1Kũ Taya kína Hiramu mà kũ ò Sulemanu kà kína ũ a de gɛ̃nɛ ũ, à a ìba kenↄ zĩ̀a, zaakũ Dauda gbɛ̃nnamɛ yã.
2Akũ Sulemanu lɛ́gbãzã kɛ̀ Hiramunɛ à pì:
3Ń dↄ̃ kũ ma de Dauda dí le à ↄnn kàtɛ Dikiri a Ludanɛro, kũ buri kũ ò likainↄ tɛn zĩ̀ ká kãao yãi, ari Dikiri gɛ̀ɛ à ń kɛ́nɛ tìntin ũ.
4Tera sà Dikiri ma Luda tò ma ĩampaki lè. Ibɛrɛ ke kú gukearo, ásaru ke kunlo.
5Abire yãin má ye mà kpɛ́ bo Dikiri ma Ludanɛ, lákũ Dikiri ò ma de Daudanɛ nà, à pì a nɛ́ kũ áni ká kpatan a gɛ̃nɛ ũ mɛ́ ani kpɛ́ boarɛ.
6Ǹ gbɛ̃nↄ da ò Lɛbana sida línↄ zↄ̃zↄ̃mɛnɛ. Ma zĩkɛrinↄ ni zĩ pì kɛ kũ n zĩkɛrinↄ lɛɛlɛ, mani n zĩkɛri pìnↄ fĩna bonnɛ lákũ n ò nà pínki. Ń dↄ̃ kũ ó gbɛ̃ke vĩ à lízↄ̃na dↄ̃ lán ákↄ̃nↄ Sidↄ̃denↄ bàro.
7Kũ Hiramu Sulemanu yã pìi mà, a pↄ kɛ̀ nna manamana à pì: Ò Dikiri tↄ́ kpá gbãra, zaakũ à Dauda gbà nɛ́ ↄ̃ndↄ̃de, àtɛn do a gbɛ̃ dasinↄnɛ arɛ.
8Akũ Hiramu gbɛ̃nↄ zĩ̀ Sulemanua à pì: Ma lɛ́gbãzã kũ n kɛ̀mɛnɛ mà. Mani kɛ lákũ ń yei nà sida línↄ kũ pini línↄ yã musu.
9Ma zĩkɛrinↄ ni lí pìnↄ sɛ́ zaa Lɛbana kpinↄ musu, oni kipao ísira lɛ́a, mani yĩyĩ mà gbɛ̃nↄ zĩonnɛ ísira musu. Gu kũ n òmɛnɛn, gwen mani tó ò kátɛnnnɛ, gbasa ǹ táo. Mↄkↄ̃n sↄ̃, yã kũ má ye ǹ kɛmɛnɛn dí: Ǹ pↄ́ble kpá ma ↄndenↄa.
10Lɛn Hiramu dìgↄ̃ sida línↄ kũ pini línↄ kpá Sulemanua lɛ lákũ à yei nà.
11Sulemanu sↄ̃ àdigↄ̃ pↄ́blewɛ kpáa wɛ̃̀ kũ wɛ̃̀ɛo tↄn wàa pla kũ nísio lita dúbu wàa pla.
12Dikiri Sulemanu gbà ↄ̃ndↄ̃ lákũ à a lɛ́ sɛ̀nɛ nà. Hiramu kũ Sulemanuo nna kũ kↄ̃o, akũ ò lɛ́dokↄ̃nↄ vĩ.
13Kína Sulemanu gbɛ̃nↄ sɛ̀sɛ Isaraila burinↄ tɛ́ pínki à ń dá zĩ pìi gũn gbɛ̃nↄn dúbu baraakuri.
14Àdigↄ̃ ń zĩ Lɛbana bùsun mↄ kũ mↄo gbɛ̃nↄn dúbu kuri. Gbɛ̃ pìnↄ dì kɛ Lɛbana mↄ do, akũ òdi su ò kɛ bɛ mↄ plapla. Adoniramumɛ zↄ̀zĩ pì gbɛ̃ zↄ̃kↄ̃ ũ.
15Sulemanu gbɛ̀'arinↄ vĩ gukpiden gbɛ̃nↄn dúbu basiikↄ̃, a sɛ̀sɛrinↄ sↄ̃ gbɛ̃nↄn dúbu baaakↄ̃ akuri.
16Gbɛ̃ pìnↄ baasi, Sulemanu gbɛ̃nↄ dìtɛditɛ gbɛ̃nↄn dúbu aakↄ̃ kũ wàa aakↄ̃o, ògↄ̃ wɛ́ pá zĩ pìia.
17Kína yã dìtɛ, akũ ò gbɛ̀ gbɛ̃̀ntɛ̃ mananↄ yↄ̃̀yↄ̃ ò à, ò sɛ̀tɛ ò sùo kpɛ́ pì ɛ̃pɛtɛgbɛnↄ ũ.
18Lɛn Sulemanu zĩkɛrinↄ kũ Hiramu zĩkɛrinↄ kũ Gebalidenↄ lí zↄ̃̀zↄ̃ lɛ ò kɛ̀kɛ, ò gbɛ̀ɛ kɛ̀kɛ kpɛ́ pìi bobↄ ũ.
