A Umana Kakailai 89:8-52

⁸Luluai God kai ra lavur kor, To ia i ongor da u, Ia?

⁹U iat u kure vadekdek ra karangap na. ta, Ba i tut kana lavur bobol, u iat u kure vango diat.

¹⁰U tar pamar Rab da tikai ba i tar virua; U tar korot varbaiane kaum lavur ebar ma ra dekdek na limam.

¹¹A bala na bakut kaum iat, ma ra gunagunan kaum bula; U ga vaki ra rakarakan a gunagunan ma ra lavur magit i kor tana.

¹²A matana labur ma ra matana taubar u tar pait dir; Tabor ma Kermon dir gugu ta ra iangim.

¹³A limam i ongor tuna, A limam i dekdek ma ra limam tuna i ngala.

¹⁴A mangamangana takodo ma ra dovot na varkurai dir a vunapai kaum kiki na king; A varmari ma ra dovotina dir lualua ta ra matam.

¹⁵Nam ra tarai ba dia nunure ra ngenge na gugu dia ti doan; Dia vanavana ta ra talapar i ra matam, Luluai.

¹⁶Dia gugu ta ra iangim a bungbung par, Ma dia lia ma kaum mangamangana takodo.

¹⁷Tago dia langlang ta ra dekdekim; Ma ra ongor i vevet na tavua ta kaum varmari,

¹⁸Tago ra Luluai i tul tar kada ramravit, Ma ra Lia Kakit kai Israel i vaki kada king.

¹⁹Ta nam ra e u ga tata pire kaum umana tena lotu ta ra ninana, Ma u ga biti: Iau tar tul tar ia tai tika na tena ongor upi na maramaravut; Iau tar vangala tika na rangrang kai ra tarai.

²⁰Iau tar tikan tadav David kaugu tultul, Iau tar ku ia ma kaugu varku i gomgom;

²¹A limagu na maramaravut ia; A limagu na vapadikat ia bula.

²²Ra ebar pa na ki taun ia, Ma ra tena varpiam pa na vakadik ia.

²³Ma ina rapue kana lavur ebar ta ra luaina matana, Ma ina ubu diat dia milikuane.

²⁴Ma kaugu dovot na mangamangana ma kaugu varmari, dital a varirivut me; Ma ra dekdekina na ngala ta ra iangigu.

²⁵Kana varkurai na tuk tar ta ra ta, Ma kana gunan na varkurai ta ra umana tava alir.

²⁶Na tatike piragu dari: U tamagu, Kaugu God, ma ra vat ki iau laun tana.

²⁷Ina vaki ia upi ia ra luaina, Na ki ak tuna ta ra lavur king ta ra rakarakan a gunagunan;

²⁸Kaugu varmari na ki pirana pa na mutu, Ma kaugu kunubu na tur okot pirana.

²⁹Kana umana bul mur diat a ki ma pa na mutu, Ma kana kiki na king na tur tukum da ra bala na bakut.

³⁰Ba ra umana natuna dia vana kan kaugu lavur vartuluai, Ma ari pa dia mur kaugu lavur varkurai,

³¹Tumu dia piam vue kaugu lavur togotogo, Ma pa dia torom ta kaugu lavur vartuluai;

³²Io, ina bali kadia nirara ma ra virit, Ma kadia bilak na mangamangana ma ra umana meme na varkita.

³³Ma pa ina tak vakakit vue kaugu varmari kan ia, Ma kaugu mangamangana dovot pa na pak.

³⁴Pa ina piam vue kaugu kunubu, Ma pa ina vaenana pa ra tinata i ga arikai kan ra ngiegu.

³⁵A kopono bung iau ga vavalima. ta kaugu lia na kini dari: Pa ina vaongo pa David.

³⁶Kana umana bul mur diat a ki vatikai, Ma kana kiki na king na tur ta ra luaina matagu da ra matana keake.

³⁷Na tur vatikai da ra gai, Ma da ra tena varvai arama ra maup i dovot. Sela.

³⁸Ma u tar okole vue nina u ga ku ia, U tar pilak vue, u tar kulot ure.

³⁹U tar milikuane ra kunubu pire kaum tultul, U tar rapue kana kere na king ara ra pia.

⁴⁰U tar re vue kana lavur liplip; U tar nila vue kana lavur dekdek na pal na bakbakit.

⁴¹Diat par dia vana pakit dia loalong tana; Diat dia ki kikil ia dia vul ia.

⁴²U tar vadekdek ra lima i kana lavur ebar, Ma u tar vagugu diat dia varubu me.

⁴³U tar vatalil kana pakat na vinarubu, Ma pa u vaongor pa ia ta ra vinarubu.

⁴⁴U tar vapanie vue kana minamar, Ma u tar pukue vue kana kiki na king ura ra pia.

⁴⁵U tar vaikilik pa kana kini na barmana, U tar manga varuva tuna. Sela.

⁴⁶Luluai, aivia ra bung boko una ki ivai? Kaum kulot na birabirao vatikai bar?

⁴⁷Boina ba una nuk pa iau, tago kaugu kini pa i lolokon; U ga vaki ra tarai upi ra kini vakuku!

⁴⁸Akave ra tutana ba na laun vatikai ma pa na gire ra minat? Akave tikai ba na valaun ra tulungeana kan ra varkurai kai ra ruarua na tulungen? Sela.

⁴⁹Luluai, akave kaum lavur varmari nina U ga vaarike diat lua? Nina u ga vavalima tar diat tai David ta kaum dovot na mangamangana?

⁵⁰Luluai, una nuk pa ra varvul di vul kaum umana tultul me; Una nuk pa ra varkaba kai ra tarai, nina ba ra balagu i kairane,

⁵¹Nina ba kaum lavur ebar dia varkaba me, Luluai, Nina dia ga vul ra pal a kau i nam ba u ga ku ia me.

⁵²Da pite pa ra Luluai, ma pa na mutu. Amen ma Amen.