Ɛzala 7 - Bibeli Luayãtaalá

Ɛzala 7

Click on verse(s) to share them!

¹Yã́ beeↄ gbɛa Pɛɛsiↄ kí Aatasasa kpalablegↄↄ Ɛzala bↄ̀ Babɛli à sù. Sa'onkia Aalona mɛ́ Ɛleazaa ì, Ɛleazaa Finɛasi ì, Finɛasi Abisua ì, Abisua Buki ì, Buki Uzi ì, Uzi Zelaia ì, Zelaia Mɛlaio ì, Mɛlaio Azalia ì, Azalia Amalia ì, Amalia Aitubu ì, Aitubu Zadoki ì, Zadoki Saluũ ì, Saluũ Ilikia ì, Ilikia Azalia ì, Azalia Selaia ì, ↄ̃ Selaia Ɛzalapi ì.

⁶Ɛzalaá yãdanɛdeɛ, a Mↄizi ikoyã pↄ́ Dii Isailiↄ Lua dìlɛ dↄ̃ sã́asã. Lá Dii aà Lua ↄkùaàla, kía pↄ́ pↄ́ à a wabikɛ̀wa kpàwà píiɛ.

⁷Kí Aatasasa kpalablea wɛ̃̀ soplade guu Isailieↄ sù Yelusalɛũ lↄ. Sa'onaↄ kú ń guu ń Levii buiↄ ń lɛ̀sinaↄ ń bĩ́ibↄlɛdↄ̃anaↄ ń Lua ua zĩkɛnaↄ.

⁸Ɛzala kà Yelusalɛũ kí kpalablea wɛ̃̀ soplade mↄ sↄode guu.

⁹À fɛ̀lɛ Babɛli mↄ sɛ̃́ia gↄↄ sɛ̃́ia zĩ́ɛ, ↄ̃ à kà Yelusalɛũ mↄ sↄode gↄↄ sɛ̃́iazĩ. Aà Lua ↄ kuaàla,

¹⁰asa Ɛzala mɛkpà Dii ikoyã wàaipaawa ń a kɛao, kɛ́ à e aà yãdilɛnɛↄ ń aà ikoyãↄ dada Isailiↄnɛ.

¹¹Taala pↄ́ kí Aatasasa kpà sa'on Ɛzala pↄ́ ì Dii yãdilɛaↄ ń aà yãdilɛnɛↄ da Isailiↄnɛwa yã́n kɛ:

¹²Aatasasa, kíaↄ kía mɛ́ láɛ bee kɛ̃̀ sa'ona Ɛzala, Lua Musude ikoyãdanaɛ. Ma fↄkpàma.

¹³Ma yãdìlɛ ma mɛ̀ Isaili bui ge sa'ona ge Levii bui pↄ́ kú ma bùsuu aa ye gɛnnↄ Yelusalɛũↄ píi, aa gɛ́.

¹⁴Mapi ń ma lɛdamade gbɛ̃ↄn soplaↄ mɛ́ n gbaɛ, kɛ́ ǹ gɛ́ Yelusalɛũ ń Yuda bùsuo píi yã́ gwagwai n Lua ikoyã pↄ́ ń kũa musu.

¹⁵Ãnusu ń vua pↄ́ mapi ń ma lɛdamadeↄ wa Isailiↄ Lua pↄ́ aà bɛ ku Yelusalɛũ gbà sɛ́lɛ wà gɛò

¹⁶ń ã́nusuo ń vua pↄ́ ń è Babɛli bùsuuo píi ń pↄ́ pↄ́ gbɛ̃́ↄ ń sa'onaↄ kpà ń Lua kpɛ́ pↄ́ ũ Yelusalɛũo.

¹⁷Zuswanaↄ ń sãsakaoↄ ń sãnɛbↄlↄↄ lúlu ń ↄ̃apio n laaiwa, ní sa pↄ́ wì a pↄ́ kátɛu à tɛ́kũ oò n Lua kpɛ́ gbagbakĩiwa Yelusalɛũ ń pↄ́wɛnti gbao ń imia gbao.

¹⁸Mpi ń n gbɛ̃́ↄ à kɛ ń ã́nusuo ń vua pↄ́ gↄ̃̀o lá à kɛ̀ɛ́ maawa, lá á Lua yeiwa.

¹⁹Pↄ́ pↄ́ wà nànɛ n ↄzĩ lousisia Lua kpɛ́u pↄ́ ũↄ kpa n Luapiwa Yelusalɛũ.

²⁰Tó ń ye Lua kpɛ́ pↄ́ kĩniↄi, tó a kɛkɛa gↄ̃̀ n yã́ ũɛ, sɛ ma làasiu we.

²¹Mámɛmaa kí Aatasasa, ma yãdìlɛ Uflata baale ↄ'ulɛnaↄnɛ píiɛ. À wabi pↄ́ sa'ona Ɛzala, Lua Musude ikoyãdana kɛ̀wá kpawà gↄ̃̀ↄ píi.

²²Ãnusu su dɛ tↄnu àaↄ̃ao. Pↄ́wɛna su dɛ tↄnu baakwiao. Vɛ̃ɛ ń nísio su dɛ litili ↄ̀aa baobaoao. Wisi sↄ̃, lá a yei lɛ́u.

²³Lá Lua Musude dìlɛ píi, à kpa gↄ̃̀ↄ aà kpɛ́ pↄ́ ũ, kɛ́ asu kpɛ̃nɛkɛ ń ma kíakɛo ge ma nɛ́ↄo.

²⁴Àↄ dↄ̃ sↄ̃ kɛ́ á zɛvĩ à falu ge ɛlɛ'ↄ̃a ge wɛ̃̀'ↄ̃a sí Lua ua zĩkɛnaↄ ge sa'onaↄ ge Levii buiↄ ge lɛ̀sinaↄ ge bĩ́ibↄlɛdↄ̃anaↄ ge zĩkɛnpãleↄwao.

²⁵Mpi sↄ̃ Ɛzala, yã́kpalɛkɛnaↄ ń yãgↄ̃gↄ̃naↄ dilɛdilɛ ↄ̃nↄ pↄ́ n Lua kpàma lɛ́u, kɛ́ aa yãkɛkɛ a zɛ́wa gbɛ̃́ pↄ́ kú Uflata baaleↄnɛ píi. Aaↄ dɛ gbɛ̃́ pↄ́ aa n Lua ikoyã dↄ̃ↄ ũ. Gbɛ̃́ pↄ́ dↄ̃oↄ sↄ̃, dadanɛ́.

²⁶Gbɛ̃́ pↄ́ n Lua ikoyã ń bùsu ikoyão kũa ↄplaplao, wa yãdaaàla, aà dɛa ge aà ya bↄa bùsuu ge aà àizɛɛ siawà ge aà daakpɛun nò.

²⁷Ɔ̃ Ɛzala mɛ̀: Wà Dii wá deziↄ Lua sáaukpa! À làasoo maa dà kíɛ a sↄ̃u, ↄ̃ kípi gbãakpà aà kpɛ́ pↄ́ kú Yelusalɛũwa màa.

²⁸A tò ma yã́ kà kía ń a lɛdamadeↄgu ń aà ìwa gbãaↄ píi. Lá Dii ma Lua ↄ kuamala, ma sↄ̃dìlɛ, ↄ̃ ma Isaili dↄaanaↄ kã̀aa aa gɛmanↄ.

BREAK EVERY YOKE
Creating and distributing free Bible translations for the web and mobile phones to every tribe on Earth. Click to learn how you can support this work!

Ɛzala 712345678910

Ɛzala 7
1
2
3
4
5
6
7
8
9
10