San Juan 11:32-55

³²Chi bidxinm lod zaꞌ Jesús, bazuxibim lojman rëbim: ―Dad, bal nizujl guie, ad ziant niëjt da zanan.

³³Chi baguiaaman roon Li con ree bén Israel nal laam, dád gognaa luxdooman guyu naya tëëman.

³⁴Dxel gunabdiidxaman rëbaman: ―¿Ban biquieꞌchidi laax? Abiꞌ rëb reeman: ―Dad, guda nial din guguiaal.

³⁵Dxel biinman.

³⁶Abiꞌ rëb ree bén Israel guin: ―Gol baguiaa nial dád guyënman laax.

³⁷Per yuꞌ reeman rëb: ―Bén guinan baxhal guiaaloj tijb bén ad ranit loj. Yan, ¿niche niajc nüjnman yaꞌn chitëë niëjt Lazr?

³⁸Dád guyu naya luxdoo Jesús stijb, chi gubigaman roꞌ xbaa Lazr. Najn tijb guiajbiliaa, nadaꞌcw tijb guiaj roꞌn.

³⁹Dxel rëbaman: ―Gol biquied guiaj guin. Per Mart, bizan xingüt guin, rëbim: ―Dad, ma rliaam nadxuudx, din ma gojc tajp dxej ni gütim.

⁴⁰Badxiꞌ Jesúsan rëbaman: ―¿Nid rnin ya, bal rliladxil, guguiaal xguialrniabee Dios?

⁴¹Dxel bisüd reeman guiaj guin. Zianz gules loj Jesús xanyabaa rëbaman: ―Dad, quixtëë lüj guial ma bacaagdiajguil ni rnin.

⁴²Naj ragbeechaaw guial zianczi rucaagdiajguil ni rnin. Per rnin zian por ree bén rigaꞌ guie, din chililadx reeman guial lüj guxhaal naj.

⁴³Chi gulox rëbaman zian, dxel guridxaꞌman rëbaman: ―¡Lazr, barii yagaj!

⁴⁴Dxel barii Lazr lën baa guin nalüüb vend yaax con guiaꞌx, guiáad lojx nayaaw lajd. Dxel rëb Jesús loj reeman: ―Gol baxhiequix, gol baslaax yaguiajx.

⁴⁵Dád zien ree bén binal Li bililadx Jesús, guial baguiaa reeman milagr beenman.

⁴⁶Per yuꞌ reeman bicojn bénfarisew ree ni been Jesús.

⁴⁷Dxel bénfarisew ree në ree bixhioz rniabee, bachajg lasaꞌ reeman con los demazri ree guxtis, rëb reeman: ―¿Xhienaag yaguieen ree yaꞌn, din dád zien milagr cayüjn xin guin?

⁴⁸Bal yadëëd ree mod, graczi bejn guililadx laax, dxel guxtis Rom ree guidganijt reeman dux yadoo ree në dux nacion ree.

⁴⁹Per loj reeman yuꞌ bén la Caifás, bixhioz zojbloj rniabee loj ijzsii, rëbaman loj reeman: ―¿Nid ragbeedi ya,

⁵⁰nid rigniaꞌ tëëdi ya, zagdxe na̱j guiët tijbzi bejn por gra bén Israel, luar nit dux nacion ree?

⁵¹Per Caifás guin ad ni naladxtzaman rëbaman. Guial najman bixhioz zojbloj rniabee loj ijzsii, zeel badëëd Dios ni guneeman, guial guiët Jesús por gra ree bén Israel.

⁵²Abiꞌ ad por laatzi reeman, par gac reeman tijbzi con gra ree xbejn Dios, bén rigaꞌ ree guidib guidxliuj.

⁵³Zeel diizd dxejzii bayaꞌn reeman diidx gugüjt reeman Jesús.

⁵⁴Zianan zeel ad contzi rulüülojtraman loj ree bén Israel, bazaman yagaj ziaman guiedx la Efraín, najn gajxh yujbidx, yagaj guzunë ree xbejnman.

⁵⁵Dxejzii ree ma zidyob pascw, lanij rüjn ree bén Israel, dád zien ree bén guiedx ree zë Jerusalén din güün reeman ziꞌc na̱j xcostumbr reeman par gac reeman naya loj Dios chi gad pascw gal.