Yatɛne 23:14-28

¹⁴A yi a xali Sofimi a xɛɛn ma Pisiga geyaan xuntagi. A yi saraxa gande solofere rafala mɛnni, a yi tura keden nun konton keden ba saraxa gandene birin fari.

¹⁵Balami yi a fala Balaki xa, a naxa, “Ti i ya saraxa gan daxine dɛxɔn be, n tan xa siga Ala ralandeni mɛnni.”

¹⁶Alatala yi fa Balami yɛtagi, a yi falan so a dɛ, a naxa, “Xɛtɛ Balaki fɛma, i yi ito fala a xa.”

¹⁷A yi xɛtɛ a fɛma, a yi tixi a saraxa gan daxine dɛxɔn e nun Moyaba kuntigine. Balaki yi a maxɔdin, a naxa, “Alatala nanse falaxi?”

¹⁸Balami yi waliyiya falane ti, a naxa, Balaki keli, i n xuiin mɛ! I tuli mati n na Siporo a dii xɛmɛna!

¹⁹Muxu mi Ala ra, a wulen fala, Adamadi mi a ra, a nimisa. A naxan falaxi, a mi na ligɛ ba? A na falan naxan ti, a mi na rakamalɛ ba?

²⁰A duban nan soxi n yii lan e ma. A barakan sa e yi. N mi nɔɛ na maxɛtɛ.

²¹A mi fe ɲaxin toma Yaxuba bɔnsɔnni. A mi fe xɔlɛn toma Isirayila yi. Alatala, e Ala e tagi. E fan a mangayaan matɔxɔma.

²²Ala nan faxi e ra sa keli Misiran yi, a nɔɔn tima e xa alo burunna ɲingena.

²³Kɔɛrayaan mi sese nɔɛ Yaxuba bɔnsɔnna xili ma. Serikariyaan mi nɔɛ sese ra Isirayila xili ma. A falama nɛn e ma na waxatini, “A mato, Ala naxan ligama!”

²⁴Siyani ito kelima nɛn alo yatana. E bata e yitɔn alo yatana naxan mi a sama fɔ a na xɔɔyi seen don, fɔ a na sube suxine wunla min.

²⁵Balaki yi a fala Balami xa, a naxa, “Xa i mi a dangama, hali i nama duba a xa de!”

²⁶Balami yi Balaki yabi, a naxa, “N mi yi a fala i xa ba, n naxa, ‘Alatala na naxan fala, n na nan ligama?’ ”

²⁷Balaki yi a fala Balami xa, a naxa, “En siga yire gbɛtɛ yi. Yanyina nde Ala tinma nɛn i xa e danga n xa mɛnni.”

²⁸Balaki yi Balami xali Peyori geyaan xuntagi, dɛnaxan yɛɛ rafindixi tonbonna ma.