1Ngan ayepe nango le rai sangaul be pai iman a ila, motong la amulu a aye Banabas amlo pang Yerusalem nga. Le nga ye kene tani in akaua Titi lapau a amye amlo.
2Ngan ye yo alo pang Yerusalem nga, yesoo Maro ipaposo lono pau be alo. Bong ye kene tani in agaua di kuto maimai leu a amye di amyepe, inbe apagalanga lodi ye bingi dook mata tani yo aweteweta pang di tooltool yo tipa ye rara kidi Yuda tiap nga. Ngan betanga tani in nen, be Maro ole ikaua yepongo dook mata pang di tooltool yo titoo ger ki nga tiap, bong pang di tooltool yo titara lodi medana pang Kirisi nga. Au i apagalanga di maimai tina ngan nen, yesoo au i lok tar nen, be urata kiau yo ayei muku nga, too yo nookoot ayei nga, ngan ke be ilene sokorai tiap.
3Ngan Titi tani yo amru amyepe i, in tool ke Girik. Bong di kuto maimai tina ngan tiwete touo betanga sa yo be amtoo ger kidi Yuda a be nen ngan amkoro tinini, ngan tiap.
4Ngan ye yo a le amye di amwetewete nen nga, yesoo di tooltool kapala ke kaplungunu tise a se tiyepe kataunu yidi tooltool ke Kirisi dawa ben di ngan di diede kapala. Bong tise be nen a se tigoigoi yidi ye yepongo dook mata yo Yesu Kirisi ikauu paidi i. Di tooltool tina ngan lodi be tasolo urata moonoo kidi Yuda ben di poranga a tatoo ger le momo yo kidi nga.
5Bong nen le am nga o ke be amtar touo kadi manga kasin pa be tiwetewete ye, ngan tiap. Amyei nen a be nen ngan betanga moolmool ke bingi dook mata tani in o ke be tipalele tiap, a be nen ngan katoo dook le imot.
6Ngan di tooltool kuto maimai tina yo tigaua Yerusalem nga, ngan ke be tiwete betanga sa mulu a lo tiseke ye betanga yo kiau nga tiap. Di ngan di tooltool tipayit di ben di nga tooltool edi maimai leu. Bong be edi maimai moolmool too tiap in so mai tiap, yesoo Maro lono ye di tooltool yo edi maimai leu nga tiap.
7Bong di tooltool kuto maimai tina nga, ngan tikilalau ben au i Maro ikaua urata pau be awetewete bingi dook mata pang di tooltool yo tipa ye rara kidi Yuda tiap nga, dawa ben yo ikaua urata nen pang Pita be iwetewete bingi dook mata pang di Yuda nga.
8Nen le Maro tani yo ikaua gurana pang Pita a iyei urata ben aposol a ilon di tooltool ke Yuda i, in ikaua gurana pau lapau be ayei urata ben aposol pang di tooltool yo tipa ye rara kidi Yuda tiap nga.
9Ngan Yemis iye Pita inbe Yowan nga, ngan di tooltool lodi galanga ye di ben di ngan timuku pang di tooltool kuto maimai kapala. Nen le ye kene yo tikilalau ben Maro lono pau a ikaua urata i pau ye lo ponana ki nga, ngan le titoko aye Banabas baemam a be iyei tarkilanga pam ben am nga amye di amgaua lomam ye urata. Ngan le tigaua lodi le atu nen, be aye Banabas ole amkaua urata ye di tooltool yo tipa ye rara kidi Yuda tiap nga, inbe di ngan ole tikaua urata ye di Yuda.
10Inbe tiwete pau aye Banabas be kin le amru lomam tut di tooltool ke Kirisi yo ballingadi tiap ngan a amlon di. Ngan so tina yo kanakana ngan au i lok be ayei ngan nanga.
11Bong ye kene yo Pita tani in isi Antiok ye in nga, ngan le si awete la matana a apasak panga, yesoo ye dada ki yo iyeii a ikapsap ye i.
12Ngan ye kene yo Yemis iwanga di tooltool ki pattu a tidu pang Antiok tiao nga, ngan Pita tani in iye di tooltool ke Kirisi yo tipa ye rara kidi Yuda tiap ngan tigaua ye kaningi so. Bong ye kene yo di tooltool tina ngan tipa le si pombe ye in nga, ngan le Pita iyege di a iyepe manga mooloo ye di, yesoo itattadai di tooltool ke Kirisi yo tikodo le timede ye dada ke koranga tiniidi nga.
13Inbe di tooltool kapala ke Yuda yo titara lodi medana pang Kirisi nga, ngan tiwawa Pita ye dada dook tiap ki yo iyeii i. Ngan ye yo tiyei nen nga, ngan le tikaua Banabas lapau a la itoo di.
14Bong ye kene yo akamata di ngan titoo dada moolmool ke bingi dook mata tiap nga, ngan le awete pang Pita la di le imot matadi nen. Ayei ne, “Ai, ong i tool ke Yuda! E nga yelei a kuyei ben ong i tool kidi Yuda tiap nga? E nga yelei be kumangmang ye di tooltool yo tipa ye rara kidi Yuda tiap nga be titoo dada le momo kidi Yuda nga?”
15Ngan idi nga tipasui idi le tapa ye rara kidi Yuda, le idi nga ben di tooltool ke yeingi noonoo yo tipa ye rara kidi Yuda tiap, ngan tiap.
16Bong lod galanga nen, Maro lono pang di tooltool la titoo ger ki yo ikap pang Mose nga, ngan la be iwete di be di ngan tooltool noonoodi, ngan tiap. Bong di tooltool la titara lodi medana pang Yesu Kirisi ngan leu la be iwete di be di ngan tooltool noonoodi nga. Le idi lapau, idi nga tatara lodo medana pang Yesu Kirisi a be nen ngan Maro iwetidi be idi nga tooltool noonoodoo. Nen le Maro iwetidi be idi nga tooltool noonoodoo ye lodo medana yo tataru pang Kirisi i, bong ye dada ke toongoo ger ke Maro tiap, yesoo ye dada ke toongoo ger in o ke be Maro iwete di be di ngan tooltool noonoodi, ngan tiap.
17Kumata le be tatoo ger ke Maro tiap, bong be tatara lodo medana pang Kirisi a be nen ngan Maro ikamatidi ben idi nga tooltool noonoodoo nga, ngan di tooltool kapala ole tiwete be idi nga tayei noonoo dawa ben di tooltool yo tipa ye rara kidi Yuda tiap nga. Nga yelei, Kirisi la iyei idi le tayei noonoo i? Tiap yege!
18Nen le kumata be apamadit dada yo muku ngan ayege koot nga inbe atoo ger ke Maro mulu nga, ngan ole ipaposau ben au i ke be atoo ger ke Maro tiap.
19Muku ngan akapye be atoo ger ke Maro, bong ngan ger tani in dada yo be tatoo a le Maro iwetidi be idi nga tooltool noonoodoo ye, in tiap. Nen le ayege ger tani dawa ben tool atu imata a iyege tana i oo, a be nen ngan ayepe maurek ye Maro.
20Ngan le dawa ben tipatotau aye Kirisi lo kai palasingi kaini, inbe amru ammata. Le nookoot nga ayepe ger parmana mulu tiap, bong Kirisi la iyepe lok i. Nen le yepongo kiau yo ayepe ye tana i nga, ngan ayepe ye Maro Natunu yo atara lok medana panga, in leu. Ya in lono pau mai san, inbe ya taunu iraia tinini le imot be ilonau.
21Le lok be awala murik pang dada ke Maro yo lono paidi a iyei dada dook mata paidi ye, in tiap. Nen le kumata be tatoo ger ke Maro a be nen ngan tayei tooltool noonoonoo ye Maro matana nga, ngan Kirisi tani in o imata sokorai.
