YƐSÃÃ 89:8-52

⁸Kuyie nhɑ tɔ̃rɛ̀ kɑ̀rimɛ̀ yɛ̀ dé fɔ̃́ nwe, bɛ̀ɛ̀ dɑ ɔrí bɛ̀ í dɑ dɑɑti.

⁹Ti Yiɛ̀ nKuyie Mpɑkɛdɑɑ, we nkpeńnì kɛ dɑ dònnɛ̀, ti Yiɛ̀ nKuyie nhɑ kpeńnìmu kɛ̀ timɔ́mmɔnti dɑ fitɛ́.

¹⁰Fɔ̃́ɔ̃̀ bɑkɛ́ dɑ̀mɛ́ɛ̀rì koò ĩkù, kɛ̀ yɛnɛ́fĩ̀nfĩ̀rɛ̀ pùùní fɔ̃́ɔ̃̀ ɔ̃ɔ̃ yɛ̀ bónkùnnɛ.

¹¹Fɔ̃́ɔ̃̀ do nɑ̀ntɛ Esibiti kóò ũtirɛ kɛ́kuɔ, fɔ̃́ɔ̃̀ do cíɛ nhɑ dootitɔbɛ̀ nɛ̀ ɑ kó muwɛ̃rímú.

¹²Fɔ̃́ɔ̃̀ te kɛĩ́nkɛ̀ kɛ̀ fɔ̃́ɔ̃̀ te kɛtenkɛ̀, kɛtenkɛ̀ nɛ̀ kɛ kpɑ̀tì timɔu fɔ̃́ɔ̃̀ dɛ̀ fìí.

¹³Kubɑkù cɑ̃̀nku kó kutempɛ̃ nɛ̀ kubɑkù yoú kɔku fɔ̃́ɔ̃̀ dɛ̀ dɔ̀ɔ̀. Bɛ̀ɛ̀ bo Tɑbɔɔ tɑ̃rì nɛ̀ bɛ̀ɛ̀ bo Ɛdimɔɔ kpɛri bɛ̀ dɛ̀úkùnko fɔ̃́ɔ̃̀ yètìrì.

¹⁴Fɔ̃́ɔ̃̀ kó kubɑkù kpeńnì kɑ̀ɑ nɔ̀ùtɛ̀ mɔ̀kɛ muwɛ̃rímú, kɑ̀ɑ nɔ ndɛmɔu.

¹⁵A beéntì wennimu kɛ síɛ́ kɛ̀ tiì te kɑ̀ɑ kpɑ̀tì fìíkú. A ni ɑ ɛì kɛ dì dɔɔri mɛsɑ̀ɑ̀ mmɛ nɛ̀ timɔ́mmɔnti.

¹⁶Dɛ̀ nnɑɑti kubotí kùù dɑ íútí fɔ̃́ nti Yiɛ̀ nKuyie. Bɛ̀ bo nkérí ɑ kó kuwenniku miɛkɛ.

¹⁷Nɛ̀ ɑ kpɛ́í nkɛ bɛ̀ yɑ̃̀nkunɛ̀mɛ̀ diwɛ̀ì yɛwe yɛmɔu, ɑ wetí mɛ̀ɛ̀ kpɛ́í nte kɛ̀ bɛ̀ sɑ̃ntí bɛ mɑ́ɑ̀.

¹⁸Fɔ̃́ɔ̃̀ te kɛ̀ bɛ yètɛ̀ feí kɛ̀ bɛ̀ mɔ̀kɛ̀ muwɛ̃rímú, ɑ kó mɛsɑ̀ɑ̀ mmɛɛ̀ bɛ̀ yɛ̀útí muwɛ̃rímú.

¹⁹Ti Yiɛ̀ nKuyie nfɔ̃́ɔ̃̀ te wèè tu ti kó kudɔpìkù, wèè te Isidɑyɛɛribɛ weè te ti kóo kpɑ̀ɑ̀tì.

²⁰A do bɛnkɛmu ɑmɑ́ɑ̀ ɑ nìtìbɛ̀ kɛ́ bɛ̀ bɛ́innɛ̀ kɛ dɔ̀: Míì duɔ́ n kó mɛteèmmɛ̀ okpɑ̀rìnuɔnti, míì dɛ̀ìtɛ n nìtìbɛ̀ miɛkɛ odɑpɑ̀ɑ̀ koò dɛ̀úkùnnɛ.

²¹N yɑ̀mu Dɑfiti n kóo tɔ̃ntì, koò còú mmɛkùɔ̀ nkoò cɑ̃̀ńnɛ́.

²²N yó nhò pĩ̀ḿmu nɛ̀ n nɔ̀ùtɛ̀, míì ò kɑ̀nnɛ tikpɑ̀tì kɛ yó nhò duɔ̀ mmuwɛ̃rímú

²³O dootitɔbɛ̀ bɑ́ɑ́ ò do kóò dɛ̀ɛ́tɛ́, onitiyɛiwe bɑ́ɑ́ ò dií nyifɛi.

²⁴Míì yó nni o ììkɛ̀ kɛ kɔùtì o dùɔ̀ntɔbɛ̀, kɛ poti bɛ̀ɛ̀ ò nìí.

²⁵N kó timɔ́mmɔnti nɛ̀ n sɑ̀ɑ̀ dɛ̀ yóó nhò bonɛ̀mu, nɛ̀ n kpɛ́í nkòo wɛ̃rímú ndɛ́úkú.

²⁶M bo duɔ́ nkòo mbɑkɛ́ Mɛditedɑndee kóo dɑ̀mɛ́ɛ̀rì, kɛ́ntɔ kɛ́dítɛ́nɛ̀ kukó nhEfɑdɑti.

²⁷Ò bo nni nyu kɛ tú o cicɛ, Kuyie nkùù ò te, o kó dipèrì dìì ò dɛɛrí.

²⁸Kɛ̀ nh ò dɔ̀ɔ̀ n kóo po, kòo ḿpɛ̃nkù bɛkpɑ̀ɑ̀tìbɛ̀ bɛmɔu bɛ̀ɛ̀ bo kɛtenkɛ̀ ĩ́nkɛ̀.

²⁹Kɛ̀ n kó mɛsɑ̀ɑ̀ nní nhò bonɛ̀ sɑ̃́ɑ̃̀, mí nnɛ̀ we ti kó mɛtɑummɛ̀ bɑ́ɑ́ kṹntɛ́.

³⁰O cĩ́ɛ̃̀tɛ̀ bɑ́ɑ́ pɑɑ̀ okpɑ̀ɑ̀tì, kɛĩ́nkɛ̀ bo mɛ̀ɛ̀ botí sɑ̃́ɑ̃̀ o kpɑ̀tì yó mmɛ mbo.

³¹Kòo bí mɛ ndootóo n kuɔ́, kɛ tɛ̃́nkɛ í tũ n tié,

³²Kɛ̀ bɛ̀ cɑ̀ɑ̀ri n kuɔ́, kɛ í tũ n tɑnnɔ̀.

³³M bɛ̀ ɑ̃nnɛ́ kudɔú bɛ̀ yetɛ mɛ̀ɛ̀ kpɛ́í n kpɛti, kɛ̀ bɛ̀ɛ cuɔ́ bɛ cɑɑ̀rìmɛ̀ kó tiyɛ̃ĩti.

³⁴N nɛ́ bɑ́ɑ́ bɛ̀ yetɛnɛ̀ n kó mɛsɑ̀ɑ̀, m bɑ́ɑ́ yóu m bo bɛ̀ dɔ̀ɔ̀mɛ̀ m bɛ́i ntì.

³⁵M bɑ́ɑ́ cɑkɛ m bɛ̀ dɔ̀ɔ̀nɛ̀ mɛ̀ɛ̀ tɑummɛ̀, m bɑ́ɑ́ nɑ́kɛ́ n nùù kɛ́kpɑtɛ.

³⁶M bɛ́immu kɛ pɑ̀rìkɛ̀ nɛ̀ n yetìsɑ̀ɑ̀rì, m bo soutɛ́ Dɑfitɑɑ? M bɑ́ɑ́ dɛ̀ dɔ̀ɔ̀ bìtì.

³⁷O wuɔ nyó nsɔkɛ́mu sɑ̃́ɑ̃̀, kòo fuku mbo sɑ̃́ɑ̃̀ diyiè dòmmɛ̀.

³⁸Otɑ̃̀nkù bo mɛ̀ɛ̀ botí tiwɛtì sɑ̃́ɑ̃̀ kɛ̀ ti ò wùó, o kpɑ̀tì yó mmɛ ndò.

³⁹Kuyie nhɑ nɛ́ ò yetɛmu koò dootóɑ̀? Koò yɛ̀ kɛmiɛkɛ wenwe okpɑ̀ɑ̀tì ɑ tɑ̃ɑ̃tɛ́ wèɑ̀?

⁴⁰Kɛ sènkɛ̀rì fɔ̃́ nnɛ̀ ɑ kóo tɔ̃ntì di kó mɛtɑummɛ̀, kɛ bɔ nhokpɑ̀ɑ̀tì pìì kɛtenkɛ̀ kɛ̀ dì sɑ̃ṹ.

⁴¹Kɛ buɔ́ nyiduotí ìì fitɛ́ o cĩ́ɛ̃̀tɛ̀, kɛ pùɔ nho cɛ̃́kperì kɛ̀ sì nɑɑ́ ntidobontì.

⁴²Kɛ̀ bɛcɛpɛ̃̀mbɛ̀ pɛ̃nkù kɛ tóú bɛ̀ dɔ́ dɛ̀, kòo pɛɛtitɔbɛ̀ ò dɑú.

⁴³Kɛ duɔ́ kòo dùɔ̀ntɔbɛ̀ ò nɑ, kòo dootitɔbɛ̀ yɑ̃̀nku.

⁴⁴Fɔ̃́ɔ̃̀ kùɔ okpɑ̀rìsiè kó mɛnɑtimɛ̀, bɑ́ ɑ í ò teennɛ̀ mudoò miɛkɛ.

⁴⁵Fɔ̃́ɔ̃̀ fìètɛ fɛkpɑ̀ɑ̀tìpɑ̀tìfɛ̀ o nɔu miɛkɛ, kɛ bɔ nhokpɑ̀ɑ̀tìkɑ̀rì kɛtenkɛ̀.

⁴⁶Kɛ yɑ̀ɑ̀tɛ o dɑpɑ̀ntì kó yɛwe, koò dii nyifɛi mɛdiɛ̀.

⁴⁷N Yiɛ̀ nKuyie, dɛ̀ yó nkɑ̃́ɑ̃́kɛ́ dɛ kɑ̀ɑ yóu ɑ bo nti sɔrìnɛ̀mɛ̀? A miɛkɛ bo nhɑ̃ kɛ ti cɔ́ú muhɑ̃ɑ̃́ nkɔ̃mɑɑ̀?

⁴⁸A yɛ̃́mu kɛ dò n fòmmu í dɛtóo, ɑ dɔ̀ɔ̀ onìtì dimɔ̀nnì sɑ́m̀pɔ́rì kpɛ́í nkɛ.

⁴⁹Onìtì mɔù bo wèè bo nfòù kɛ bɑ́ɑ́ kúɑ̀? Yɑ́ɑ̀ we mbo nɑ kɛ́yentɛ́nɛ̀ o wɛ̃nnì kudɔnkù?

⁵⁰N Yiɛ̀ nKuyie mmɛsɑ̀ɑ̀ nhɑ do dɔɔrimɛ̀ kɔ̀tɛ kɛ? A do nɑ̀kɛ́ Dɑfiti kɛ dɔ̀ ɑ yó nhò dɔ̀ɔ̀ri dɛ̀ borɛ?

⁵¹Kuyie nhɑ yɛ̃́mu bɛ̀ ti diìnko ìì fɛi tínti ɑ kó bɛtɔ̃mbɛ̀. A yɛ̃́mu kɛ dò n tɔ yɛbotɛ̀ pɛ́u ndi.

⁵²Bɛ̀ɛ̀ í dɑ dɔ́ bɛ̀ ti sɑ̃́ɑ̃́mmu, kɛ sɑ̃́ɑ̃́ nhɑ kóo kpɑ̀ɑ̀tì ɑ cɑ̃̀ńnɛ́ wè tipíìtì timɔu.