Sion 11:32-55

³²Navong Meri rokol out koa Iesu mul ien, lesi ka retengeiril vesesal ven alen Iesu ka murang vit, “!O Asuv, vahit kovato ekok, tuak onak varmattei!”

³³Navong Iesu lesi mul murang mukok, ka lesi mukave meatin keil koa aro ral mini emun amul amurang, longe tisa ka tin mis.

³⁴Kei vis keil vit, “?Mirahini en out kave?” Avit kesi avit, “Asuv, amai lesi.”

³⁵Navong uva, simeten Iesu motmot.

³⁶Ka koakeil alesi aviteni avit, “Milesi. En vat tunali mok.”

³⁷Ka tei en keil aviteni avit, “Kei sakin meatin koa meten var mai lele eris. ?Vensa varei sakras vasak revi Lasaros keke varmattei?”

³⁸Navong arokol valengeihat tatetahinien, Iesu longe tisa eris. Lesi keke arein mari ahat tai ring koe metareh ten valengeihat enek.

³⁹Sakini, Iesu viteni vit, “Altei lat ahat vaha.” Marata, ahinen meatin koa mat, vit kesi vit, “Asuv, vite vo tuai veni emat avong ehat tuai.”

⁴⁰Ka Iesu viteni mini vit, “Naviteni tuai minuk keke kiles keihoen onen Ahi munak kikur anatin eni.”

⁴¹Sakini, meatin keil arei lat ahat eva. Evus, Iesu lele vina nesa ka vit, “Tata, namasmasuk veni komul kolong inau.

⁴²Nakilea keke lisenges komul kolong inau, ka navit lein selusien koanek ven meatin keil ekek, vasakin keil ikur anatin eni keke kosan inau numai.”

⁴³Navong viten selusien enek evus, Iesu viso keih vit, “!Lasaros, amai hae!”

⁴⁴Ka meatin koa mat mea mai hae. Mavuli kaliko tatetahinien keil amul veah apar kat aven vasi, hen ka alen ka veinan emun. Sakini, Iesu viteni min keil vit, “Alleh lat kaliko rani ka mihemaeni hemaluv heha.”

⁴⁵Navong Siu keil koa amusil Meri ales asa koa Iesu mumoni, keil akur anatin eni.

⁴⁶Ka tei en keil uva ven Farasi keil, ka avit meseini min keil asa koa Iesu mumoni.

⁴⁷Sakini, Farasi keil ka asuv keil onen pris keil avise ruain Kaonsel one. Navong alah ruai, avis keil eris avit, “?Rehoumon sa varei hetal min Iesu? Kei mules mumon merikel keil houlu.

⁴⁸Munak reheles rehemaeni hel houm hemukonek, meatin vasi keil ikur anatin eni ka isak visi keke umoni hemai hehi asuv houlu one. !Hemukonek, me-Rom keil imai ka u lin Eim Votut orer, ka u vinvini meatin vasi keil en kantri orer ten out Isrel!”

⁴⁹Tai en Kaonsel, isen Kaiafas. Kei vi asuv houlu onen pris keil ten sua koanek. Ka navong long selusien onen koakeil ten Kaonsel, viteni min keil vit, “!Kami mireingeingen tounah!

⁵⁰Hetahos imok munak meatin hetas hemat en usite onen meatin keil, helin munak rehemaen me-Rom keil imai u vini me-Isrel vasi keil.”

⁵¹Kaiafas rovitentei selusien koanik en rendemien onen enges. Ka, en umen onen suval asuv houlu onen pris keil ten sua koanek, kei vit luvati keke Iesu hemat hehinat me-Isrel vasi keil.

⁵²Ka vit luvati emun keke Iesu hemat en usite onen koakeil vasi avi onen Ahi koa amul en kantri savsav keil keke helah ruain keil vasi imai ihi vangi meatin hetas.

⁵³Sakini, en hati avong enek va, hetetamen keil onen Siu keil amumon lingkatien tai keke u vini Iesu.

⁵⁴Sakini Iesu romualtei mun en mesai en meten Siu keil. Lokovein out enek ka eva en meteimal tai, isen Efrem, koa mul vesesal en out volvol. Ka ro ekonek ral min meatin onen keil avong vahis.

⁵⁵Anien ten Mul Laui mai vesesal, ka Siu keil houlu aka en out savsav keil koa mul seh, ka amul avina en out Serusalem. Amul uva keke avoumon sakien keil koa vasakin keil avato mau keke akilea avoumon tounah ten ale enek.