Yowan 11:32-55

³²Madia imale a ila pombe ye ni tani yo Yesu iyepe ye i, le nga ikamata, motong la igun turunu du Yesu kene punu ke dama, inbe iwete panga. Iyei ne, “Tool Mai, nga yo be kuyepe ni nga, ngan matin nga le lik imata tiap.”

³³Ngan Yesu ikamata tina yo itang, inbe di Yuda yo titoo a tiye timan nga, ngan titang lapau nga, le nga Yesu lono gurrungu inbe katen pas.

³⁴Motong la itor di nen, “Ni nangai kataru ye i?” Motong la tiwete panga nen, “Tool Mai, kuman man kumata.”

³⁵Yesu la ikamata le nga itang.

³⁶Ngan di Yuda tikamata tina yo itang nga, le nga tiyei ne, “Kakamata nga, ya ni lono pang tool ni mai san.”

³⁷Bong ngan di diedi kapala tiyei ne, “Ya ni ikarata tool yo matan kis in le matan rere mulu, e nga yelei a lono be ilono tool ni a nen ngan imata be, tiap nga?”

³⁸Yesu ipa le la pombe ye agoro tani yo titara Lasarus bobono ye i, le nga lono dook tiap, inbe katen pas mulu. Ngan agoro tani in iken ke kawal madini. Inbe pat somai atu la titapulu la tikatkala agoro koonoo ye i.

³⁹Motong la iwete pang di nen, “Oo, kapulu pat in a ikoo.” Ngan tool tani imata in lini yo Mata i, in iwete panga nen, “Tool Mai, nookoot nga o ikini a dook tiap oo, yesoo imata a iken ye ke pai oo.”

⁴⁰Motong la Yesu iwete panga nen, “Muku ngan awete pong be kutara lom medana pau, ngan ole kumata gurana mai ke Maro.”

⁴¹Yesu iwete nen, le nga tipulu pat tani yo tikatkala agoro koonoo ye i. Motong la itada pang ete, inbe iyei ne, “Tamak, au i lok ponana pong yo kulongo pataraungu kiau nga.

⁴²Au i lok galanga, ong in kanakana ngan kulongo kook. Bong lok ye di tooltool yo tikododo ni nga, ngan la le awete nen, a be nen ngan titara lodi medana nen, be ong in la kuwangau a asi i.”

⁴³Yesu iwete nen a imot, motong la koonoo le mai nen, “Lasarus, kupas a kusi tana!”

⁴⁴Yesu koonoo nen, motong la Lasarus tani imadit a ipas a isi tana. Ngan le ipa ye wam tina yo tipiu kene le baene le damono ye nga. Motong la Yesu iyei ne, “Kagoolook wam ngan ye, inbe kawete panga a ila.”

⁴⁵Di Yuda tina yo timan be man matadi so Madia nga, ngan tikamata so yo Yesu iyeii i, le nga di alunu la titara lodi medana panga nga.

⁴⁶Bong di kapala ngan tila pang ye di Paresi la tiwete pang di ye so tani yo Yesu iyeii i.

⁴⁷Motong la di tooltool maimai ke paroranga so pang Maro tiye di Paresi tikiu di tooltool kuto maimai kidi Yuda yo matadi kala di ye momo le yepongo kidi nga, ngan man tigaua, inbe tiwete pang di. Tiyei ne, “Ai, nga ole tayei belei? Tool ni iyei gogo mos matana matana alunu san a iyei ben tarkilanga panga oo.

⁴⁸Kumata le tapatauu be iyei nen nga, ngan ole di tooltool le imot titara lodi medana panga. Lo ngan di Rom ole timan man tigarung di tooltool kiidi tipa ye bareme mai kiidi yo ke sungunu i.”

⁴⁹Motong la edi atu yo ene Kepas i, in iyei tool mai ke paroranga so pang Maro ye rai tani in, in iwete pang di nen, “Ang nga lomim galanga ye so siap yege!

⁵⁰Ang nga lomim galanga ye dada atu yo be ilonang, in lapau? Dada dook mata in nen: Kumata be tool atu ikol di tooltool kiidi a imata nga, ngan ole di tooltool kiidi le imot sa tilledi tiap.”

⁵¹Kepas iwete betanga nen ye ya taunu lono tiap, bong iyei tool kuto mai ke paroranga so pang Maro ye rai tani in, ngan la le iwete betanga ben di Maro koonoo ye Yesu yo be imata a nen ngan ilon di Yuda i.

⁵²Ngan imata nga, ngan be ilon di Yuda leu tiap, bong be igaua Maro di natunu le imot yo timagirigiri a tiyepe nin la nin nga, a be nen ngan man tigaua ye budanga atu.

⁵³Le nga ye ke tani in a ilo nga, ngan di tooltool maimai kidi Yuda tigaua a tirau betanga, inbe tisere dada yo be tiraua Yesu ye a imata i.

⁵⁴Ngan nen le Yesu ipa mallangana mulu la di Yuda matadi tiap, bong iyege ni tani in, inbe ila iyepe ye ni atu yo iken potai pang ye ni sorrakene i. Ila pombe, motong la iye di galiunu sila tiyepe ye malala atu ke ni tani yo ene Epraim i.

⁵⁵Ye kene tani in lal maiyoko kidi Yuda yo be lodi tut ye Paskimoolooningi ke Maro i, in potai be pombe. Le nga di Yuda yo tiyepe ye malala kapala nga, ngan alunu tilo pang Yerusalem be lo titoo momo kidi Yuda a di tapdi tiyei di le tinidi galanga ye Maro matana muku ngan, lo ngan be lal ke Paskimoolooningi tani in pombe.