ZĨRINƆ 10:24-35

²⁴À gurↄ aagↄ̃deen aↄ̃ kà Sizarea. Kↄnɛliu a danɛnↄ kↄ̃n a gbɛ̃nna fɛ̃̀fɛ̃nↄ kàkↄ̃a èe ń dãa.

²⁵Kɛ̀ Pita gɛ̃̀ ua, ben Kↄnɛliu gàa à dààlɛ à kùɛ à aɛzĩ.

²⁶Ben Pita à fɛ̀ɛ à bè: Ǹ fɛɛ ǹ zɛ. Gbɛ̃nteen ma ũ se.

²⁷Èe yã ooo ai aↄ̃ gàa wà gɛ̃̀o kpɛ́n, ben à gbɛ̃nↄ lè kakↄ̃ana gwe paripari.

²⁸À bèńnɛ: Á dↄ̃ kɛ̀ Yudanↄ zɛ́ vĩ aↄ̃ yãkↄ̃tɛ kↄ̃n bori pãndeo ai aↄ̃ gɛ̃ ń uaro. Mↄde Ludaa ↄ̀dↄamɛ màton gbɛ̃ke gbãsĩ gwa ke mà à tɛ̃̀ boro.

²⁹Beee yãnzi kɛ̀ wà ma sisi, ma mↄ seka sai. Má yezi mà yã kɛ̀ a ma sisia ma sa.

³⁰Ben Kↄnɛliu bè: À gurↄ siigↄ̃deen yɛ̀, kɛ̀ mɛ́ɛ adua kɛɛ ma bɛ ↄfãntɛ̃ mↄ̀ aagↄ̃ mↄndaa'i. Ben kãndo ma gbɛ̃ke è zɛna ma aɛ à pↄ́kãsãa kɛ̀ èe tɛ́ kɛɛ dana

³¹à bè: Kↄnɛliu, Luda n aduakɛna sì, n gbadana kànɛ.

³²Ǹ gbɛ̃nↄ zĩ Yↄpa Simↄ kɛ̀ wè benɛ Pita sísi. À pìta Simↄ Ãa bɛ zaa ísia lɛ́a.

³³Ben ma gbɛ̃nↄ zĩ̀mma gↄ̃ↄ. Lán n mↄ nà à kɛ̀ maa. Tia sa wa píngi wá kú kɛ̀ Luda dↄ̃na guu, lɛ wà yã kɛ̀ Dii ònnɛ ǹ owee ma yãnzi.

³⁴Pita nà yã'onaa à bè: Má sì yãpura sa kɛ̀ Luda è gbɛ̃ke wɛ́ɛ gwaro.

³⁵Bori sãnda píngi tɛ́ gbɛ̃ kɛ̀ èe vĩa kɛɛnɛ, bensↄ̃ è yã maaa kɛɛ, adee yã bé è kánɛ.