Yesu Tɔ̃rɛ̀ 10:24-35

²⁴Di wentírì kɛ̀ bɛ̀ ntuɔ̀kòo Sesɑdee kɛ sɔ̃́ nKɔrinɛi yu o cĩ́ɛ̃̀tɛ̀ kɔbɛ bɛmɔu nɛ̀ o nɛ́posɑ̀ɑ̀bɛ̀ kɛ̀ bɛ̀ ò bɑ̀ɑ.

²⁵Kɛ̀ Piɛri ńtɑtoo kɛ̀ Kɔrinɛii ítɛ́ kóò co kɛ́nínkóo o ììkɛ̀.

²⁶Kɛ̀ Piɛrii ò íinní kɛ dɔ̀: N tú ɑ nititɔù nwe.

²⁷Kɛ̀ bɛ̀ nnɑ́ɑntɛ kɛ́tɑroo kɛ̀ bɛnìtìbɛ̀ tìkú pɛ́u.

²⁸Kɛ̀ Piɛrii bɛ̀ nɑ̀kɛ́ kɛ dɔ̀: Di yɛ̃́mu kɛ dò nSifubɛ ci bɛ̀ bo tɑmɛ̀ wèè í tú Sifu o cĩ́ɛ̃̀tɛ̀, mí nKuyie nnɛ́ n nɑ̀kɛ́mu kɛ tú m bɑ́ nwúó nhòmɔù osĩ̀nwè.

²⁹Dɛɛ̀ te kɛ̀ di n yu kɛ̀ n yie nkɛ kɔ̀tɛní, n nɑ́kɛ́nɛ̀ di n yu mùù kpɛ́í.

³⁰Kɛ̀ Kɔrinɛi dɔ̀: Dɛ̀ mɔ̀kɛ yíe nyɛwe yɛ̀nɑ̀ɑ̀ n sòò bɑ́ɑ́mmɛ̀ Kuyie, kɛ̀ tɛwebiètɛ̀ bo mɛ̀tɑ̃ɑ̃ti, kɛ̀ nní nyóó dɑɑtɛ kɛ́yɑ̀ onìtì mɔù kòò còḿmú n yììkɛ̀ kɛ ɑ̃ tiyɑ̀ɑ̀tì kɛ̀ tì mìɛ̀ti,

³¹kɛ n nɑ́kɛ́ kɛ dɔ̀: Kɔrinɛi, Kuyie ncɔutɛ́mu ɑ bɑ́ɑ́mmu, kù í yɛ̃̀ nhɑ pɑ̃rɛ̀, ɑ pɑ̃ɑ̃ nyɛ̀ bɛcĩ̀rìbɛ̀.

³²Tɔ̃ mbɛnìtìbɛ̀ Sopee kɛ̀ bɛ̀ɛ yúní Simɔɔ bɛ̀ tú wè Piɛri, ò bo okɔ̃nnuurìwè mɔù cĩ́ɛ̃̀tɛ̀ kɛ̀ bɛ̀ ò tu Simɔɔ, kòò bo dɑ̀mɛ́ɛ̀rì tɑkɛ́.

³³Mɛm̀mɛ kɛ̀ m pɑ̃̀nkɛɛ tɔ̃ mbɛnìtìbɛ̀ kɛ̀ bɛ̀ bo dɑ yúní, kɑ̀ɑ yie nkɛ kɔ̀tɛní. Ti tíkú diɛ nKuyie nyììkɛ̀ kɛ bo keè Kuyie ndɑ duɔ́ ntìnti kɑ̀ɑ bo ti nɑ́kɛ́.

³⁴Kɛ̀ Piɛrii bɛ́i nkɛ dɔ̀: M bɑntɛ́mu di mmɔ̀nnì kɛ dò nKuyie nyí bɑɑ̀tì òmɔù.

³⁵Bɑ́ kùù botí miɛkɛ wèè kù dé kɛ dɔɔ̀ri kù dɔ́mɛ̀ kù we ndɔ́.