1Reoboamu gɛ̀ɛ Sɛkɛmu, zaakũ gwen Isaraila buri sĩnda pínki gɛ̀ɛn de ò a ká kína ũ.
2Kũ Nɛbati nɛ́ Yeroboamu a baaruu mà, akũ à bò Misila à sù, zaakũ gwen à kun zaa gↄrↄ kũ à bàa sì Sulemanunɛ.
3Akũ Isaraila kũ ò kↄ̃ kàkara pìnↄ a sìsi, akũ ò gɛ̀ɛ ò yã ò lɛɛlɛ kũ Reoboamuo ò pì:
4N de zĩ gbãna dàwɛrɛ pãsĩpãsĩ. Mↄkↄ̃n sↄ̃, ǹ zĩ gbãna pì kũ aso tìkisi kũ à dìwɛrɛo lago, óni mì natɛnnɛ.
5Akũ à wèḿma à pì: À tá gĩa ari gↄrↄ aakↄ̃, gbasa à ɛra à su. Akũ ò tà.
6Kína Reoboamu yã pìi gbã̀ gbɛ̃ zↄ̃kↄ̃ kũ ò de a de Sulemanu ìba ũnↄnɛ à pì: Yã kpaten a è à mana mà we gbɛ̃ pìnↄaa?
7Akũ ò wèa ò pì: Tó n mìi nàtɛńnɛ gbãra, akũ n yã mana wèḿma, onigↄ̃ de n zↄ̀blerinↄ ũ gↄrↄ sĩnda pínki.
8Akũ Reoboamu gì gbɛ̃ zↄ̃kↄ̃ↄ pìnↄ lɛ́dammai, à gɛ̀ɛ à yã pìi gbã̀ a ìba kɛfɛnna kũ ò nɛ́ blè lɛɛlɛnↄnɛ.
9À ń lá à pì: Gbɛ̃ kũ ò pìmɛnɛ mà zĩ gbãna kũ ma de dàńnɛ lagońnɛ pìnↄ, yã kpaten a è à mana ò síńlaa?
10Akũ kɛfɛnna pìnↄ wèa ò pì: Gbɛ̃ kũ ò pìnnɛ n de aso tìkisii dìńnɛ ǹ lagońnɛ pìnↄ, ǹ ońnɛ n ↄnɛkparɛ gbìgiri de n de pila.
11N de aso tìkisii dìńnɛ, mↄkↄ̃n sↄ̃, ĩni aso pì karańnɛ. N de wɛ́ tã̀ḿma kũ flã̀aomɛ, ama flã̀ lɛ̀den ĩni wɛ́ tãoḿma.
12A gↄrↄ aakↄ̃de zĩ Yeroboamu kũ Isarailanↄ ɛ̀ra ò sù ò Reoboamu lè ń pínki, lákũ à òńnɛ nà à pì, ò ɛra ò su gↄrↄ aakↄ̃ gbɛra.
13Akũ kína gì gbɛ̃ zↄ̃kↄ̃nↄ lɛ́dammai à yã wèḿma pãsĩpãsĩ.
14À tɛ̀ kɛfɛnnanↄ lɛ́dammai à pì: Aso tìkisin ma de dìárɛ, makũ sↄ̃ mani aso pì karaárɛmɛ. Flã̀an ma de wɛ́ tã̀oáwa, makũ sↄ̃, flã̀ lɛ̀den mani wɛ́ tãoáwa.
15Akũ kína gì Isarailanↄ yã mai, zaakũ yã pìi bò Dikiri kĩnaamɛ, de yã kũ à ò Nɛbati nɛ́ Yeroboamunɛ annabi Ahia, Silo gbɛ̃ gãi le à kɛ yãi.
16Kũ Isarailanↄ è kína gì ń yã mai, ò pìnɛ: Ó bàka kú kũ Daudaoro, ó lɛ́ kú Yɛsɛ nɛ́ yãnlo. Isarailanↄ, á baadi tá a bɛa! Dauda buri, ǹ n zĩda bɛ kũ! Akũ Isarailanↄ tà ń bɛa.
17Isaraila kũ ò kú Yuda burinↄ wɛ̃tɛ gũnnↄn Reoboamu gↄ̃̀ ń kína ũ ado.
18Kína Reoboamu a zↄ̀zĩ gbɛ̃ zↄ̃kↄ̃ Adoniramu zĩ̀ Isarailanↄa, akũ ò a pàpa kũ gbɛ̀ɛo ò a dɛ̀. Akũ kína Reoboamu fùtɛ kũ wãnao à sì a sↄ̃go gũn à bàa sì à tà Yurusalɛmu.
19Lɛn Isarailanↄ gì Dauda burinↄi lɛ ari kũ a gbãrao.
20Kũ Isarailanↄ mà ń pínki kũ Yeroboamu sù, akũ ò a sìsi kↄ̃kakaranaa gũn, akũ ò a kà Isaraila burinↄ kína ũ. Isaraila buri ke dí zɛ kũ Dauda burinↄo doro, tó adi kɛ Yuda burinↄ baasiro.
21Kũ Reoboamu kà Yurusalɛmu, à Yudanↄ kàkara ń pínki kũ Biliaminu burinↄ. Zĩ̀karii pìnↄ gbɛ̃nↄn dúbu bakɛ̃ndomɛ. Akũ òtɛn gɛ́ zĩ̀ ká kũ Isarailanↄ, de ò le ò Sulemanu nɛ́ Reoboamu kpata sínɛ ò kpáa dↄ.
22Akũ Luda yã sù Luda gbɛ̃ kũ òdi pi Semayaa à pì:
23Ǹ o Yudanↄ kína Sulemanu nɛ́ Reoboamunɛ kũ Yudanↄ ń pínki kũ Biliaminu burinↄ kũ gbɛ̃ kparanↄ,
24makũ Dikiri ma pì, àsun gɛ́ zĩ̀ ká kũ á Isaraila dakenↄoro. Á baadi tá a bɛa, zaakũ yã kũ à kɛ̀ɛ pìi bò ma kĩnaamɛ. Akũ ò yã kũ Dikiri òńnɛ mà ò tà.
25Yeroboamu Sɛkɛmu kũ à kú Ɛflaimu gu kpiden bĩni bò, akũ à vùtɛn. Zaa gwen à gɛ̀ɛ à Pɛniɛli kɛ̀kɛ à kàtɛ.
26Akũ à laasun lɛ̀ à pì: Oni Dauda buri ɛra kpatammɛ fá!
27Tó Isarailanↄ tɛn gɛ́ sa o Dikiri ↄnn Yurusalɛmu, oni ɛra ò zɛ kũ ń dikiri Yudanↄ kína Reoboamuomɛ, oni ma dɛ ò zɛ kãao.
28Kũ kína yã pìi gwà, akũ à wura zùsanɛ pì mɛ̀n pla, akũ à pì gbɛ̃nↄnɛ: Isarailanↄ, á gɛna Yurusalɛmu mↄ̀ lɛ. Á dikiri kũ ò á bↄ́tɛ Misilanↄn dí!
29Akũ à a do dìtɛ Bɛtɛli, a do sↄ̃ ari Dã.
30Akũ yã pì gↄ̃̀ńnɛ durunna ũ, òdi gɛ́ donyĩ kɛ a donɛ Bɛtɛli, a do sↄ̃ ari Dã.
31Yeroboamu kpɛ́ bò zùu pìnↄnɛ tãnagbagbakinↄa, akũ à gbɛ̃ dìtɛ sa'orinↄ ũ, bee kũ gbɛ̃ kũ ò de Levi buri ũronↄ.
32Akũ à mↄ sↄraakↄ̃de gↄrↄ gɛ̃rode dìtɛ dikpɛ ũ lán Yudanↄ pↄ́ bà se, akũ à sa ò tãnagbagbaki kũ à kú Bɛtɛli pìia. À sa ò zùsanɛ kũ à pìi pìnↄa, akũ à sa'orinↄ dìtɛ gwe.
33Akũ à sa ò sa'oki kũ à kɛ̀ Bɛtɛli pìia mↄ sↄraakↄ̃de gↄrↄ gɛ̃rode zĩ. Gↄrↄ pìin à dìtɛ a zĩda pↄyeinaaa dikpɛ ũ Isarailanↄnɛ.
