NÚMEROS 23:14-28

¹⁴Huajca Tlanahuatijquetl Balac quihuicac Balaam ipan se mili campa itoca Zofim ipan itzonatipa nopa tepetl Pisga, huan nopona quichijqui chicome tlaixpamitl huan quitencajqui se becerro huan se borrego ipan sesen tlaixpamitl.

¹⁵Huajca nopona Balaam quiilhui Tlanahuatijquetl Balac: ―Ximocahua nica nechca motlacajcahualis tlatlatili huan na niquitati Toteco Dios nopona.

¹⁶Huan TOTECO quinamiquico Balaam huan quimacac nopa camanali catli quinequiyaya ma quiijto. Huan nojquiya quiilhui: ―Ximocuepa campa itztoc Tlanahuatijquetl Balac huan xiquilhui catli na nimitzilhuijtoc.

¹⁷Huan Balaam mocuepqui huan quiitac Balac ijcatoc nechca nopa tlacajcahualistli tlatlatili, huan ihuaya itztoyaj nopa tlayacanani tlen tlali Moab. Huan Tlanahuatijquetl Balac quitlatzintoquili: ―¿Tlaque mitzilhuijtoc DIOS?

¹⁸Huajca Balaam sempa pejqui camanalti huan quiijto ni camanali: “¡Tlanahuatijquetl Balac, ta catli tiicone Zipor, cuali techtlacaquili!

¹⁹Toteco amo itztoc quen titlacame. Yaya amo istlacati. Niyon amo moyolpatla quen se tlacatl. Catli yaya quiijtohua para oncas, ya nopa oncas. Catli yaya quitencahua, ya nopa quichihua.

²⁰Nechnahuatijtoc ma niquintiochihua ni masehualme. Huan pampa yaya ya quintiochijtoc, amo hueli na niquijtos para amo.

²¹TOTECO amo quipantía tlajtlacoli ipan ni israelitame. Inijuanti catli iteipan ixhuihua Jacob. Amo hualas tequipacholi ipan inijuanti pampa TOTECO catli inintata quihueyichijqui huan yaya itztoc ininhuaya. Yeca inijuanti tzajtzij ica paquilistli, pampa tlahuel hueyi inintlanahuatijca catli ininhuaya yohui.

²²Quen se hueyi toro quipiya icuacua, ni masehualme quipiyaj TOTECO quen ininchicahualis, yaya catli quinquixti ipan tlali Egipto.

²³Amo aqui hueli quintelchihuas ni iteipan ixhuihua Jacob. Ni israelitame amo tleno huelis quinchihuilis se tetlajchihuijquetl. Nochi quiijtohuaj: ‘Huejhueyi tlamantli Toteco Dios quinchihuilijtoc.’

²⁴Ni masehualme motlananaj huan temajmatíaj quen se tecuani catli amo mosiyajquetza hasta quicuas catli moitzquilijtoc, huan quiijis ieso catli momictilijtoc.”

²⁵Huajca Tlanahuatijquetl Balac quiilhui Balaam: ―Masque amo hueli tiquintelchihuas, amo xiquintiochihua.

²⁶Pero Balaam quinanquili: ―¿Amo nimitzilhui na san hueli niquijtos catli TOTECO nechilhui?

²⁷Huajca Tlanahuatijquetl Balac quiilhui: ―Techchihuili se favor, xihuala nohuaya huan nimitzhuicas seyoc lugar. Huelis tlen nopona Toteco mitzcahuilis xiquintelchihua.

²⁸Huan Balac quihuicac Balaam hasta itzonatipa nopa hueyi tepetl Peor campa nesiyaya nochi nopa huactoc tlali catli mocajqui tlatzintla.