Galata 2

1

2

3

4

5

6

¹Ehame jara 14 tarame Jerusalem haeo mocwâc fepemurâ Banaba â Tito rocjofape mâmâc fembeŋ.

²Erâ i mâc mi epo, Wofuŋzi dâŋ mufua‐narehuc bufahac qanareme fepo. Ferâ qâpuc jaŋerao Biŋebiaŋ musaweekopac i mutaniŋke‐jarepo. Micne ʒâŋe biŋehec jaŋe bucko wâc ejarekicne, jaŋe hâcne manapie mi sâckeme gie maŋgâŋ bawefuhuc jupo iŋuc ezacte.

³Jupe juju‐nane Tito e Grikŋizi opâ ruakicne juwec, eme e wâc sahacnao mahec eocte mi mucnembiŋ.

⁴Eme nâŋere giemaŋko mitiŋic burecnezi raʒirâ, nâŋe Kristo Jesure erâ rambaŋ juhapene rucko honetâc‐nâporâ Mosere kiŋaŋ qaqa bacnâpozo mueŋgopieŋ,

⁵ŋic izi hâcne bawahac‐nâpozo mupie nâŋe Biŋebiaŋzi ŋoŋerao bâbâsifucnehec ezacte moc mi docke‐jarembeŋ.

⁶Eme ŋic micne jaŋe mârâc jaha iŋuc me iŋuc jumbiŋ, no irec manape hawarine moc mi eekac, Anutuzi iŋuc jaha sahackopec honec‐nâpome bârâwiŋ mi eekac. Ŋic micne jaŋe hâcne dâŋ furune mi ʒuhucke‐narembiŋ.

⁷Aricne, ʒiŋuc ine manambiŋ: Anutuzi Petoro ŋic mahec jaŋerao Biŋebiaŋ muiŋneocte mucnewec, iŋuc jaha no ŋic ma tâmiric jaŋerao muiŋnepere munarewec.

⁸Ehuc Petoro aposolo gie‐ticne baha bafickeme fârinehec ewec, iŋuc jaha no baficnume bape fârinehec jaha wâc ewec.

⁹Eme Wofuŋ e gie tahacke‐narewec, i Jakobo, Kefa â Johane jaŋe Jesure kikefuŋ guru jaŋere jâcne jumbiŋzi mana tararâ no â Banaba âgo bacnâfohuc menâhecko bambiŋ, erâ nâhe qâpuc jaŋerao gie bahapere jaŋe jaŋac ŋic mahec jaŋerao baniŋte mumbiŋ.

¹⁰Erâ hapetacfâc‐jeŋic ehâmo‐jarenaŋte irec sawa nazambiŋ. Eme no irec dâŋ hâcne ʒoɋac erâ muekopac.

¹¹Eme Kefazi Antiokia haeo warerâ wiac babahacnehec eme honerâ maiqanʒaŋ jaha âzâcnepo.

¹²E qanaŋ qâpuczi opâ ruac jaŋehec nânâ wirec nâwec. Ehame Jakobore ŋicfâc fisipie honec‐joparâ mahec jaŋere hâwickeme qâpuckonec opâ ruac bâtâc bajarerâ hone takirec‐jopawec.

¹³Erâ âkeac ehuc ra rowec ware rowec eme Judaŋic gâcne bafickepie Banaba jaŋerao ʒuhuckerâ sâc ijaha ewec.

¹⁴Eme Biŋebiaŋte hata fâretiŋ mi âtepie honec‐joparâ ŋic gâcne jaŋere maio Kefa ʒiŋuc âzâcnepo: “Go Judaŋiczi Judaŋic nâŋâcne eebapao mâcne, qâpuc jaŋere eebapao eekic, izi wemocte qâpuc jaŋe Judaŋic nâŋâcne eebapao eniŋte muekic?”

¹⁵Nâŋâc qâpuc kosa jujune jaŋe iŋucne mi fuambeŋ, Judaŋic fuambeŋ.

¹⁶Erâ ine ʒiŋuc manaŋgopeneŋ: Ŋiczi sâcmutâc dâŋ reŋkehuc kiŋfâsâc eene mi fokac. Eme Kristo e sâcmutâc dâŋ rereŋkere mâcne, mamanasiŋ‐nâŋecte erâ kiŋfâsâc bâcnâpoocte, nâŋâc wâc Jesu Kristo manasiŋkeeŋgopeneŋ. Sâcmutâc dâŋte gie bahuc moczi moc kiŋfâsâc eene mi fokac.

¹⁷Eme Kristorao qohotahuc kiŋfâsâc ezo mueŋgopeneŋzi sifu sâqocne baeŋgopeneŋko weniŋuc muzo? I Kristozi sâqocnere qafeŋ‐nâpoekac me? Aricne, iŋuc mi fokac.

¹⁸Â wiac duckepo i mocwâc heɋârepemu, ine jâmbomac qaqatara ŋic epemu.

¹⁹Â sâcmutâc dâŋzi nume hâmocnepo i Anutu jucnepemurâ epo.

²⁰No Kristohec maripoŋko nukicne. Eme ʒi juekopac i no nahacne mâcne, Kristozi maŋnaneo juekac. Sahachec juju i juekopac, erâ Anutu Ŋokâ‐ticne manasiŋkehuc e sawa jucneekopac. Eki hâcne maŋjauŋ enarehuc juju‐ticne nore due bawec.

²¹No Anutu aki anonoc‐ticne mi qâsuakopac. Sâcmutâc dâŋ reŋkehuc kiŋfâsâc eene fozacko Kristo e maŋgâŋko hâmowec ezac.