1Kũ Seba bùsu saraunia mà lákũ Sulemanu tↄ́ bò nà Dikiri yã musu, akũ à sù a yↄ̃ à gwa kũ yã zĩ'ũ gbɛkanaao.
2À kà Yurusalɛmu kũ a ìbanↄ dasidasi kũ pↄ́ gbĩ nnanↄo kũ wura sà zↄ̃kↄ̃ↄo kũ gbɛ̀ bɛ̀ɛrɛde kũ lakuminↄ sɛnanↄ, akũ à gɛ̀ɛ Sulemanu kĩnaa à yã kũ à kú a nɛ̀sɛɛ gũn fàaii bò kãao pínki.
3Akũ Sulemanu yã kũ à làlaawanↄ bↄ̀kↄtɛnɛ pínki. A ke bↄkↄtɛna dí a furo.
4Kũ saraunia pì Sulemanu ↄ̃ndↄ̃yãnↄ mà pínki, akũsↄ̃ à a bɛ kũ à bòo è
5kũ pↄ́ble kũ àdi blenↄ kũ a ìbanↄ gwenaao kũ a bɛ zĩkɛrinↄ kunnaao kũ ń pↄ́kasanↄ kũ a wɛ̃kpaatɛrinↄ kũ sa'opↄ kũ òdi ká tɛ́n à tɛ́ kũ kũ à ò Dikiri ↄnnnↄ, yã pìi a kũ̀ gbãna, akũ a lɛ́ wɛ̃̀.
6Akũ à pì kínanɛ: N yãkɛnanↄ kũ n ↄ̃ndↄ̃ baaru kũ ma mà zaa ma bùsunwo bi yãpuramɛ.
7Mádi yã pìnↄ síro ari ma gɛ ma kao la, akũ ma wɛ́ sìalɛ sà. Odi omɛnɛ pínki sero fá! N ↄ̃ndↄ̃ kũ n aruzɛkɛnↄn de lákũ ma a baaruu mà nàla zã̀.
8Mìnnadenↄmɛ n gbɛ̃nↄ ũ kũ n ìba kũ òdigↄ̃ kú kũnwo gↄrↄ sĩnda pínki, ògↄ̃ n ↄ̃ndↄ̃yã manↄ!
9Ò Dikiri n Luda sáabu kpá, zaakũ n yã kàagu, akũ à n ka Isarailanↄ kpatan. Yenyĩ kũ Dikiri vĩ kũ Isarailanↄ gↄrↄ sĩnda pínki mɛ́ à tò à n ka kína ũ, de ǹgↄ̃ yã gↄ̃gↄ̃ńnɛ a zɛ́a.
10Akũ saraunia pì kína gbà wura tↄn siikↄ̃ kũ pↄ́ gbĩ nnanↄo dasidasi manamana kũ gbɛ̀ bɛ̀ɛrɛdenↄ. Pↄ́ gbĩ nna kũ à kína Sulemanu gbàa pìnↄ zↄ̃kↄ̃, gbɛ̃ke dí suonɛ à kà lɛ ziki doro.
11Hiramu gó'itɛ kũ ò sù kũ Ofio kũ wuraaonↄ sù kũ lí bɛ̀ɛrɛdenↄ manamana kũ gbɛ̀ bɛ̀ɛrɛdenↄ dↄ.
12Akũ kína Dikiri ↄn pↄ́nↄ kɛ̀o kũ a zĩda bɛ pↄ́nↄ, à mↄrↄnↄ kũ gidigbonↄ kɛ̀o lɛ̀sirinↄnɛ dↄ. Odi su kũ lí pì burio à kà lɛ ziki doro, odi wɛ́ si a takalɛ doro ari kũ a gbãrao.
13Pↄ́ kũ Seba bùsu saraunia pì yei pínki à gbɛ̀ka kína Sulemanua, akũ à a gbà, gba kũ à kɛ̀nɛ yↄ̃nkↄyↄ̃nkↄnↄ baasi. Akũ à ɛ̀ra à tà a bùsun kũ a ìbanↄ.
14Wura kũ àdi su Sulemanua wɛ̃̀ kũ wɛ̃̀ɛo dì ká tↄn baro awɛɛ'aakↄ̃,
15táfe kũ táa'orinↄ kũ lagatarinↄ kũ Larubu kínanↄ kũ a bùsu gbɛ̃ zↄ̃kↄ̃nↄ dì suonɛ baasi.
16À sɛ̃gbako zↄ̃kↄ̃nↄ kɛ̀ kũ wura kũ ò gbɛ̃̀gbɛ̃ɛo mɛ̀n wàa do, ń baadi tìkisii kà kiloo aakↄ̃kↄ̃ kũ a kusuo.
17À sɛ̃gbako fítinnanↄ kɛ̀o dↄ, ń baadi tìkisii ye à ká kiloo plapla. À sɛ̃gbako pìnↄ kàtɛ kpɛ́ kũ òdi pi Lɛbana Líkpɛn.
18Kína kíblegba zↄ̃kↄ̃ↄ kɛ̀ kũ wisa sakaao, akũ à wura atɛ̃nɛ kùtɛa.
19Gbàa pì didiki vĩ, a gbápɛki mɛ̀n suddo. A kpɛnaki musu de mↄrↄ kusuru sari. À gã̀sãdikinↄ vĩ, músu taka kũ ò kɛ̀nↄn zɛzɛna gã̀sãdiki pìnↄ sarɛ.
20Músuu pìnↄn zɛzɛna gbápɛki pìnↄa kpa pla, a pínki kà kuri awɛɛpla. Odi gbàa pìi taka kɛ bùsu ken zikiro.
21Kína Sulemanu tokonↄ bi wuraamɛ pínki. Kpɛ́ kũ òdi pi Lɛbana Líkpɛ pↄ́nↄ pínki bi wuraamɛ atɛ̃nɛ. Andurufu pↄ́ke kú gwero, zaakũ òdi andurufu ditɛ pↄ́ke ũ Sulemanu gↄrↄaro.
22Kína gó'itɛnↄ dìgↄ̃ dina ísirala kũ Hiramu gónↄ. Wɛ̃̀ aakↄ̃ pínki òdigↄ̃ su kũ wuraao kũ andurufuuo kũ wisa sakaao kũ gbakũnↄ kũ zã̀nↄ.
23Kína Sulemanu aruzɛkɛ kũ a ↄ̃ndↄ̃o zↄ̃kↄ̃ de andunia kínanↄ pↄ́la ń pínki.
24Baadi pínki tɛn zɛ́ wɛtɛ à wɛ́ si Sulemanulɛ à a ↄ̃ndↄ̃yã kũ Luda dànɛ a swɛ̃̀n ma.
25Wɛ̃̀ sĩnda pínki baadi dìgↄ̃ sunɛ kũ a gbao: Andurufu pↄ́nↄ, wura pↄ́nↄ, utanↄ, zĩ̀kabↄnↄ, pↄ́ gbĩ nnanↄ, sↄ̃nↄ kũ baragbãsↄ̃nↄ.
26Sulemanu sↄ̃gonↄ kũ sↄ̃nↄ kàkara. A sↄ̃go pìnↄ kà wàa suppla, a sↄ̃nↄ sↄ̃ dúbu kuri awɛɛpla. Òdi a sↄ̃ pìnↄ gwa a sↄ̃go wɛ̃tɛnↄ gũn kũ a bɛ Yurusalɛmuo.
27Kína tò andurufu gↄ̃ di Yurusalɛmu lán gbɛ̀ɛ bà, akũsↄ̃ sida lí kũ òdi kpɛ́ boo dasi lán bɛ̀tɛ lí bà sɛ̃̀n.
28Òdi bo kũ Sulemanu sↄ̃ pìnↄ zaa Misila kũ Silisia bùsuuomɛ. Kína lagatarinↄ mɛ́ òdi gɛ́ lúlu gwe.
29Òdi sↄ̃gonↄ lúlu Misila andurufu ↄgↄ mɛ̀n wàa aakↄ̃mɛ, sↄ̃nↄ sↄ̃ mɛ̀n basuppla akuri, akũ àdi ɛra à sↄ̃ pìnↄ yía Iti kínanↄa kũ Siria kínanↄ.
