Ɛzala 6 - Bibeli Luayãtaalá

Ɛzala 6

Click on verse(s) to share them!

¹Kí Daliusi yãdìlɛ, ↄ̃ wà lápi wɛ̀ɛlɛ taala pↄ́ wa kàlɛ Babɛli lákalɛkĩiↄ guu.

²Ɔ̃ wà bↄ̀ lá kooawa Ɛbatana wɛ̃́lɛ bĩ́ideu Mɛdɛ bùsuu. Yã́ɛ bee ku a guu, kɛ́ asu sã́ńguo yã́i:

³Kí Kilusi kpalablea wɛ̃̀ sɛ̃́ia guu à yãdìlɛ Lua kpɛ́ pↄ́ kú Yelusalɛũ musu, à mɛ̀ wà kpɛ́pi dↄ sa'okĩi ũ. Wà a ɛ̃bo a lɛsĩ ká gã̀sĩsuu bàaↄ̃, a yàasa gã̀sĩsuu bàaↄ̃.

⁴Wàli gbɛ̀ gbɛ̃̀nɛ di àaↄ̃, lí mɛ̀ndo, gbɛ̀ gbɛ̃̀nɛ àaↄ̃, lí mɛ̀ndo. Wa a fĩabo ń kibɛ ↄ̃ao.

⁵Vua ń ã́nusu pↄ́ pↄ́ Nɛbukanɛza sɛ̀lɛ Lua kpɛ́u Yelusalɛũ à sùò Babɛliↄ sↄ̃, wa ɛa gɛ kálɛ a gbɛu Lua kpɛ́u Yelusalɛũ.

⁶Ɔ̃ kí Daliusi lɛ́kpãsãkɛ̀ à mɛ̀: Tiasa Uflata baale dↄaana Tatɛnai ń Setaa Bozenaio ń á gbɛ̃́ pↄ́ kú Uflata baa weↄ, à ázĩa ga we.

⁷À Lua kpɛ́ dↄ̀na dãↄ to tɛɛɛ. À to Yudaↄ dↄaana ń ń gbɛ̃zↄ̃ↄↄ Lua kpɛ́pi kɛkɛ dↄ.

⁸Málɛ yã́ pↄ́ ásu kɛ Yuda gbɛ̃zↄ̃ↄↄnɛ Lua kpɛ́pi dↄa musu dilɛɛ́. À pↄ́ pↄ́ aa yeiↄ sɛ́lɛ ma làasiu we ń Uflata baale falu pↄ́ wa bↄ̀o, í kpámá píi, kɛ́ zĩpi su zɛ lↄo yã́i.

⁹Pↄ́ pↄ́ aa yei píi, zugaae, sãsakao, sãnɛbↄlↄ pↄ́ aaì Lua Musude gbagbaò, pↄ́wɛna, wisi, vɛ̃ɛ, nísi, àↄ kpa Yelusalɛũ sa'onaↄwa lá gu lɛ́ dↄ lá aa gbɛ̀awáwa pãkpaisai,

¹⁰kɛ́ aa e sa pↄ́ kà Lua Musudegu owà, aai wabikɛwàmɛɛ ń ma nɛ́ↄ.

¹¹Tó gbɛ̃e yã́ pↄ́ má dìlɛɛ bee lìlɛ, wa ade kpɛ́ lí wo, wi aà pawà wà pɛ́lɛ, wi aà bɛ kɛ tufua ũ.

¹²Tó kíae ge buie lɛ́ wɛɛlɛ yã́pi lilɛ ge àlɛ wɛɛlɛ Lua kpɛ́ pↄ́ kú Yelusalɛũpi wí, Lua pↄ́ tò a tↄ́ kú gupiwa, aà ade fu. Ma Daliusi mámɛ ma yã́pi dìlɛ. Wà zĩkɛwà maamaa.

¹³Kɛ́ kí Daliusi lɛ́kpãsãpi kɛ̀ màa, Uflata baala dↄaana Tatɛnai ń Setaa Bozenaio ń ń gbɛ̃́ↄ yã́pi kɛ̀ ń laaio.

¹⁴Ɔ̃ Yuda gbɛ̃zↄ̃ↄↄ kpɛdↄa lɛ́ gɛ́ aɛ lá ãnabi Age ń ãnabi Zakali Ido nɛ́o ãnabikɛkɛ̀wa. Aa kpɛ́pi dↄ̀ wa làa lá Isailiↄ Lua òwa, lá Pɛɛsiↄ kíaↄ Kilusi ń Daliusio ń Aatasasao a yãdìlɛwa.

¹⁵Aa Lua kpɛ́ mìdɛ Adaa gↄↄ àaↄ̃de zĩ́ kí Daliusi kpalablea wɛ̃̀ soolode guuɛ.

¹⁶Ɔ̃ Isailiↄ Lua kpɛ́ sakɛ̃̀ ń pↄnao, sa'onaↄ ń Levii buiↄ ń gbɛ̃́ kĩni pↄ́ sù ń zĩ̀zↄkɛoↄ píi.

¹⁷Lua kpɛ́ sakɛ̃api yã́i aa sa'ò ń zuswanaↄ mɛ̀n basↄo ń sãsakaoↄ mɛ̀n ↄ̀aa do ń sãnɛbↄlↄↄ mɛ̀n ↄ̀aa pla, ↄ̃ aa sa'ò ń blesanaↄ mɛ̀n kuɛpla Isaili bui dasilɛu ampii duun awakpabↄ ũ.

¹⁸Aa sa'onaↄ dìlɛdilɛ gã ń gão, mɛ́ aa Levii buiↄ dìlɛdilɛ gã ń gão lↄ, kɛ́ aa zĩkɛ Luaɛ Yelusalɛũ, lá a ku Mↄizi lá guuwa.

¹⁹Mↄ sɛ̃́ia gↄↄ gɛ̃o mɛ̀ndosaide zĩ́, zĩ̀zↄ pↄ́ sùpiↄ Gɛ̃amusu dikpɛ kɛ̀.

²⁰Sa'onaↄ ń Levii buiↄ gbãbↄ̀ ńzĩaɛ aa gↄ̃̀ gbãlɛsai ḿpii, ↄ̃ aa Gɛ̃amusu sã kòlokpakpa zĩ̀zↄ pↄ́ sùↄnɛ ń ń sa'on deeↄ pↄ́o ń ńzĩa pↄ́o.

²¹Isaili zĩ̀zↄ pↄ́ sùpiↄ mɛ́ sò ń gbɛ̃́ pↄ́ aa gbãlɛa buipãleↄ yã́ musu tò, aalɛ Dii Isailiↄ Lua kĩ́i wɛɛlɛↄ.

²²Ɔ̃ aa Kàaso dikpɛkɛ̀ ń pↄnao e gↄↄ sopla. Dii tò an pↄ kɛ̀na, asa a tò Asiliↄ kía nↄ̀sɛlìlɛ ń yã́ musuɛ, ↄ̃ à dↄ̀ńlɛ a kpɛdↄa zĩ guu, Isailiↄ Luapi.

BREAK EVERY YOKE
Creating and distributing free Bible translations for the web and mobile phones to every tribe on Earth. Click to learn how you can support this work!

Ɛzala 612345678910

Ɛzala 6
1
2
3
4
5
6
7
8
9
10