingen dan, ne migkaǥi is Nengazen pinaaǥi ki Shemaya, “Geina te impekevavè dan is keugelingen dan, ne kenè ku sikandan edèdeetan, kekenà, edlibriyen ku sikandan te kenà egkeuǥet. Ne kenè ku en ibpesaǥad is Jerusalem te pauk ku pinaaǥi ki Shishak.
8Piru ibpesakup ku sikandan kandin su wey zan metueni he meupiya pa is kebpenilbi kedì, kenà is kebpenilbi te kelibutanen he menge hadì.”
9Hein midsurung ni Hadì Shishak he hadì te Ehipto is Jerusalem, mibpenguwa zin is menge ketiǥeyunan diyà te valey te Nengazen wey is diyà te turuǥan. Migkuwa zin is langun, ragkes en is menge kelasag he vulawan he mibpeveelan ni Solomon.
10Umbe, mibpevaal si Hadì Rehoboam te brunsi he menge kelasag he inliwan dutun, ne insarig din heini te menge upisyal te menge vantey he ebantey te ǥemawan te turuǥan.
11Ne emun edhendiyà haazà is hadì te valey te Nengazen, ne edumahan sikandin dutun te menge ebantey he ed-uwit kayi he menge kelasag, ne kegkepasad ne idlikù dan heini ziyà te ruǥu zan.
12Tenged te impekevavà ni Rehoboam is keugelingen din, naawà is kegkepeuki kandin te Nengazen, ne wazè ded sikandin mepurung mezeeti. Ne zuen ded keupiyaanan diyà te Juda.
13Mibpedayun he melig-en is kedumala ni Hadì Rehoboam wey mibpedayun sikandin he hadì diyà te Jerusalem. 41 he tuig is keǥurang din hein nehimu sikandin he hadì, ne midhadì sikandin seled te 17 he tuig diyà te Jerusalem, kes inged te langun he tribu te Israel he iyan nepilì te Nengazen he zutun sikandin ebeǥayi te zengeg. Is ngazan te iney ni Rehoboam iyan si Naama he sevaha he Amonihanen.
14Mibaal si Rehoboam te mezaat tenged te wazè din isipa is kedangep diyà te Nengazen.
15Is guǥud mehitenged te kedhadì ni Rehoboam puun te puunà taman te ketepusan, ne insurat diyà te Libru ni Shemaya he ebpeneuven wey ziyà te Libru ni Iddo he ebpeneuven he listahan te menge kevuwazan. Layun dengan edtebek si Rehoboam wey si Jeroboam.
16Hein minatey en si Rehoboam, ne ziyà sikandin ileveng te Inged ni David. Ne si Abia he anak din is nekeilis kandin he iyan hadì.
