YƐSÃÃ 37:27-40

²⁷Yóu mɛyɛi nkɛ́ndɔɔri mɛsɑ̀ɑ̀, ɑ yɑɑ̀bí bo ḿbo sɑ̃́ɑ̃̀ dihɛì.

²⁸Kuyie ndɔ́ timɔ́mmɔnti nti, kù í buɔnko bɛ̀ɛ̀ kù tũ. Kù bɛ̀ bɑ̀ɑ̀mu sɑ̃́ɑ̃̀, kù yóó dɛitɛ bɛnitiyɛibɛ yɑɑ̀bí nyi.

²⁹Kɛ̀ bɛsɑ̀ɑ̀bɛ̀ɛ tiekɛ dihɛì, kɛ́ ndì bo sɑ̃́ɑ̃̀.

³⁰Osɑ̀ù nɑ̀ɑ́ mmɛciì nkó tinɑ́ɑǹtì nti, tìì yìɛ̀ní o nùù kɛ̀ tì wenni.

³¹Ò dɔ́ Kuyie nkuɔ́ nyi, kɛ yennínɛ̀ omɑ́ɑ̀ mɛyɛi.

³²Oyɛiwe ɔ̃ ndíímu osɑ̀ù, kɛ dɔ́ kóò kùɔ.

³³Ti Yiɛ̀ nKuyie nhɔ̃ɔ̃ í nyóu kòo sɑ̀ù tɑ oyɛiwe nɔu miɛkɛ, kɛ̀ bɛ̀ ò bekùnɛ̀ kù bɑ́ɑ́ yóu kɛ̀ bɛ̀ɛ ò kpetínnɛ́.

³⁴Mbúɔ́ Kuyie nkɛ tũ nku kó kucɛ, kù bo dɑ dɛ́úkùnnɛ kɑ̀ɑ tiekɛ dihɛì, kɛ́yɑ̀ kù dɛ̀itɛmɛ̀ bɛnitiyɛibɛ.

³⁵N yɑ̀mu onitiyɛiwe mɔ̀ɔ̀tɛ dɛ̀ muwɛ̃rímú, kɛ sɛ̀ntɛ̀ mutie sũ̀ũ̀mù kɔ̃mɛ,

³⁶kɛ́pɛ̃ɛ̃tóo ò tɛ̃́nkɛ í ndɛ̀ kpɑɑ́, kɛ̀ nh ò wɑmmú n yí ò yɑ̀.

³⁷Nwúó nwèè tũ̀ Kuyie nkuɔ́ nɛ̀ osɑ̀ù, dɛ kóo nìtì botí ɔ̃ɔ̃ dentɛnɛ̀ mɛsɑ̀ɑ̀ mmɛ.

³⁸Ti Yiɛ̀ nKuyie nyóó kuɔ̀mu bɛnitiyɛibɛ, bɛ wuɔ nyí yó nkpɑɑ́.

³⁹Ti Yiɛ̀ nKuyie nkuù dɛɛrí bɛsɑ̀ɑ̀bɛ̀, kɛ bɛ̀ kɑ̃nkɛ́ mɛhɑ́ɑ́rìmɛ̀ mɔ̀nnì.

⁴⁰Kuyie nkuù bɛ̀ teénnɛ̀, kɛ bɛ̀ dɛɛrí, kɛ bɛ̀ kɑ̃nkɛ́ bɛnitiyɛibɛ kɛ bɛ̀ dɛɛrí, kɛ yɛ̃́ bɛ̀ sɔ̀rimɛ̀ kuù borɛ̀.