Galesia 2

1

2

3

4

5

6

¹Numur tan a noino ma wat na kilalo, a wan melet usapat o Jerusalem, mir nam o Banabas, ma a beni kai o Taitus.

²A wan uni o God ut i inanos iau sur an nan. A etorom det ra di watung det nama kum mugumugu anun a kum tene nurnur. Ra met kut met kis, a inanos det nama Wakak na Wasiso ra a ser warawai nami torom a taro ra awu sur a taro Juda. A nemi sur det in mulaot uni, sur gong i utna oros kut anung a pinapam na warawai tagitiro ut tuk uniri.

³Mir kis tomo nam o Taitus, a te Grik, ikut ka det ungongos pasi sur din tok talilis a pinino, elar nama Warkurai anun a taro Juda.

⁴Met wasiso una utna ri, uni a ramano kum torotoro na tene nurnur det sa ruk eno taru torom a kum tene nurnur, elar nama kum tene longoro eno. Det nemi sur det in longoro wasiso una nundat a kinkinis langolango, ra dat sa utur ukai i tan o Karisito Iesu, sur det in ker tar dat melet una kum Warkurai anun a taro Juda.

⁵Ikut, ka met mulaot pas a wasiso anundet, sur met in mur a warkurai na tinotok talilis. Met nemi sur a lingmulus ina Wakak na Wasiso in kis ut torom mot, ma ken senene.

⁶A taro ra di watung det nama kum mugumugu, ka det pukus a Wakak na Wasiso ri a warawai nami, ma ka det ubek tar lako kum Warkurai anun a taro Juda uni. Ra det a kum mugumugu o awu, ka nuk det. Umatan o God a taro rop det elar kut.

⁷Det tama lele i ra o God ut i pitar tar a pinapam ri tang, sur an warawai nama Wakak na Wasiso torom det ra awu sur a taro Juda, elar nam o Pita kai, ra o God i pitar tar a pinapam toromi sur in warawai nama Wakak na Wasiso torom a taro Juda.

⁸O God i pitar tar a dekdek tan o Pita sur in aposel torom a taro Juda, lenkutkai ra torom iau, i pitar tar a dekdek tang sur an aposel torom det ra awu sur a taro Juda.

⁹O Jems, o Pita ma o Jon, ra a taro det watung detul nama tulu mugumugu, detul tama i ra o God i tabor iau nama marmaris, ma detul mulaot pas mir nam o Banabas sur mir in papam. Detul mulaot sur mir in nan torom a taro ra awu sur a taro Juda, ma detul, detul in nan torom a taro Juda. Ra detul gas pas mir ra met sikan, uni met ara kut una pinapam.

¹⁰Ma detul saring mir sur mir in pam ara utna kut lenri, mir in nuk pas a kum sibo na taro, a pinapam ra iau utkai a nemi sur an pami.

¹¹Ra o Pita i wanpat tong o Antiok, a woso matano lena, i sa raro, uni a utna ra i pami ke tokodos.

¹²Numugu, ra i kis tong o Antiok, i wangon tomo nama taro na lotu ra awu sur a taro Juda. Ikut, a ramano kum te Juda ra o Jems i tulu ru det toromi, det wanpat. Ra o Pita ke wangon tomo melet mo nam det ra awu sur a taro Juda. I kis gisen mukut gusun det, uni i ngaran a taro Juda, det ra det nemi sur din tok talilis a taro na nurnur rop.

¹³Ra o Pita ke wangon tomo melet mo nama taro ra awu sur a taro Juda, a ramano kum te Juda ra det nurnur un o Iesu, det muri mukut a petutna anun o Pita ma det kai det raro tomo nami. Una nundet a petutna ri, det ben raro i utkai o Banabas.

¹⁴Ra a tama i lena, a utna ri, det pami ke elar nama lingmulus ina Wakak na Wasiso, a watungi torom o Pita umatandet rop lena, “Pita, ui a te Juda, ikut u laun elar nama taro ra awu sur a taro Juda. Asau a kibino ra u ungongos pas a taro gisen sur det in mur a kum petutna anun a taro Juda?

¹⁵“Di usus dat a kum te Juda, awu sur dat elar nama taro ra awu sur a taro Juda, ra dat ser watung det lena a kum tene sakino.

¹⁶Ikut, dat tasmani lena o God ke watung taio a tene tokodos uni i mur a kum Warkurai anun o Moses. Awu! O God in watung taio a tene tokodos uni i nurnur kut un o Iesu Karisito. Lenkutkai ra torom dat, dat nurnur un o Karisito Iesu, sur dat in tokodos umatan o God. Dat tokodos uni dat nurnur un o Karisito, ma awu sur i kibino uni dat mur a kum Warkurai. Uni o God ken watung taio a tene tokodos ra i mur a kum Warkurai.

¹⁷“Umatan a taro Juda dat a kum tene sakino, uni dat nurnur un o Karisito, sur dat in tokodos umatan o God, ma ka dat mur a kum Warkurai, sur dat in tokodos umatano. Pepetlai, o Karisito i a kibino ra dat a kum tene sakino? Awu ut!

¹⁸Ikut ra an muri melet a kum Warkurai ra a sa mana taru gusun det, i ese i lena iau a tene lakai warkurai.

¹⁹“Uniri a sa tasmani lena kan tokodos uni a mur a kum Warkurai. A sa mat gusun det. A kum Warkurai ut i ubek tar iau una minat. A mat sur an laun sur o God.

²⁰Di sa ukete tomo tar iau nam o Karisito unin nanai kutus, ma awu sur iau mo ri a laun, o Karisito mukut i laun un iau. A laun nama pining, ikut a laun nama nurnur una Nutun o God, ra i maris iau ma i pitar tar anun a nilaun sur in ulaun pas iau.

²¹A marmaris anun o God torom iau i labo doko, ma kan madek oros ru i kut. Ra gunuk o God in watung taio a tene tokodos, uni i mur a Warkurai, o Karisito i mat oros kut.”