1Eme ŋicwofuŋ Dariusizi mutâcne‐jareme Babe mâreŋko wiac raŋɋane râe guruc ekicne fic ira babassa gie fuŋkembiŋ.
2Eme juku hae qizec Ekebatana Mede mâreŋko ŋewec ira papia foforiŋkekicnao dâŋ ʒiŋuc qâreŋ‐kekicne i bâfuambiŋ: “Dâŋ binaŋ moc.
3Ŋicwofuŋ Kiruzi fuŋkerâ ŋicwofuŋ ewec jara ira dâŋ moc ʒiŋuc mutarawec: Anuture ufuŋ Jerusalem haeo ŋeha taha â qowi bâzi rike jumbieŋ ufuŋ i mocwâc heɋârerâ bazo. Erâ hobeteŋne i sanaŋnea râezo, erâ hâŋne â otecne i 60 kubi sasawa efârezejec.
4Erâ qânâ i faio fefe râepie arec jahec â moc ezejec, â katapa ine arec mocjaha sawa râezo. Eme irec furi i ŋicwofuŋ kânoŋkonec rozo.
5Erâ wâc Nebukanezazi Anuture taha ufuŋ Jerusalem haeo ŋewec irecnec kuʒi râqâc wiac gol â siliwazi bakicne i rorâ Babe mâreŋko bawarewec i mocwâc Jerusalem haeo bârisierâ Anuture taha ufuŋko ŋeŋe‐jeŋic sâc râezo.”
6Papia i bâfuarâ wosepie Dariusizi dâŋ okacne kecʒiŋuc râe‐jareme rawec: “Eufrata opâ ocniŋucnao mâreŋ fokac irec soŋaŋ Tatenai â Seta‐Boʒinai erâ mâreŋ irec soŋaŋ âgofâc‐ŋeŋic sasawa ŋoŋe mâc behec‐jopaniŋ.
7Behec‐jopapie Anuture ufuŋ irec gie i ʒuhuckerâ baniŋ. Ehame Judaŋic jaŋere mâreŋ soŋaŋ â Juda soŋaŋ micne jaŋe Anuture ufuŋ i mocwâc ŋeŋetac‐ticnao heɋârerâ banʒepieŋ.
8Erâ manaŋgopieŋ, no Juda soŋaŋ micne Anuture ufuŋ heɋârerâ bahapie ŋoŋe kecʒiŋuc ejareniŋte mutâcne‐ŋarekopac: Eufrata opâ ocniŋucnao mâreŋ fokac irec sahac taha moneŋ ŋicwofuŋte kânoŋko huekac i ŋic keci jaŋe biac jâmbâŋ jarenʒepieŋ.
9Erâ sambâŋ Anutu qowi bâzi rikecneniŋte bulimakao ŋicne me lama ŋicne â motecne, me padi me hâwec me waiŋ me wokemaŋ wiac Jerusalem haeo taha bapa jaŋe mupie sâc ʒoaŋne ʒoaŋne ʒuʒuhuc jaha jarehuc junʒepien.
10Iŋuc epie jaŋe Anutu taha bâzi âsu biaŋ rikecnehuc ŋicwofuŋ â ŋokâfâc‐ticne jaŋere erâ numunʒepieŋ.
11Erâ wâc ʒiŋuc mutâcnekopac: Moc e mumutâc ʒi herisierâ moc muocmu e ine ficticnere wâtuŋ neŋgocne i qâunuckerâ âkendâŋnehuc ira bituanʒepieŋ â ficticne ine sesucne fuarâ fozejec.
12Anutu e jahac ʒâŋe‐ticne ira foocte giene bawec, irec ŋicwofuŋ me ŋic izi me izi mumutâc ʒi hetikieocmu me Jerusalem haeo Anuture ufuŋ ŋekac i hetâtieocmuo ine Anutuzi e wâc iŋuc jaha bârârâŋnezejec. Dariusi noni mumutâc ʒi râekopac irec sâc jâmbâŋ aimuŋ efârezo.”
13Eme Eufrata opâ ocniŋucnao mâreŋ fowec irec soŋaŋ Tatenai â Seta‐Boʒinai erâ âgofâc‐jekic jaŋe ŋicwofuŋ Dariusizi dâŋ râehuc mutâcnewec irec sâc aimuŋ jaha ebac embiŋ.
14Ehame Juda soŋaŋ jaŋe porofete Hagai â Ido ŋokâ‐ticne Ʒekaria jahe findaŋdâŋ mupic i bâjâpehuc ufuŋ baku batarambiŋ. Jaŋe Israere Anutu ere mumutâc erâ Perisia ŋicwofuŋ Kiru â Dariusi â Arataʒeʒe jaŋere mumutâc irec sâcko baku batarambiŋ hâcne.
15Eme ufuŋ i Dariusizi ŋicwofuŋ jume jara 6 eha Adari mosa irec ʒoaŋ gie bapa jahec â moc ira bâzickembiŋ.
16Eme Israe ŋic ŋokac â taha bapa â Lewiŋic erâ kâpâcwâru bacjopa rakicnaonec risiembiŋ jaŋe ʒeŋgoma Anuture ufuŋ ʒeri bubiaŋ faio mutirimbiŋ.
17Eme Anuture ufuŋ mutirihuc taha bâzire wiac ʒiŋuc râembiŋ: sasawa ŋicguru ʒare‐jeŋicte sâc sâqocne tâtâmire taha noniŋ ŋicne 12.
18Iŋuc erâ Mosere papia qizecko dâŋ qâreŋkekicne fokac irec sâcko Jerusalem haeo Anuture kiŋaŋ qaniŋte taha bapa guru‐jeŋic sâc â Lewiŋic guru‐jeŋic sâc râec‐jopambiŋ.
19Eme fufuŋke mosare ʒoaŋ gie bapa 14 ira kâpâcwâruo bacjopa rakicnaonec risiembiŋ jaŋe aakic hombaŋ ŋembiŋ.
20Taha bapa â Lewiŋic jaŋe ʒeŋgoma eemasaŋ gie bahuc ɋaɋacke‐fârembiŋ. Irec jaŋe kâpâcwâru bacjopa rakicnaonec risiembiŋ jaŋere biŋe mecne â taha bapa gorewacfâc‐jeŋic jaŋere biŋe mecne erâ wâc jaŋe jaŋacne biŋe mâmâc aakic lama qa hezuc embiŋ.
21Eme aakic lama i Israe ŋic kâpâcwâruonec risiembiŋ jaŋe mecne â mâreŋ rune ŋicne ŋicne jaŋere eebapa repicnaonec hockerâ Israere Wofuŋ Anutu fodapecneniŋte Israe ŋic jaŋerao ʒuhuckembiŋ jaŋe mecne mâmâc nâmbiŋ.
22Ehuc poroŋ goreŋ tâmiric nânâ irec hombaŋ i ʒeri bubiaŋ faioa ŋehapie ʒoaŋ gie bapa 7 tarawec. Wofuŋ e Asiria ŋicwofuŋte maŋ bâtikieme jaŋerao fome Anutu, Israere Anutu hâcne, ere ufuŋ bapa giere bafic‐jopawecte ʒeri bubiaŋ faio hombaŋ ŋembiŋ hâcne.
