Miti Mânec 37:27-40

²⁷Go sâqocne geŋkecnehuc eehâmo gie bazemec, iŋuc erâ sâcne juraʒihuc jucmu.

²⁸Wofuŋ e tiŋne jujure mana aŋac eekac, e mitiŋicfâc‐ticne mi behec‐jopaekac. Tiŋne jaŋe hone maiŋ ejareme juraʒihuc juniŋmu, sindaŋne jaŋere ɋâricfâc ine bâsirowec‐jopaocmu.

²⁹Ŋic tiŋne jaŋe mâreŋ rune eniŋmu, ehuc mâreŋ fainao hati jurahuc juniŋmu.

³⁰Ŋic tiŋne ere mickonec dâŋ fâri biaŋ wahaocmu, nameŋ‐ticnezi gie bame bâbâtiŋ fuaocmu.

³¹Anutu‐ticnere sâcmutâc dâŋ maŋticnao fokac, irec hata‐ticne biric boroc mi âteekac.

³²Ŋic sindaŋnezi tiŋne ruc bacneekac, â juju‐ticne sipirickeocte maŋkehuc juekac.

³³Meticnao feocte ine Wofuŋzi mi manaekac, dâŋgieo dâŋticne sâqorezacte aka wâc heekac.

³⁴Wofuŋte woŋec juhuc ere hatao ninipezemec, eki bafaharecgume mâreŋ rune ezokic, â sindaŋne jaŋe sirowepie hone aŋac ejarezokic.

³⁵Ŋic sindaŋne moc pepec sâko eme honehuc jupo, e ʒamana jâc iŋucne mâreŋ sâockerâ domawec.

³⁶Dameŋ mocko fotâcnehuc dodoma tacne honepo, fârinere ʒâŋe fipo, erâ basa‐bipiepo.

³⁷Ŋic bahacmâc e ʒâŋitazemec, â siocmâc e hone tarazemec; wamare gie baekac e hâcne ɋâric fuacne raniŋmu.

³⁸Sâcmutâc dâŋ qâqâsua ine sisipiriczi qanʒaŋ‐jopaocmu, â sindaŋne jaŋere ɋâricfâc ʒikazi omaec‐jopaocmu.

³⁹Tiŋne jaŋere babafic Wofuŋtaonec wareocmu, ʒârâ hâriŋ dameŋko ere dapeŋko soŋkeniŋmu.

⁴⁰Wofuŋzi ŋezic‐jopahuc batarac‐jopaocmu, sindaŋne jaŋeraonec batarac‐jopahuc bâpiaŋ‐jopaocmu, ere dapeŋko soŋkeŋgopieŋte iŋuc ejareocmu.