John 11:32-55

³²Mary Jesus-warl apetyek, ampwethel-atherr arrernelhemel. Ra renh ilek, “Ingkartay! Nga awank-antey nhenh-warl apey-alhemer, ayteyaty atyenh iteth-anteyarl anemer.”

³³Jesus-el arek, rarl artnenh, Jew ingwer-rnem artnenh arrpemarl. Ranem amperrngirrek ikwer-rnem.

³⁴Ra renh-rnem ayernek, “Nthenh-warl arrantherr arrewaly renh irrtyert-akwernek?” Rernem renh ilek, “Ingkartay apetya, intwaretyek.”

³⁵Jesus-anem artnek.

³⁶Jew-rnem angkerrek, “Ran Lazarus-ek artewentyel ilkelhek.”

³⁷Ingwer-rnem alakenh angkerrenh, “Ra artwa aparrngantarl annga rlkelhilek awankan rlterrk ilkwakert, ran apetyey-angenh arrewaly yanh mwerriletyek!”

³⁸Jesus aleth-antey amperrngirrenh. Ra intey-warl alhek intwaretyek. Intey-itwek rernem apwert ilkwa arriw arrngertewek Jesus-el arey-alhek.

³⁹Jesus-el renh-rnem ilek, “Apwert ilkwa yanh arnangelhilenherr-arey arriw-they.” Martha angkek, “Ingkartay! Arrewaly ayntek arlta 4-ek-atwety, aley-anem ra arrewaly inteng-anem inteyel.”

⁴⁰Jesus angkek, “Atha ngenh kel ilek, ntwa ayenh tnakenty, ntwap areyenh, Akngey rlterrk ilkwakert inngarl aneyel!”

⁴¹Rernem apwert renh arnangelhilek intey-they. Jesus-arl alker-warl itnywenemel angkek, “Akngeyay! Ayeng ngkweng inkwerelheyel, ntwarl ayenh awek.

⁴²Ayeng kel akalty ntwa ayenh aleth aweyel, ayengarl angkeyel-anem, nhenh-rnem akalty anetyek, ntwarl ayenh thwenek.”

⁴³Ikwer-penhan Jesus artewentyel arlkek, “Lazarus-ay! Kel tyerrelha!”

⁴⁴Lazarus ranem tyerrelhek intey-they arrewaly-kenh arnkwakert-antey. Rernem arnkwa renh iltya ingkethey lheley-angenh-antey. Rag-el inngerr artelhenh-antey. Alakenh Jesus-el renh-rnem ilek, “Arnkwa ikwer-they lhelenherr-arey, ra apmer-warl alpey-akenh.” Akngerrel Jesus renh tnakenh, rernemarl renh arek, rarl Lazarus renh itethilek.

⁴⁵Ingwer-rnem Mary-kenh apmer-warl alhek-rnem, rernem Jesus renh arek, ra Lazarus renh itethilek arrewaly-penh. Rernem Jesus renh-anem tnakemel apentek.

⁴⁶Ingwer-rnem alpek Jerusalem-warl. Rernem Pharisee-rnem iley-alpek, Jesus-elarl Lazarus renh itethilek.

⁴⁷Pharisee-rnem anyentirrek, rernem angkerretyek atyetyart ingwer-rnem-then. “Nthakenh anwantherr artwa renh ileman? Ra ilek-ilek mpwareyel rlterrk ilkwakertel.

⁴⁸Anantherr renh arternpiletyek rernem renh apentekerr, Rome-areny atyetyart-rnem anwekantherr ahelirrekerr. Rernem tyaty ilkwa atakekerr, anwenhantherr Israel-areny-rnem atwekerr arrpemarl.”

⁴⁹Council-rnem artwa anyent itnan Caiaphas-arl. Ra ingkart atyetyart anenh tyaty ilkwitwek. Ra ingwer-rnem-warl angkek, “Arrantherr arwengkarl, iterl-arey-angenh!

⁵⁰Anwantherr renh menty tyarlewenty atwey-angenh, Rome-arenyel-rnem anwenhantherr ingkerrenh-antey atwem. Anwantherr artwa anyent atwenty, Rome-arenyel-rnem anwenhantherr menty arem atwey-angenh. Alakenh-angkwarr ra katy ilwetyek ingkerrenhek.”

⁵¹Caiaphas ra ament angkey-angenh, Ingkart-kenh-angkwarr arrwekel angkek arraty-angkwarr, Jesus ra Jew ingkerrenhek katy ilwem, rernem iteth anetyek.

⁵²Arraty innga Jesus ra Jew-rnemekant katy ilwey-angenh. Ra Ingkart-areny ingkerrenhek ilwek, apmer arrpanenh-areny-rnemek, renh-rnem anyentelhiletyek.

⁵³Ikwer-penhan Jew-kenh atyetyart-rnem iterrenh, nthakenh rernem Jesus renh ipmek atwetyek.

⁵⁴Jesus-el iterl-arek, Jew-rnemarl ikwer angkerrenh, renh atwetyek. Alakenh-they ra Judea-ampenyel alhey-angenh, ingkerrenhel renh arekerr. Ra Jew-rnem-kenh atyetyart-rnem-kety arlengkewelhek. Ra tawen akely-warl alhek arlengkewelhemel, itnan Ephraim, apmer arlpaw-they arrerentyel. Ra ikwer-itwek anenh kwertengerl ikwerenh-rnem-akert.

⁵⁵Jew-rnem Jerusalem-warl akarrirrenh apmer arrpanenh-they, Anperarl Alhek “Passover” tyenkerr arlkwetyek. Arlta arrerirrek arrpemarl. Rernem tyenkerr atyenhilek, akngerrel arlkwetyek.