ዮሃኒሳ 11:32-55

Click on verse(s) to share them!

³²ማይራማ ዬሱሲ ዴዒያሳ ባዴ ዬሱሳ ቤዔዳ ዎዴ፥ ኣ ጌዲያ ቦላን ኩንዳዱ፤ «ጎዳው፥ ኔኒ ሃዋን ዴዔዳዋ ጊዲንቶ፥ ታ ኢሻይ ሃይቄና ሺን!» ያጋዱ።

³³ዬሱሲ ኢዛ ዬኪያዋኔ ቃሲ ኢዚና ዬዳ ኣዪሁዳቱካ ዬኪያዋ ቤዒዴ፥ ባሬ ዎዛናን ዳሮ ሴሌቴዳ፤ ቃሲ ቶኪ ሼምፔዳ።

³⁴ኡንቱንታ፥ «ሃቃን ሞጌዲቴ?» ያጊዴ ኦቺና፥ «ጎዳው፥ ያዴ ቤዓ» ያጊዴ ዛሬዲኖ።

³⁵ዬሱሲ ኣፎፄዳ።

³⁶ሄዋ ዲራው፥ ኣዪሁዳቱ፥ «ኣሊዓዛራ ኢ ኣይ ኬና ሲቂንቶ ቤዒቴ!» ያጌዲኖ።

³⁷ሺን ኡንቱንቱፔ ኢቱ ኢቱ፥ «ሃዌ ቆቃ ቢታኒያ ፄሊሴዳዌ ሃ ቢታኒ ሃይቄናዳን ኡዳናው ዳንዳዬኔ?» ያጌዲኖ።

³⁸ዬሱሲ ቃሲካ ዎዛናፔ ቃሬቲዴ፥ ኣሊዓዛር ሞጌቴዳ ዱፉዋኮ ቤዳ፤ ሄ ዱፉ ጎንጎሉዋ ጊዲዴ ሹቻን ቁምዔቲ ኡቴዳ።

³⁹ዬሱሲ፥ «ሹቻ ዲጊቴ!» ያጊዴ ኣዛዜዳ። ሃይቄዳ ቢታኒያ ሚቻታ ማርታ፥ «ጎዳው፥ ኢ ሃይቆዴፔ ኦይዱ ጋላሳ ጊዴዳ ዲራው፥ ሃዒ ፂንቃናዋ!» ያጋዱ።

⁴⁰ዬሱሲ ማርቶ፥ «ኣማኒያዋ ጊዶፔ፥ ኔኒ ፆሳ ቦንቹዋ ቤዓናዋ ታኒ ኔው ኦዳቤይኪታ?» ያጌዳ።

⁴¹ኡንቱንቱ ሹቻ ዴንꬄዲኖ፤ ዬሱሲ ሳሉዋ ፑዴ ፄሊዴ፥ «ኣዎ፥ ታኒ ጊያዋ ኔኒ ሲሴዳ ዲራው፥ ኔና ጋላታይ።

⁴²ኔኒ ኡባ ዎዴ ሲሲያዋ ታኒ ኤራይ፤ ሺን ሃዋን ዩዪ ኣꬊዴ ኤቄዳ ኣሳይ ኔኒ ታና ኪቴዳዋ ኣማናና ማላ፥ ሃዋ ታኒ ኡንቱንቱ ዲራው ጋይ» ያጌዳ።

⁴³ዬሱሲ ሄዋ ጌዳዋፔ ጉዪያን፥ ባሬ ቃላ ꬎቁ ኡዲዴ፥ «ኣሊዓዛራ፥ ሃ ኬሳ!» ያጌዳ።

⁴⁴ሃይቄዳ ኣሊዓዛራ ኩሺኔ ጌዲ ሻሉዋን ቃሼቲ ኡቲዴ ኣ ዴሙካ ኣፊላን ካሜቲ ኡቴዳዌ ኬሲና ዬሱሲ ኡንቱንታ፥ «ቢሊ ኣጊቴ! ቦ!» ያጌዳ።

⁴⁵ሄዋ ዲራው፥ ማይራሚኮ ዬዳ ኣዪሁዳቱዋፔ ጮራቱ ዬሱሲ ኦꬄዳዋ ቤዒዴ፥ ኣ ኣማኔዲኖ።

⁴⁶ሺን ኡንቱንቱፔ ኢቱ ኢቱ ፓሪሳዋቱዋኮ ቢዴ፥ ዬሱሲ ኦꬄዳዋ ኡንቱንቱሲ ኦዴዲኖ።

⁴⁷ሄዋፔ ጉዪያን፥ ቄሳቱዋ ካፓቱኔ ፓሪሳዋቱ ያዓ ሺሺዴ፥ «ሃ ቢታኒ ዳሮ ዎልቃማ ማላታ ኦꬂያ ዲራው፥ ኣያ ኦꬃኔ?

⁴⁸ኑኒ ኣ ጮዑ ጊዴ፥ ኣጎፔ፥ ኣሳይ ኡባይ ኣ ኣማናናዋ፤ ቃሲ ሮሜ ጋዲያ ኣሳቱ ዪዴ፥ ኑ ጌሻ ጎሊያኔ ኑ ኣሳ ꬋዪሳና» ያጌዲኖ።

⁴⁹ኡንቱንቱፔ ኢቱ ቃያፋ ጊያ፥ ሄ ላይꬂ ቄሳቱዋ ኡባቱዋ ካፖ ጊዴዳዌ፥ «ሂንቴንቱ ኣይኔ ኤሪኪታ!

⁵⁰ኣሳይ ኡባይ ꬋዪያዋፔ ኣሳ ኡባ ዲራው፥ ኢቲ ኣሳይ ሃይቂያዌ ሎዓ ጊዲያዋ ሂንቴንቱ ኣኬኪቴ?» ያጌዳ።

⁵¹ኢ ሄዋ ባሬፔ ጊቤና፤ ሺን ሄ ላይꬂ ቄሳቱዋ ኡባቱዋ ካፖ ጊዲያ ዲራው፥ ዬሱሲ ኣዪሁዳ ኣሳ ዲራው ሃይቃናው ቤሲያዋ ናቢ ኦዴዳ።

⁵²ቃሲ ዬሱሲ ኣዪሁዳ ኣሳ ፃላላው ሃይቄና፤ ሺን ላሌቲ ዴዒያ ፆሳ ናና ኢቱዋ ኡዲ ሺሻናው ሃይቃናዋ።

⁵³ሄ ጋላሳፔ ዶሚዴ፥ ኡንቱንቱ ኣ ዎꬋናው ማቄቴዲኖ።

⁵⁴ሄዋ ዲራው፥ ዬሱሲ ኣዪሁዳቱ ጊዱዋን ቆንጪያን ያ ሃ ሃሜቲቤና፤ ሺን ሜላ ቢታ ጋፃን ዴዒያ ጋዲያ፥ ኤፊሬማ ጌቴቲያ ካታማ ቤዳ። ባሬና ካሊያዋንቱና ሄዋን ታኬዳ።

⁵⁵ኣዪሁዳቱ ፓሲጋ ቦንቺያ ጋላሳይ ማቴዳ፤ ቃሲ ዳሮ ኣሳይ ባሬና ጌሻናው፥ ፓሲጋ ቦንቺያ ጋላሳይ ጋካናፔ ካሴ ዱማ ዱማ ሳፔ ዬሩሳላሜ ቤዳ።