1Luda gbɛ̃ke bò Yudanↄ bùsun à sù Bɛtɛli lákũ Dikiri dànɛ nà gↄrↄ kũ Yeroboamu zɛna sa'oki pìi sarɛ de a sa o.
2Akũ à lɛ́ kɛ̀ sa'oki pìinɛ à pì: Sa'oki, sa'oki, Dikiri pì oni nɛ́ i Dauda bɛa, oni tↄ́ kpánɛ Yosia. Àkũ mɛ́ ani sa omma kũ tãnagbagbaki sa'ori kũ òtɛn zĩ kɛ lanↄ, ani bisãsiri wánↄ kpátamma.
3Gwe gↄ̃̀nↄ Luda gbɛ̃ pì yã pì kɛna sèedaa òńnɛ à pì: Sèeda kũ Dikiri òn dí. Sa'oki pì ni parakↄ̃rɛ a túbu ni kↄ́tɛ.
4Kũ kína Yeroboamu lɛ́ kũ Luda gbɛ̃ pìi kɛ̀ Bɛtɛli sa'oki pìinɛɛ mà, akũ à ↄ dↄ̀a zaa sa'okia gwe à pì: À a kũ! Akũ ↄ kũ à dↄ̀aa pìi gbã̀gbã, ani fↄ̃ à kòko doro.
5Akũ sa'oki pìi pàrakↄ̃rɛ a túbu kↄ̀tɛ lákũ Dikiri dà Luda gbɛ̃ pìinɛ à ò nà.
6Akũ kína pì Luda gbɛ̃ pìinɛ: Ǹ kútɛ kɛmɛnɛ Dikiri n Ludanɛ. Ǹ wɛ́ kɛamɛnɛ de ma ↄ le à su a gbɛ̀n. Akũ Luda gbɛ̃ pì kútɛ kɛ̀ Dikirinɛ, akũ a ↄ sù a gbɛ̀n lán yã bà.
7Akũ kína pì Luda gbɛ̃ pìinɛ: Ǹ mↄ́ ò gɛ́ ma bɛa ò pↄ́ ble mà gba kɛnnɛ.
8Akũ à pì kína pìinɛ: Bee tó n n aruzɛkɛ kpado kpàma, mani gɛ́ kũnworo. Mani pↄ́ ble ke mà í mi gu dínlo,
9zaakũ Dikiri pìmɛnɛ màsun pↄ́ ble laro, màsun í mi laro, akũsↄ̃ màsun ɛra kũ zɛ́ kũ ma suoooro.
10Akũ à zɛ́ pãnde sɛ̀, adi zɛ́ kũ à sùo Bɛtɛli sɛ́ doro.
11Annabi zĩ ke kú Bɛtɛli gwe. Kũ a nɛ́nↄ sù, ò yã kũ Luda gbɛ̃ pìi kɛ̀ gwe zĩ birea bàba ń denɛ kũ yã kũ à ò kínanɛɛo pínki.
12Akũ ń de ń lá à pì: Zɛ́ kpaten à sɛ̀ɛ? Akũ a nɛ́nↄ zɛ́ kũ Luda gbɛ̃ kũ à bò Yudanↄ bùsun pìi sɛ̀ɛ ònɛ.
13Akũ à pìńnɛ: À gàari yĩmɛnɛ zaakinɛ. Akũ ò yĩ̀nɛ ò a dì a kpɛ.
14Kũ à pɛ̀tɛ Luda gbɛ̃ pìii, akũ à a lè vutɛna gbiri lí gbáru. Akũ à a là à pì: Luda gbɛ̃ kũ à bò Yudanↄ bùsummɛ n ũ yá? À wèa à pì: Makũmɛ!
15Akũ annabi zĩ pìi pìnɛ: Ǹ mↄ́ ò gɛ́ ma bɛa, ǹ pↄ́ ble.
16À wèa à pì: Mani fↄ̃ mà ɛra mà tá kũnworo. Mani fↄ̃ mà pↄ́ ble ke mà í mi kũnwo gu dínlo,
17zaakũ Dikiri pìmɛnɛ màsun pↄ́ ble ke mà í mi laro, akũsↄ̃ màsun tá kũ zɛ́ kũ ma suoooro.
18Akũ annabi zĩ pìi pìnɛ: Annabiin ma ũ lán n bà. Malaika ke mɛ́ à Dikiri yã òmɛnɛ à pì mà pɛ́tɛnyĩ mà su kũnwo ma bɛa, de ǹ pↄ́ ble ǹ í mi. Ama ɛ́kɛn annabii pì tɛn to.
19Akũ Luda gbɛ̃ pìi ɛ̀ra kãao, à pↄ́ blè a bɛa à í mì.
20Gↄrↄ kũ ò vutɛna pↄ́blei, Dikiri yã sù annabi zĩ kũ à sù kãaoo pìia,
21akũ à wiki lɛ̀ Luda gbɛ̃ kũ à bò Yudanↄ bùsun pìia à pì: Dikiri n Luda pì, lákũ n gi a yã mai nà, ńdi yã kũ à ònnɛ maro,
22n ɛra n su n pↄ́ blè n í mì gu kũ à ònnɛ ǹsun pↄ́ blenlo ǹsun í minlo pìi, oni n vĩ kũ n dizinↄoro.
23A pↄ́blena kũ a íminaaoo gbɛra, annabi kũ à sù kãao pìi gàarii yĩ̀nɛ zaakia.
24Kũ à dà zɛ́n, akũ à kpàkũ kũ músuuo, akũ músuu pì a dɛ̀. A gɛ̀ɛ gↄ̃̀ ditɛna zɛ́n, akũ zaaki kũ músuuo gↄ̃̀ zɛna a gɛ̀ɛ pìii.
25Kũ gbɛ̃ kũ òtɛn gɛ̃tɛnↄ a gɛ̀ɛ è wutɛna zɛ́n gwe kũ músu kũ à zɛna a sarɛo, akũ ò gɛ̀ɛ ò a baaruu kpà wɛ̃tɛ kũ annabi zĩ pì kún.
26Kũ annabi kũ à sù kãaoo pì a baaruu mà, à pì: Luda gbɛ̃ kũ à gì Dikiri yã main gwe. Akũ Dikiri a kpà músuua, à a ɛ̀'ɛ à dɛ̀ lákũ Dikiri ònɛ nà.
27Akũ à pì a nɛ́nↄnɛ: À gàari yĩmɛnɛ zaakinɛ. Akũ ò yĩ̀nɛ.
28À dà zɛ́n, akũ à gɛ̀ɛ à a gɛ̀ɛ lè wutɛna, zaaki kũ músuuo zɛi. Músuu pì dí gɛ̀ɛ pì sóro akũsↄ̃ adi zaaki pì ɛ́'ɛro.
29Akũ annabii pìi Luda gbɛ̃ pìi gɛ̀ɛ sɛ̀ à dì zaaki musu à sùo a bɛ wɛ̃tɛn, de à gɛ̀ ↄ́ↄ dↄ à a vĩ.
30Akũ à a vĩ̀ a zĩda mirawɛɛn, à ↄ́ↄ dↄ̀ à pì: Waiyoo ma gbɛ̃!
31Kũ à a vĩ̀ à làka, à pì a nɛ́nↄnɛ: Tó ma ga, à ma vĩ mirawɛɛ kũ ma Luda gbɛ̃ pìi vĩ̀n à ó gɛ̀ kpákũsũ.
32Zaakũ yã kũ Dikiri dànɛ à ò Bɛtɛli sa'oki musu kũ tãnakpɛ kũ ò kú Samaria bùsu wɛ̃tɛ tãnagbagbakianↄ ni kɛ yãpura.
33Bee kũ abireo Yeroboamu dí kpɛ li a yãvãnikɛnaanɛro, à ɛ̀ra à Isaraila buri sĩnda pínki dìtɛ tãnagbagbaki sa'orinↄ ũ dↄ. Gbɛ̃ kũ ò ye ò gↄ̃ tãnagbagbaki sa'orinↄ ũn à ń kɛ́ a ũ.
34Durunna kũ à tò ò Yeroboamu burinↄ dúgu zↄ̃̀ ò làka andunia gũnn gwe.
