YƐSÃÃ 35:11-27

¹¹Bɛ̀ nɑ̀ɑ́ mbɛ̀ í yɑ̀ tì nti, Bɛ̀ m̀ bèkú nyí yɛ̃́ tì nti.

¹²Kɛ̀ n dɔ̀ɔ̀ri mɛsɑ̀ɑ̀ nkɛ̀ bɛ̀ n dɔ̀ɔ̀ri mɛyɛi, kɛ̀ m bo m mɑ́ɑ̀.

¹³N dootitɔbɛ̀ ɔ̃ mmɔ nkɛ̀ n dɑ́ɑ́tí kufɔ̀ɔ̀tɔ̃̀nkù nku, kɛ́bɛnkɛ n yɛǹcɑɑ̀rìmɛ̀ kɛ́boú dinùù kɛ́kɛ̃́kùnnɛ m mɑ́ɑ̀ kɛ́nsĩ́ĩ́, kɛ́mmbɑ́ɑ́ nKuyie nsɑ̃́ɑ̃̀,

¹⁴kɛ́ndò n nɛ́po yoo n tebitɛ, kɛ̀ n yììkɛ̀ ńsɔ̀ù, kɛ̀ n yɛ̀mmɛ̀ɛ cɑɑ̀rɛ̀ kɛ́ndò n yɔ̃ ku.

¹⁵Kɛ̀ n do dìì mɔ̀nnì bɛ̀ nɛ́ tíí kɛ́ nni ndɑú, kɛ́wɛ̃nnɛ́ kɛ́ nni ndɔɔri mɛyɛi, kɛ̀ bɛpɔ̀ɔ̀bɛ̀ n yí yɛ̃́ bɛ̀ nni nnɑ́ɑ́ ntiyɛiti.

¹⁶Bɛ̀ɛ̀ í dé Kuyie nnɛ̀ bɛ̀ɛ̀ dɑú bɛnìtìbɛ̀ kɛ̀ bɛ̀ wɛ̃nnɛ́ kɛ n dɑú mɛdiɛ̀, kɛ mɑɑ̀ nyɛbìɛ̀ n kpɛ́í.

¹⁷N Yiɛ̀ nKuyie nhɑ yó nni nwúónkomɑɑ̀? N dɛɛtɛ́nɛ̀ bɛ kó kuyonku, bɛ̀ tu yɛcìrícìrɛ̀ nyɛ.

¹⁸M bo ndɑ sɑ̃ntí ditĩ̀nnì cuokɛ̀, kɛ́ ndɑ sɑ̃ntí kubotí diɛkù cuokɛ̀.

¹⁹N dootitɔbɛ̀ bɑ́ nyɑ̃nku n kpɛ́í, bɛ̀ɛ̀ sɔ̃́ntɛ́ kɛ n níí bɛ̀ bɑ́ nni nhũũnnɛ̀ inuɔ.

²⁰Bɛ̀ í nɑ́ɑ́ ndiwɛ̀ì kó tinɑ́ɑǹtì bìtì! Bɛ̀ dɑ̀kii kɛ bo dɔ̀ɔ̀ mɛyɛi mmɛ dihɛì kó bɛnitisɑ̀ɑ̀bɛ̀.

²¹Kɛ ɑɑri tinùùtì kɛ tú: Àɑ̀ ti dɑ yɑ̀mu!

²²N Yiɛ̀ nKuyie nhɑ wúómmu dɛ̀ɛ̀ dɔ̀ɔ̀ri, bɑ́ ncĩ́ɛ̃́kɛ́, bɑ́ n dɛ́tɛ́nɛ̀.

²³Kuyie nyítɛ́ kɛ́ n kónnɛ́! N Yiɛ̀ nKuyie nhentɛ kɛ́kpɑ n kpɑ̀nnì.

²⁴N Yiɛ̀ nKuyie nhɑ wennimu, n kónnɛ́ kɛ̀ bɛ̀ bɑ́ nni ndɑú.

²⁵Bɑ́ yóu kɛ̀ n dootitɔbɛ̀ dɔ̀: Tóò! Ti do mɛ ndɔ́, ti ò mɑɑnkomu.

²⁶Bɛ̀ɛ̀ do n dɔ́nɛ̀ mɛyɛi nkɛ yɑ̃nku, ifɛii bɛ̀ pĩ nkɛ̀ dɛ̀ɛ bɛ̀ di, ìi pĩ mbɛ̀ɛ̀ yɛ̀mmɛ̀ do dò mbɛ̀ m pɛ̃ɛ̃tɛ́, kɛ̀ bɛ̀ɛ kɛ̃kɛ kɛ̀ ifɛii bɛ̀ pĩ.

²⁷Bɛ̀ɛ̀ yɛ̃́ nyí dɔ̀ɔ̀mɛ̀ mɛyɛi, bɛ yɛ̀mmɛ̀ ńnɑɑti, kɛ̀ bɛ̀ ḿbonɛ̀ kunɑɑtí kɛ́nnɑ́ɑ́ nsɑ̃́ɑ̃̀ kɛ tú: Dɛ́úkùnnɛ Kuyie nyètìrì kùù dɔ́ ku tɔ̃ntì kó mɛsɑ̀ɑ̀.